କେନ୍ଦୁଝର,୭।୧୨(ସ୍ବ.ପ୍ର): କେନ୍ଦୁଝରରେ ସତନ୍ତ୍ର ଟାସ୍କ ଫୋର୍ସ ଉପରକୁ ଗୁଳି ଚଳାଇ ତିନି କଣ୍ଟେନର ଧରି ଗୋରୁ ମାଫିଆ ଫେରାର ହୋଇ ଯାଉଥିବା ବେଳେ ଦୁଇଟି କଣ୍ଟେନର ଧରାପଡିଛି । ଏନ୍ଏଚ୍ ୪୯ର ତୁରୁମୁଙ୍ଗା ଥାନା ଅନ୍ତର୍ଗତ ଖିରେଇଟାଙ୍ଗିରି ଟୋଲ ପ୍ଲାଜା ନିକଟରେ ଏହି ଘଟଣା ଘଟିଥିଲା । ଖବରପାଇ ଏସ୍ଟିଏଫ ଗୋରୁ ଚାଲାଣ ହେଉଥିବା ଜାଣି ପୂର୍ବରୁ ଜଗି ରହିଥିଲେ। ପ୍ରାୟ ପ୍ରତ୍ୟେକ ଦିନ ଏଭଳି ବେଧଡକ ଗୋଚାଲାଣ ହୋଇ ଆସୁଥିଲେ ହେଁ ଧରପଗଡ ହେଉ ନ ଥିଲା। ଏପରିକି ଏକାଧିକ ଥର ମାଫିଆମାନେ ଟୋଲ ପ୍ଲାଜା ଗେଟ୍ ଭାଙ୍ଗି ଗୋରୁ ଗାଡ଼ି ନେଇ ପଳାଇ ଯାଇଥିଲେ। ପୋଲିସ ଏହାକୁ ହାଲୁକା ଭାବରେ ନେଇ ଧରୁ ନ ଥିବା ଅଭିଯୋଗ ହେଉଛି। ଏହି ସବୁ ଗାଡ଼ି ତେଲକୋଇ, କାଞ୍ଜିପାଣି, ସଦର, ଟାଉନ, ତୁରୁମୁଙ୍ଗ ଆଦି ଥାନା ଅଞ୍ଚଳ ଦେଇ ଏନ୍ଏଚ୍ ୪୯ରେ ସମ୍ବଲପୁର ଆଡୁ ଆସି କେନ୍ଦୁଝର ଦେଇ ମୟୂରଭଞ୍ଜ ଜିଲା ଅତିକ୍ରମ କରି ପଶ୍ଚିମବଙ୍ଗକୁ ଯାଇଥାଏ। ଏସ୍ଟିଏଫ୍ ଟିମ୍ ଖବରପାଇ ୫ଟି ଗୋରୁ ବୋଝେଇ କଣ୍ଟେନରକୁ ପିଛା କରିଥିଲେ। ତେବେ କଣ୍ଟେନରକୁ ଏସକର୍ଟ କରି ମାଫିଆମାନେ ନେଉଥିବା ବେଳେ ମୁହାଁମୁହିଁ ହୋଇଥିଲେ। ଗୋଚାଲାଣକାରୀ ପ୍ରାୟ ୧୦ରୁ ୧୫ ରାଉଣ୍ଡ ଗୁଳି ମାଡ କରିଥିଲେ। ଆତ୍ମରକ୍ଷା ପାଇଁ ଏସ୍ଟିଏଫ୍ ପାଲଟା ଗୁଳି ଚାଳନା ମଧ୍ୟ କରିଥିବା ଜଣାପଡ଼ିଛି। ପରେ ଏସ୍ଟିଏଫ୍ ଟିମ୍ ୬୪ ଗୋରୁ ବୋଝେଇ ୨ଟି କଣ୍ଟେନର ସହିତ ଦୁଇ ଚାଳକଙ୍କୁ ଧରିବାରେ ସକ୍ଷମ ହୋଇଥିବା ବେଳେ ମାଫିଆମାନେ ଫେରାର ହୋଇଯାଇଛନ୍ତି। ଏହି ସବୁ ଗୋରୁ ସୋହେଲା ଅଞ୍ଚଳରୁ ଆସୁଥିବା ବେଳେ ଉକ୍ତ ଅଞ୍ଚଳର ଥାନା ତଥା ରାସ୍ତାରେ ପଡୁଥିବା ଥାନାରେ ସେଟିଂ କରି ଏଭଳି ବେଆଇନ କାରବାର ଚଳାଇ ଆସୁଥିଲେ ବୋଲି ଅଭିଯୋଗ ହୋଇଛି। ଯାହାକି ଅଧିକ ତଦନ୍ତ ହେଲେ ଜଣାପଡ଼ିବ ବୋଲି ମତ ପ୍ରକାଶ ପାଇଛି। ପୋଲିସ ଉଭୟ ଡ୍ରାଇଭରଙ୍କୁ ପଚରାଉଚରା ଜାରି ରହିଛି । ଏସ୍ଟିଏଫ୍ ଟିମ୍ରେ ଜଣେ ଡିଏସ୍ପି, ୩ ଜଣ ସବଇନ୍ସପେକ୍ଟର ଓ ୧୫ ଜଣ ପୋଲିସ ସାମିଲ ଥିଲେ । ଉଭୟ କଣ୍ଟେନରଙ୍କୁ ଟାଉନ୍ଥାନାକୁ ହସ୍ତାନ୍ତର କରାଯାଇଛି। ସେଥିରେ ଥିବା ଗୋରୁକୁ ବଡ଼ବିଲ ସ୍ଥିତ ଗୋଶାଳାକୁ ପଠାଯାଇଛି।