ନୂଆଦିଲ୍ଲୀ,୩।୧୨: ଆସନ୍ତା ବର୍ଷ ଆଇପିଏଲରେ ୨ ନୂତନ ଦଳ ଭାଗ ନେଇପାରନ୍ତି। ବିସିସିଆଇ ନିଜର ବାର୍ଷିକ ବୈଠକ(ଏଜିଏମ୍)ର ଏଜେଣ୍ଡାରେ ନୂଆ ଦଳକୁ ସାମିଲ କରିବାର ମୁଦ୍ଦା ସ୍ଥାନିତ କରିଛି। ଏଥିନେଇ ୨୪ ଡିସେମ୍ବରରେ ମୁମ୍ବାଇରେ ଅନୁଷ୍ଠିତ ହେବାକୁ ଥିବା ବୈଠକରେ ଚୂଡ଼ାନ୍ତ ନିଷ୍ପତ୍ତି ନିଆଯାଇପାରେ। ଏହାଛଡ଼ା ୨୦୨୮ରେ ଲସ ଆଞ୍ଜେଲସରେ ହେବାକୁ ଥିବା ଅଲମ୍ପିକ୍ସରେ କ୍ରିକେଟକୁ ଅନ୍ତର୍ଭୁକ୍ତ କରିବା ପାଇଁ ମଧ୍ୟ ବିବେଚନା କରାଯାଇପାରେ।
ତେବେ ଚଳିତ ବର୍ଷ ଆଇପିଏଲ୍ ଶେଷ ହେବା ପରଠାରୁ ଦୁଇଟି ନୂତନ ଦଳରେ ଯୋଗଦେବା ନେଇ ଚର୍ଚ୍ଚା ହେଉଛିର୍। ଆଇପିଏଲର ଫାଇନାଲ ସମୟରେ ୨ ନୂତନ ଦଳକୁ ଅନ୍ତର୍ଭୁକ୍ତ କରିବା ପାଇଁ ବୋର୍ଡର ବରିଷ୍ଠ ଅଧିକାରୀଙ୍କ ମଧ୍ୟରେ ଏକ ଅନୌପଚାରିକ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କ ବ୍ୟତୀତ ବୋର୍ଡ ସଚିବ ଜୟ ଶାହା ଉପସ୍ଥିତ ଥିଲେ। ଏହି ପ୍ରସଙ୍ଗରେ ଆଇପିଏଲର ପରିଚାଳନା ପରିଷଦ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଥିଲା। କିନ୍ତୁ ଏନେଇ କୌଣସି ଆନୁଷ୍ଠାନିକ ଆଲୋଚନା ହୋଇନାହିଁ। ଏବେ ଏଜିଏମ୍ ବୈଠକରେ ଏନେଇ ବିଚାର କରାଯିବ ବୋଲି କୁହାଯାଉଛି।
୨୦୦୮ ମସିହାରେ ଆରମ୍ଭ ହୋଇଥିଲା ଆଇପିଏଲ । ସେତେବେଳେ ଏଥିରେ ୮ ଟି ଦଳ ସାମିଲ ହୋଇଥିଲେ। ପରବର୍ତ୍ତୀ ସମୟରେ ଦଳ ସଂଖ୍ୟା ବୃଦ୍ଧି କରାଯାଇଥିଲେ ହେଁ ବର୍ତ୍ତମାନ ଏହି ଟୁର୍ନାମେଣ୍ଟରେ ପୂର୍ବଭଳି ୮ ଟି ଦଳ ହିଁ ଅଂଶଗ୍ରହଣ କରୁଛନ୍ତି। ତେବେ ନୂଆ ଦଳରେ ଅହମ୍ମଦାବାଦ, ଲକ୍ଷ୍ନୌ ଏବଂ ପୁଣେ ନାମକୁ ବିଚାର କରାଯାଇପାରେ। ଆଦାନୀ ଗ୍ରୁପ୍ ଏବଂ ସଞ୍ଜିବ ଗୋଏଙ୍କାଙ୍କ ଆର୍ପିଏସ୍ଜି ଗ୍ରୁପ୍ ଦଳ କିଣିବା ଦୈାଡ଼ରେ ସବୁଠାରୁ ଆଗରେ ଅଛନ୍ତି। ଏହା ବ୍ୟତୀତ ଦକ୍ଷିଣ ଭାରତର ଜଣେ ବଡ ଅଭିନେତା ମଧ୍ୟ ଆଇପିଏଲ୍ରେ ଦଳ କିଣିବାକୁ ଚାହୁଁଛନ୍ତି ବୋଲି ଦାବି କରାଯାଉଛି।