ପାଟଣା,୬ା୯(ସ୍ବ.ପ୍ର.): କେନ୍ଦୁଝର ଜିଲା ପାଟଣାପ ବ୍ଲକରେ ୟୁରିଆ ସାରର କୁତ୍ରିମ ଅଭାବ ହେବା ପଛରେ ଥିବା ସାର ଦୁର୍ନୀତିର ଗୁମର ଦିନକୁ ଦିନ ଖୋଲିବାରେ ଲାଗିଛି। ଏହି ବ୍ଲକର ଦୁଇ ଲାଇସେନ୍ସପ୍ରାପ୍ତ ସାର ଦୋକାନୀ ଦୁଇ ଜଣ ଚାଷୀଙ୍କ ନାମରେ ଆବଶ୍ୟକତା ଠାରୁ ଅଧିକ ସାର ନେଇଥିବାର କାଗଜପତ୍ରରେ ଦର୍ଶାଇଥିବା ତଦନ୍ତ ବେଳେ କୃଷି ବିଭାଗ ଜାଣିବାକୁ ପାଇଥିଲା। ଆଉ ଏହି ଦୁଇ ଲାଇସେନ୍ସଧାରୀଙ୍କ ଲାଇସେନ୍ସକୁ ଘଟଗାଁ କୃଷି ଜିଲା ଅଧିକାରୀ ପାଟଣା ସହକାରୀ କୃଷି ଅଧିକାରୀ ପରେଶ କୁମାର ଦାଶଙ୍କ ଅନୁମୋଦନ କ୍ରମେ ରଦ୍ଦ କରିଛନ୍ତି। ପାଟଣା ମୁଖ୍ୟାଳୟସ୍ଥିତ ବଜାର ନିକଟରେ ଥିବା ଭବାନୀ ଏଣ୍ଟରପ୍ରାଇଜର୍ସ ଓ ମୂଷାଖରୀ ପଞ୍ଚାୟତ ବଡ଼ ଧନୁର୍ଜୟପୁରରେ ଥିବା ବାବୁ ଫର୍ଟିଲାଇଜର ପକ୍ଷରୁ ଦୁଇ ଜଣ ଚାଷୀଙ୍କୁ ଅଧିକ ମାତ୍ରାରେ ସାର ବିକ୍ରି କରିଥିବା ତଦନ୍ତରୁ ଜଣାପଡ଼ିଛି। ଏହି ସାର ଦୋକାନୀମାନେ ଯଥାକ୍ରମେ ୧୧୯ ବସ୍ତା ଓ ୨୧୨ ବସ୍ତା ୟୁରିଆ ସାର ହେରଫେର ହୋଇଥିବା ଜଣାପଡ଼ିଛି। ଏହି ଦୁଇ ସାର ଦୋକାନର ମାଲିକଙ୍କ ସହ ଆଉ ୮ ଜଣଙ୍କୁ ଦୋକାନୀଙ୍କ ନାମରେ ମଧ୍ୟ କୃଷିବିଭାଗ ତରଫରୁ କାରଣ ଦର୍ଶାଅ ନୋଟିସ ଜାରି କରାଯାଇଛି।
ବର୍ତ୍ତମାନ ପାଟଣା ବଜାରରେ ସରକାରୀ ଦରରେ ୨୬୬ ଟଙ୍କାରେ ୟୁରିଆ ସାର ଉପଲବ୍ଧ ହୋଇପାରୁ ନ ଥିବା ବେଳେ କଳା ବଜାରରେ ବସ୍ତା ପିଛା ୧ ହଜାର ଟଙ୍କା ଦରରେ ସାର ବିକ୍ରି ହେଉଥିବା ଜଣାପଡ଼ିଛି।