ଗୋପ,୫।୮(ଡି.ଏନ୍.ଏ.): ଦୀର୍ଘମାସ ଧରି ଆନ୍ଧ୍ରପ୍ରଦେଶ ଶ୍ରୀକାକୁଲମର ଏକ ହୋଟେଲରେ ଭୋକ ଉପାସରେ ଫସିଥିବା ୨ ପ୍ରବାସୀଙ୍କୁ ଉଦ୍ଧାର କରାଯାଇଛି। ସେମାନେ ହେଲେ ପୁରୀ ଜିଲା ଗୋପ ବ୍ଲକ ଅଧୀନ ବନ୍ତଳି ପଞ୍ଚାୟତ ମହାପୁର ଗ୍ରାମର ପବିତ୍ର ନାୟକ( ୪୮) ଓ ପ୍ରଭାକର ଗୋଚ୍ଛାୟତ (୩୩)।
ଗୁରୁବାର ସକାଳେ ୨ଜଣ ଗାଁରେ ପହଁଞ୍ଚିବା ପରେ ପରିବାର ଖୁସିବ୍ୟକ୍ତ କରିଛନ୍ତି। ସୂଚନାଯୋଗ୍ୟ, ପ୍ରଥମ କରୋନା ଲହର ପରେ ପବିତ୍ର ଓ ପ୍ରଭାକର ଦାଦନ ଖଟିବାକୁ ଆନ୍ଧ୍ର ଯାଇଥିଲେ। ମାତ୍ର କରୋନା କଟକଣାକୁ ନେଇ ସେଠାରେ କମ୍ପାନୀ ଖୋଲି ନ ଥିଲା। ଫଳରେ ସେମାନେ ଘରୁ ନେଇ ଥିବା ଟଙ୍କା ଅଳ୍ପଦିନ ସରିଯାଇଥିଲା। କିଛିଦିନି ଭୋକ ଉପାସରେ ବୁଲିବା ପରେ ଶ୍ରୀକାକୁଲମର ଏକ ହୋଟେଲରେ ସେମାନେ କାର୍ଯ୍ୟ କରିଥିଲେ। କିନ୍ତୁ ହୋଟେଲ ମାଲିକ କାର୍ଯ୍ୟ କରିବାର କିଛିଦିନ ପରେ ଶାରୀରିକ, ମାନସିକ ନିର୍ଯାତନା ଦେବା ସହ ମାଡ଼ ମାରିଥିଲେ। କୌଣସି ପ୍ରକାର ଘଟଣା ସଂକ୍ରାନ୍ତରେ ପରିବାର ଲୋକ ଜାଣି ସାହାଯ୍ୟ ପାଇଁ ନେହୁରା ହୋଇଥିଲେ ମଧ୍ୟ କେହି ଶୁଣି ନ ଥିଲେ।
ମହାପୁର ଅଞ୍ଚଳର ସାମାଜିକ କର୍ମୀ ଦେବଦତ୍ତ ବିଶ୍ବରଞ୍ଜନ ଘଟଣା ବିଷୟରେ ଜାଣି ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡି ଏବଂ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ୨ ରାଜ୍ୟର ପୋଲିସ ବିଭାଗକୁ ଟୁଇଟ୍ କରି ଗତ ୩ ତାରିଖରେ ଜଣାଇଥିଲେ। ଟୁଇଟ୍ ପରେ ଆନ୍ଧ୍ର ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସ୍ଥାନୀୟ ପୋଲିସ ଉକ୍ତ ହୋଟେଲରୁ ୨ ଓଡ଼ିଆଙ୍କୁ ଉଦ୍ଧାର କରି ଓଡ଼ିଶା ପଠାଯାଇଥିଲା। ଗୁରୁବାର ସକାଳୁ ଏହି ଓଡ଼ିଆ ପ୍ରବାସୀ ଗାଁରେ ପହଞ୍ଚିଲେ। ପରିବାରର ସଦସ୍ୟ ଉଦ୍ଧାର କରିବାରେ ଦେବଦୂତ୍ତ ସାଜିଥିବା ଦେବଦତ୍ତ ବିଶ୍ବରଞ୍ଜନଙ୍କ ସହ ୨ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି।