କବିସୂର୍ଯ୍ୟନଗର(କୃପାସିନ୍ଧୁ ସ୍ବାଇଁ)/ବ୍ରହ୍ମପୁର(ସୁବାସ ଚନ୍ଦ୍ର ପାଢ଼ୀ),୫ା୯: ଗଞ୍ଜାମ ଜିଲା କବିସୂର୍ଯ୍ୟନଗର ଥାନା ଅନ୍ତର୍ଗତ ପଙ୍କଳବାଡ଼ି ଗ୍ରାମରେ ସୋମବାର ରାତିରେ ଦୁଇ ପରିବାର ମଧ୍ୟରେ ରକ୍ତାକ୍ତ ସଂଘର୍ଷ ଘଟିଛି। ଏଥିରେ ଗୋଟିଏ ପରିବାରର ୨ ସମ୍ପର୍କୀୟ ଭାଇଙ୍କ ମତ୍ୟୁ ଘଟିଛି। ସେମାନେ ହେଲେ ସୁନାରିଝୋଳା ଗ୍ରାମର ମିଥୁନ ଭୂୟାଁ (୩୦) ଓ ତାଙ୍କ ମାଉସୀ ପୁଅ ଭାଇ ହିଞ୍ଜିଳିକାଟୁ ଥାନା ନୂଆର୍ଗତ ଗ୍ରାମର ଲିପୁନ ସ୍ବାଇଁ (୨୮)।
ପ୍ରକାଶ ଯେ, ସୁନାରିଝୋଳା ପଞ୍ଚାୟତ ପଙ୍କଳବାଡ଼ି ଗ୍ରାମରେ ରହୁଥିବା ୨ ସମ୍ପର୍କୀୟ ଭାଇ ଜାନକୀ ଭୂୟାଁ ଓ ମିଥୁନ ଭୂୟାଁଙ୍କ ପରିବାର ମଧ୍ୟରେ ବିଭିନ୍ନ କାରଣକୁ ନେଇ ପୂର୍ବରୁ ଗଣ୍ଡଗୋଳ ଲାଗି ରହୁଥିଲା। ମିଥୁନଙ୍କୁ ଆକ୍ରମଣ କରି ଜାନକୀ ଓ ତାଙ୍କ ପୁଅ ଜେଲ ଯାଇଥିଲେ। କିଛିଦିନ ତଳେ ଉଭୟେ ଜେଲରୁ ଫେରିବା ପରେ ପ୍ରତିଶୋଧ ନେବାପାଇଁ ସୁଯୋଗ ଖୋଜୁଥିଲେ। ସୋମବାର ସନ୍ଧ୍ୟାରେ ମିଥୁନ ଓ ତାଙ୍କ ମାଉସୀ ପୁଅ ଭାଇ ଲିପୁନ କବିସୂର୍ଯ୍ୟନଗରରୁ ବାଇକ ଯୋଗେ ପଙ୍କଳବାଡି ଫେରୁଥିବା ବେଳେ ଜାନକୀ ଓ ତାଙ୍କର କେତେଜଣ ସହଯୋଗୀ ସଂଘବଦ୍ଧ ଭାବେ ଖଣ୍ଡାରେ ଆକ୍ରମଣ କରିଥିଲେ। ଦୁଇ ଭାଇଙ୍କ ଶରୀରର ବିଭିନ୍ନ ସ୍ଥାନରେ ଖଣ୍ଡା ଚୋଟ ପଡ଼ିଥିବାରୁ ଗୁରୁତର ଅବସ୍ଥାରେ ସେମାନଙ୍କୁ ପ୍ରଥମେ କବିସୂର୍ଯ୍ୟନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରୁ ଏମକେସିଜି ମେଡିକାଲକୁ ସ୍ଥାନାନ୍ତର କରାଯାଇଥିଲେ ମଧ୍ୟ ମିଥୁନ ଓ ଲିପୁନଙ୍କୁ ଡାକ୍ତର ମୃତ ଘୋଷଣା କରିଛନ୍ତି। ଖବରପାଇ ପୋଲିସ ପହଞ୍ଚିଛି। ଆକ୍ରମଣ ପ୍ରତିଆକ୍ରମଣରେ ଆଉ ୨ଜଣ ଆହତ ହୋଇଥିବା ବେଳେ ସେମାନଙ୍କୁ ହେପାଜତରେ ରଖିଛି। ଆକ୍ରମଣକାରୀ ଖସି ପଳାଇଛନ୍ତି। ଗାଁ ପୁରୁଷ ଶୂନ୍ୟ ହୋଇଛି। ପଙ୍କଳବାଡି ଗ୍ରାମରେ ପୋଲିସ ଛାଉଣୀ ହୋଇଛି।