ଛତ୍ରପୁର,୫।୭(ଡି.ଏନ୍.ଏ.):ଗଞ୍ଜାମ ଜିଲାରେ କରୋନା ପରିସ୍ଥିତି ଅଣାୟତ ହେବାରେ ଲାଗିଛି। ଦିନକୁ ଦିନ ପଜିଟିଭଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ କରୋନାରେ ୨୦ ଜଣଙ୍କ ଜୀବନ ଗଲାଣି। ଏହି ପରିପ୍ରେକ୍ଷୀରେ କରୋନା ପରିଚାଳନା ଲାଗି ୨ ଆଇଏଏସ୍ଙ୍କ ସହ ୬ ଓଏଏସ ଗଞ୍ଜାମ ଜିଲା ପାଇଁ ରାଜ୍ୟ ସରକାର ଶନିବାର ନିଯୁକ୍ତି ଦେଇଥିଲେ। ଉକ୍ତ ଅଧିକାରୀମାନେ ଜିଲାରେ ପହଞ୍ଚି କୋଭିଡ ପରିଚାଳନା କାର୍ଯ୍ୟରେ ଯୋଗଦେଇଥିବା ସମ୍ପର୍କରେ ରବିବାର ଜିଲାପାଳ ବିଜୟ ଅମୃତା କୁଲାଙ୍ଗେ ଗଣମାଧ୍ୟକୁ ସୂଚନା ଦେଇଛନ୍ତି। ସେମାନେ ଜିଲା ପ୍ରଶାସନ ନିର୍ଦ୍ଦେଶରେ କାର୍ଯ୍ୟ କରିବେ।
ଉକ୍ତ ୨ ଆଇଏଏସ ଅଫିସର ୨ ସ୍ପେଶାଲ ଏଡିଏମ୍ ଭାବେ କାମ କରିବେ। ଆଇଏଏସ୍ ପାରୁଲ ପଟଓ୍ବାରୀଙ୍କୁ ଛତ୍ରପୁର ଉପଖଣ୍ଡ କରୋନା ପରିଚାଳନା ଦାୟିତ୍ୱ ଓ ବିଶାଲ ସିଂହଙ୍କୁ ଭଞ୍ଜନଗର ଉପଖଣ୍ଡ କରୋନା ପରିଚାଳନା ଦାୟିତ୍ୱ ଦିଆଯାଇଛି। ଏଥିସହ ୬ ଓଏଏସ୍ ଅଧିକାରୀ ସୁଧାକର ନାୟକ, ଲେକନାଥ ଦଳବେହେରା, ପଦ୍ମନାଭ ବେହେରା, ଶକ୍ତିକାନ୍ତ ରାୟ, ଚିତ୍ତ ରଞ୍ଜନ ମହାନ୍ତ ଓ ସୁଭେନ୍ଦ୍ର କୁମାର ସାମଲ ମଧ୍ୟ ଗଞ୍ଜାମ ଆସି କୋଭିଡ କାର୍ଯ୍ୟରେ ଯୋଗ ଦେଇଛନ୍ତି । ଜିଲାପାଳ ଗଣମାଧ୍ୟମକୁ କହିଛନ୍ତି ଯେ, ୨ ଆଇଏଏସ୍ ଅଫିସର ସବଡିଭିଜନ ସ୍ତରରେ କୋଭିଡ କେୟାର କମିଟି ଓ ସେଣ୍ଟର, କୋଭିଡ କେୟାର ହୋମ, କୋଭିଡ ମନିଟର, ମାଇକ୍ରୋ ମ୍ୟାନେଜମେଣ୍ଟର ମନିଟରିଂ କରିବେ।
ସେହିପରି ଜିଲାକୁ ଆସିଥିବା ୬ ଜଣ ଓଏଏସ୍ ଅଫିସର କୋଭିଡ କେୟାର ହୋମର ଭିତିଭୂମି, ଡାଟା ମ୍ୟାନେଜମେଣ୍ଟ, ବଢିବାକୁ ଥିବା ବେଡ ସଂଖ୍ୟା, ପ୍ଲାନିଂ ଓ ଏହାର କାର୍ଯ୍ୟକାରୀ କରିବା ସହ ମାଇକ୍ରୋ ପରିଚାଳନା କାର୍ଯ୍ୟର ତଦାରଖ କରିବେ ବୋଲି ଜିଲାପାଳ ସୂଚନା ଦେଇଛନ୍ତି।