ଭୁବନେଶ୍ୱର,୨୨।୧୧(ବ୍ୟୁରୋ): ଏଜୁକେଶନ ଓ୍ବାର୍ଲଡ ଇଣ୍ଡିଆ ସ୍କୁଲ ର଼୍ୟାଙ୍କିଙ୍ଗ୍ ୨୦୨୧-୨୨ର ଦୁଇଟି ବର୍ଗରେ ଶ୍ରେଷ୍ଠ ୧୦ରେ ଓଡ଼ିଶା ଆଦର୍ଶ ବିଦ୍ୟାଳୟ ସଙ୍ଗଠନ ଦ୍ୱାରା ପରିଚାଳିତ ଦୁଇଟି ସ୍କୁଲ ସ୍ଥାନ ପାଇଛି। ଗଞ୍ଜାମ ଜିଲାର ହାତୀଓଟ ଆଦର୍ଶ ବିଦ୍ୟାଳୟ ଭାରତର ଶ୍ରେଷ୍ଠ ୧୦ ସରକାରୀ ଡେ’ ସ୍କୁଲ ବର୍ଗରେ ଦଶମ ସ୍ଥାନରେ ରହିଥିବାବେଳେ ବଲାଙ୍ଗୀରର ପଥରଚେପା ଆଦର୍ଶ ବିଦ୍ୟାଳୟ ଶ୍ରେଷ୍ଠ ୧୦ ସରକାରୀ ବୋର୍ଡିଂ ସ୍କୁଲ ଭାବେ ଦଶମ ର଼୍ୟାଙ୍କ୍ ପାଇଛି। ଏହି ସଫଳତା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟୁଇଟ୍ କରି ଛାତ୍ରୀଛାତ୍ର, ଶିକ୍ଷକ ଓ ସଙ୍ଗଠନର ଅଧିକାରୀଙ୍କୁ ଶୁଭେଚ୍ଛା ଜଣାଇଛନ୍ତି। ଏହା ଏକ ଗର୍ବର ବିଷୟ ଯେ, ଶିକ୍ଷା ସହିତ ପ୍ରତ୍ୟେକ ପିଲାଙ୍କୁ ସଶକ୍ତ କରିବା ପାଇଁ ଆମର ଦୃଷ୍ଟିକୋଣ ପୂରଣ ହେଉଛି ବୋଲି ମୁଖ୍ୟମନ୍ତ୍ରୀ କହିଛନ୍ତି।