ଭୁବନେଶ୍ୱର,୨୨।୬ (ବ୍ୟୁରୋ): ଅଭିନେତ୍ରୀ ରଶ୍ମିରେଖା ଓଝା ଓରଫ ସୋନି(୨୨)ଙ୍କ ରହସ୍ୟଜନକ ମୃତ୍ୟୁକୁ ୪ ଦିନ ବିତିଛି। ପ୍ରାଥମିକ ତଦନ୍ତରୁ ରଶ୍ମିରେଖା ଆତ୍ମହତ୍ୟା କରିଥିବା କମିଶନରେଟ ପୋଲିସ ପକ୍ଷରୁ କୁହାଯାଉଥିବାବେଳେ ପରିବାର ଲୋକେ କିନ୍ତୁ ହତ୍ୟା ଅଭିଯୋଗକୁ ଦୋହରାଇଛନ୍ତି। ଏ ପରିସ୍ଥିତିରେ ତଦନ୍ତକୁ ଆଗକୁ ବଢ଼ାଇବା ସହ ଅଧିକ ତଥ୍ୟ ପାଇବାକୁ ପୋଲିସ ଦୁଇ ପୁରୁଷ ବନ୍ଧୁ ସନ୍ତୋଷ ଓ ରାଜାଙ୍କୁ ଜେରା କରିବାକୁ ଯୋଜନା କରୁଛି। ସେମାନଙ୍କୁ ପୋଲିସ ଥାନାକୁ ଡକାଇଥିବା ସୂଚନା ମିଳିଛି। ଏଥିସହ ରଶ୍ମିରେଖାଙ୍କ ଲାପ୍ଟପ୍ ଓ କଲ୍ ଡିଟେଲ୍ସ ରିପୋର୍ଟ (ସିଡିଆର୍) ଯାଞ୍ଚ କରାଯାଉଛି। ସେଥିରୁ କିଛି ଗୁରୁତ୍ୱପୂର୍ଣ୍ଣ ତଥ୍ୟ ପାଇବାକୁ ପୋଲିସ ଆଶା ରଖିଛି।
ରଶ୍ମିରେଖାଙ୍କୁ ପୁରୁଷ ବନ୍ଧୁ ସନ୍ତୋଷ ହିଁ ହତ୍ୟା କରିଥିବା ପରିବାର ଲୋକେ କହି ଆସୁଛନ୍ତି। ବାପା ରଞ୍ଜନ ଓଝା କହିଛନ୍ତି, ମୋ ଝିଅ ଆତ୍ମହତ୍ୟା କରିନାହିଁ। ତାକୁ ହତ୍ୟା କରି ଟାଙ୍ଗି ଦିଆଯିବା ପରେ ଅଭିଯୁକ୍ତମାନେ ଘରର ପଛପଟ ଝରକା ଦେଇ ପଳାଇଯାଇଛନ୍ତି। ସନ୍ତୋଷ ପାତ୍ର ହିଁ ଝିଅକୁ ହତ୍ୟା କରିଛନ୍ତି। ସନ୍ତୋଷଙ୍କୁ ଘର ଯିଏ ଦେଇଥିଲା, ସେ ହିଁ ଏସବୁର ମୂଳ କାରଣ ବୋଲି ସେ ଗଣମାଧ୍ୟମକୁ କହିଛନ୍ତି। ମା’ ରଞ୍ଜିତା ଓଝା କହିଛନ୍ତି, ରାଜା ବାରମ୍ବାର ରଶ୍ମିରେଖାଙ୍କୁ ଫୋନ କରି କେଉଁଠି ଅଛୁ ବୋଲି ପଚାରୁଥିଲେ। ଫଳରେ ସନ୍ତୋଷ ଏହାକୁ ସନ୍ଦେହ କରି ରଶ୍ମିରେଖାଙ୍କୁ ହତ୍ୟା କରିଥିବା ସେ କହିଛନ୍ତି। ତେବେ ପରିବାର ଲୋକେ ବାରମ୍ବାର ଗଣମାଧ୍ୟମରେ ଏଭଳି ପ୍ରତିକ୍ରିୟା ଦେଉଥିଲେ ମଧ୍ୟ କାହା ନାମରେ ଥାନାରେ ଲିଖିତ ଅଭିଯୋଗ କରିନାହାନ୍ତି। ଫଳରେ ପରିବାର ଲୋକଙ୍କ ମନ୍ତବ୍ୟ ଉପରେ ସନ୍ଦେହ କରାଯାଉଛି। ରଶ୍ମିରେଖା ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ହତ୍ୟା କରିଛନ୍ତି, ଯଦି ଆତ୍ମହତ୍ୟା ତେବେ କାରଣ କ’ଣ, କିଏ ଚାପ କିମ୍ବା ପ୍ରବର୍ତ୍ତାଇଥିଲେ କି? ଏଭଳି ବିଭିନ୍ନ ଦିଗକୁ ନେଇ ସାଧାରଣରେ ଆଲୋଚନା ଜାରି ରହିଥିବାବେଳେ ପୋଲିସର ତଦନ୍ତ ଉପରେ ସମସ୍ତଙ୍କ ନଜିର ରହିଛି।