ସୁନାବେଡା, ୧୪ା୧୨(ସ୍ବ.ପ୍ର.)-ମାଲକାନଗିରି ଜିଲା ସୁନାବେଡ଼ା ପୌର ପରିଷଦ ସେମିଳିଗୁଡା ହନୁମାନ ନଗର ନିକଟସ୍ଥ କୋଲାବ ଜଳଭଣ୍ଡାରରେ ବୁଡ଼ିି ୨ଜଣ ନାବାଳକଙ୍କ ସୋମବାର ମୃତ୍ୟୁ ହୋଇଛି। ସେମାନେ ହେଲେ ନୟାଗଡ ଅଞ୍ଚଳର ପ୍ରଭାତ କୁମାର ଦଳାଇଙ୍କ ପୁଅ ଶୁଭ୍ରାଂଶୁ ଶେଖର ଦଳାଇ (୧୬ ) ଏବଂ ରାଉରକେଲାର ରଞ୍ଜନ କୁମାର ବେହେରାଙ୍କ ପୁଅ ଆଶିଷ ବେହେରା (୧୩)। ଖବରରୁ ଜଣାପଡିଛି, ସେମିଳିଗୁଡା ହନୁମାନ ନଗର ବାସିନ୍ଦା ରାମଚନ୍ଦ୍ର ନାୟକଙ୍କ ପୁଅ ଉମାକାନ୍ତ ନାୟକଙ୍କ ୧୧ରେ ବାହାଘର ଭୋଜି ଥିଲା। ଏଥିରେ ଯୋଗ ଦେବାକୁ ତାଙ୍କ ସମ୍ପର୍କୀୟମାନେ ସେମିଳିଗୁଡା ଆସିଥିଲେ। ସୋମବାର ପୂର୍ବାହ୍ନ ୧୧ଟାରେ ଶୁଭ୍ରାଂଶୁ ଓ ଆଶିଷ ନିକଟସ୍ଥ କୋଲାବ ଜଳଭଣ୍ଡାର ନିକଟରେ ଖେଳୁଥିବା ବେଳେ ହଠାତ ଜଣେ ପାଣି ଭିତରକୁ ଖସି ପଡିଥିଲେ। ଅନ୍ୟ ଜଣେ ତାଙ୍କୁ ଉଦ୍ଧାର କରିବାକୁ ଯାଇ ସେ ମଧ୍ୟ ପାଣି ଭିତରକୁ ଖସିପଡିଥିଲେ। ଫଳରେ ଉଭୟେ ବୁଡିଯିବାରୁ ସେମାନଙ୍କ ମୃତ୍ୟୁ ହୋଇଥିଲା। ଖବରପାଇ ସେମିଳିଗୁଡା ଅଗ୍ନିଶମ ବିଭାଗ କର୍ମଚାଚାରୀମାନେ ସେମାନଙ୍କୁ ଜଳଭଣ୍ଡାରରେ ଖୋଜାଖୋଜି କରି ପାଇଥିଲେ। ଉଭୟଙ୍କୁ ସୁନାବେଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। ଏନେଇ ୯/୨୦ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
