ଢେଙ୍କାନାଳ ଅଫିସ,୧୯।୭ ୨୦୨୦ ସେପ୍ଟେମ୍ବରରେ ଢେଙ୍କାନାଳ ଜିଲା ମୋଟଙ୍ଗା ଥାନା ନିମବାହାଳି ଛକରେ ରହୁଥିବା ଜରି ଗୋଟାଳି ରାଜୁ ଓରଫ୍ ବିଜୁଙ୍କ ହତ୍ୟା ମାମଲାର ରାୟ ସୋମବାର ପ୍ରକାଶ ପାଇଛି। ଏହି ମାମଲାର ବିଚାର କରି ଜିଲା ଦୌରାଜଜ୍ ଘଟଣାର ୨ ଅଭିଯୁକ୍ତ ମନୋଜ ରାଉତ ଓ ଦୁଃଖୀରାମ ସାହୁଙ୍କୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡାଦେଶ ପ୍ରଦାନ କରିଛନ୍ତି।
ପ୍ରକାଶ ଯେ, ନିମବାହାଳି ଛକରେ ରହୁଥିବା ଜରିଗୋଟାଳି ରାଜୁଙ୍କର ଜଣେ ମହିଳାଙ୍କ ସହ ବିବାହକୁ ନେଇ ତାଙ୍କ ସହିତ ରହୁଥିବା ମନୋଜ ଓ ଦୁଃଖୀରାମଙ୍କ ମଧ୍ୟରେ ବିବାଦ ହୋଇଥିଲା। ମହିଳା ଜଣକ ରାଜୁଙ୍କୁ ବିବାହ କରିବା ପାଇଁ ଚାହିଁବାରୁ ମନୋଜ ଏହାର ପ୍ରତିବାଦ କରିଥିଲେ। କାରଣ ମନୋଜ ସମ୍ପୃକ୍ତା ମହିଳାଙ୍କୁ ବିବାହ କରିବାକୁ ଚାହୁଁଥିଲେ। କିନ୍ତୁ ସମ୍ପୃକ୍ତା ମହିଳା ଏଥିରେ ରାଜି ନ ଥିଲେ। ଏହି ଘଟଣାକୁ ନେଇ ୩ଜଣଙ୍କ ମଧ୍ୟରେ ବିବାଦ ହୋଇଥିଲା। ପ୍ରଥମେ ଦୁଃଖୀରାମ ରାଜୁଙ୍କୁ ଚାପୁଡା ମାରିଥିଲେ। ଏହାପରେ ମନୋଜ ଏକ ଟାଙ୍ଗିଆରେ ରାଜୁଙ୍କ ବେକକୁ ହାଣିଦେବା ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ପରେ ଉଭୟ ଅଭିଯୁକ୍ତ ଫେରାର ହୋଇଯାଇଥିଲେ। ନିମବାହାଳି ବଜାରରେ ତେଜରାତି ଦୋକାନ ଦେଇଥିବା ପୀତବାସ ନାୟକ ଘଟଣା ସମ୍ପର୍କରେ ମୋଟଙ୍ଗା ଥାନାରେ ଲିଖିତ ଅଭିଯୋଗ କରିଥିଲେ। ଏ ନେଇ ନଂ. ୨୦୪ା୨୦ରେ ଏକ ମାମଲା ରୁଜୁ ସହ ୨ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ତତ୍କାଳୀନ ଅଧିକାରୀ ସରୋଜିନୀ ସାମ୍ବଡା କୋର୍ଟରେ ଚାର୍ଜସିଟ୍ ଦାଖଲ କରିଥିଲେ। ଏହି ମାମଲାର ସିିଟି ସେସନ୍ସ କେସ୍ ନଂ-୧୨ା୨୧ର ବିଚାର କରି ଜିଲା ଦୌରାଜଜ୍ ଶରତ କୁମାର ଦେହୁରୀ ଉପରୋକ୍ତ ଦଣ୍ଡାଦେଶ ପ୍ରଦାନ କରିଥିଲେ। ସରକାରଙ୍କ ପକ୍ଷରୁ ଏହି ମାମଲାକୁ ପବ୍ଲିକ ପ୍ରସିକ୍ୟୁଟର ଗଣେଶ କୁମାର ବେହେରା ପରିଚାଳନା କରିଥିଲେ। ଅଭିଯୁକ୍ତ ମନୋଜଙ୍କ ଘର କଳାହାଣ୍ଡି ଜିଲା ଭବାନୀପାଟଣା ଥାନା ଜେନାଖୋଲପଡ଼ା ଓ ଦୁଃଖୀରାମଙ୍କ ଘର ଅନୁଗୋଳ ଜିଲା ଜରପଡ଼ା ଥାନା ପୁରୁଣା ଗ୍ରାମରେ ହୋଇଥିତ୍ବା ବେଳେ ସେମାନଙ୍କ ପରିବାର ବର୍ତ୍ତମାନ ଢେଙ୍କାନାଳ ଟାଇନପ୍ଲାନିଂ ଅଞ୍ଚଳରେ ରହୁଥିବା ଜଣାପଡ଼ିଛି।