ଗୋପାଳପୁର,୭ା୪(ଡି.ଏନ.ଏ.): ବ୍ରହ୍ମପୁର ବିଶ୍ୱବିଦ୍ୟାଳୟ ପରିସରରେ ଥିବା ଛାତ୍ରୀ ଆବାସରେ ନିଜକୁ ଆର୍ମି ଅଫିସର ପରିଚୟ ଦେଇ ଜୋରଜବରଦସ୍ତି ପଶିବା ଅଭିଯୋଗରେ ଗୋପାଳପୁର ପୋଲିସ ବୁଧବାର ୨ ଜଣଙ୍କୁ ଗିରଫ କରିଛି। ସେମାନେ ହେଲେ ବରଗଡ଼ ଜିଲା ପାଇକମାଳ ଥାନା ଅନ୍ତର୍ଗତ ସାଲେପାଲି ଗ୍ରାମର ରାହୁଲ ପ୍ରଧାନ (୨୨) ଓ ରାହୁଲ ପିଞ୍ଜରା (୨୨)। ଏହି ଥାନା ଅନ୍ତର୍ଗତ ବ୍ରହ୍ମପୁର ବିଶ୍ୱବିଦ୍ୟାଳୟ ଛାତ୍ରୀ ଆବାସ ଫାଟକ ସମ୍ମୁଖରେ ବୁଧବାର ଆଇକା ପାତ୍ର ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ କରୁଥିଲେ। ପୂର୍ବାହ୍ନରେ ରାହୁଲ ପ୍ରଧାନ ଓ ରାହୁଲ ପିଞ୍ଜରା ଆର୍ମି ପୋଷାକରେ ଆସି ନିଜକୁ କମାଣ୍ଡର ପରିଚୟ ଦେଇ ଛାତ୍ରୀ ଆବାସର ଜଣେ ବ୍ୟକ୍ତିଙ୍କୁ ମିଶିବା ପାଇଁ ସିକ୍ୟୁରିଟି ଗାର୍ଡଙ୍କୁ କହିଥିଲେ। ତେବେ ଦୁଇଜଣଙ୍କ ଚାଲିଚଳଣ ଓ କଥାବାର୍ତ୍ତାରେ ସନ୍ଦେହ ଉପୁଜିଥିଲା। ଏ ନେଇ ଗାର୍ଡ ଜଣକ ସୁପରଭାଇଜରଙ୍କୁ ଘଟଣା ସମ୍ପର୍କରେ ଜଣାଇଥିଲେ। ପରେ ଅନ୍ୟ ସିକ୍ୟୁରିଟି ଗାର୍ଡମାନେ ପହଞ୍ଚତ୍ ଉଭୟଙ୍କୁ ପଚରାଉଚରା କରିଥିଲେ। ଏନେଇ ଗାର୍ଡ ଆଇକା ପାତ୍ର ଗୋପାଳପୁର ଥାନାରେ ଅଭିଯୋଗ କରିବା ସହ ଦୁଇଜଣଙ୍କୁ ପୋଲିସ ଜିମା ଦିଆଯାଇଥିଲା। ଏ ନେଇ ନଂ. ୫୮/୨୨ରେ ମାମଲା ରୁଜୁ କରି ପୋଲିସ ତଦନ୍ତ ଚଳାଇଥିଲା। ଉଭୟଙ୍କଠାରୁ ନକଲି ଆର୍ମି ପରିଚୟପତ୍ର, ସିବିଆଇ ପରିଚୟ ପତ୍ର, ନକଲି ବନ୍ଧୁକ, ନକଲି ଆର୍ମି ପୋଷାକ, ଦୁଇଟି ଟୋପି, ଦୁଇଟି ମୋବାଇଲ, ମନି ପର୍ସ ଓ ଟଙ୍କା, ଦୁଇଟି ଏଟିଏମ୍ କାର୍ଡ ଓ ଅନ୍ୟାନ୍ୟ ସାମଗ୍ରୀ ଜବତ ହୋଇଥିବା ନେଇ ଥାନାଧିକାରୀ ଶ୍ରୀକାନ୍ତ ଖମାରୀ ସୂଚନା ଦେଇଛନ୍ତି।
