ଯାଜପୁର ଅଫିସ/ପାଣିକୋଇଲି(ଡି.ଏନ.ଏ.),୧୪ା୯: ଯାଜପୁର ଜିଲା ପାଣିକୋଇଲି ଥାନା ସାନସୋତି ଗ୍ରାମରେ ଏକ ପୋଲ ନିକଟରେ ଘଟିଥିବା ଡବଲ ମର୍ଡର ଘଟଣାର ରହସ୍ୟ ଉନ୍ମୋଚିତ ହୋଇଛି। ଅପ୍ରାକୃତିକ ଯୌନ ସମ୍ପର୍କ ଓ ଟଙ୍କା ମୂଲଚାଲକୁ ନେଇ ସେମାନଙ୍କୁ ହତ୍ୟା କରାଯାଇଥିଲା। ଏହି ଘଟଣାରେ ଭଦ୍ରକର ଜଣେ ନାବାଳକଙ୍କ ଏବଂ ୨ ଜଣ କିନ୍ନରଙ୍କ ସମେତ ୭ଜଣଙ୍କୁ ପାଣିକୋଇଲି ପୋଲିସ ଗିରଫ କରିଛି। ଏ ସଂକ୍ରାନ୍ତରେ ପାଣିକୋଇଲି ଥାନାରେ ଏକ ମାମଲା(ନଂ.୨୩୮/୨୧) ଦଫା ୩୦୨, ୨୦୧ ଓ ୩୪ ଆଇପିସିରେ ରୁଜୁ ହୋଇଛି। ଅଭିଯୁକ୍ତମାନେ ହେଲେ ଦୀପା କିନ୍ନର ଓ ଶୀଲା କିନ୍ନର, ଭଦ୍ରକ ଜିଲା ପୁରୁଣାବଜାର ଥାନା ଗରଦପୁର ଅଞ୍ଚଳର ସତ୍ୟଜିତ୍ ବେହେରା, ମନୋଜ ସାହୁ, ରାଜେନ୍ଦ୍ର ସାହୁ, ମନୋଜ ବେହେରା ଏବଂ ଜଣେ ଯୁକ୍ତ ୨ ପଢୁଥିବା ନାବାଳକ ଛାତ୍ର ବୋଲି ଡିଏସ୍ପି ପ୍ରମୋଦ କୁମାର ମଲ୍ଲିକ କହିଛନ୍ତି।
ସୂଚନା ଅନୁଯାୟୀ, ଗତ ୨ ତାରିଖରେ ମାନସ ରଞ୍ଜନ ଦାସ ଓ ବିଜୟ କୁମାର ସାହୁ ନିଜ ଗ୍ରାମ ଜହ୍ନାରୁ ରାଉତରାପୁରସ୍ଥିତ ସାଙ୍ଗ ପାଖକୁ ଯାଇଥିଲେ। ସେଠାରେ ଜୁଆ ଖେଳି କିଛି ଟଙ୍କା ଜିତିବା ପରେ ସନ୍ଧ୍ୟାରେ ବ୍ୟାସନଗରସ୍ଥିତ ଏକ ବାର୍ରେ ପହଞ୍ଚି ମଦ୍ୟପାନ କରିଥିଲେ। ସେଦିନ ରାତି ୯ଟା ୧୫ ପର୍ଯ୍ୟନ୍ତ ଦୁହେଁ ବାର୍ରେ ଥିଲେ। ସେଠାରୁ ବାହାରି ଜହ୍ନାସ୍ଥିତ ଏକ ହୋଟେଲରେ କିଛି ସମୟ କଟାଇଥିଲେ। ପରେ ରାତିରେ ପାଣିକୋଇଲି ଟୋଲଗେଟ ପାର ହୋଇ ଶିଲା ଓ ଦୀପା କିନ୍ନରଙ୍କ ନିକଟରେ ପହଞ୍ଚି ଥିଲେ। ସେଠାରେ ୨ କିନ୍ନରଙ୍କ ସହ ବିଜୟ ଓ ମାନସ ମଦ ପିଇବା ପରେ ତାଙ୍କ ସହ ମୂଲଚାଲ ନେଇ ବଚସା ଆରମ୍ଭ ହୋଇଥିଲା। ପରେ ଉଭୟଙ୍କ ମଧ୍ୟରେ ମାରପିଟ ହୋଇଥିଲା। ଏହି ସମୟରେ ନିୟମିତ ଭାବେ ଭଦ୍ରକରୁ ଆସୁଥିବା କିନ୍ନରଙ୍କ ୫ ଗ୍ରାହକ ଘଟଣାସ୍ଥଳରେ ପହଞ୍ଚିଥିଲେ। ସେହି ୫ଜଣଙ୍କ ସମେତ ୨ କିନ୍ନର ମିଶି ବିଜୟ ଓ ମାନସଙ୍କୁ ସଂଘବଦ୍ଧ ଆକ୍ରମଣ କରିଥିଲେ। ମାନସଙ୍କ ମୃତ୍ୟୁ ହୋଇଥିବା ଜାଣି ସେମାନେ ମିଳିତ ଭାବେ ବିଜୟଙ୍କ ଉପରେ ଆକ୍ରମଣ କରିଥିଲେ। ପରେ ଉଭୟଙ୍କୁ ସେମାନେ ଆଣି ନିର୍ମାଣାଧୀନ ପୋଲ ଉପରେ ପକାଇ ଦେଇଥିଲେ। ସେମାନେ ବ୍ୟବହାର କରୁଥିବା ବାଇକ୍କୁ ଆଣି ପୋଲ ତଳକୁ ପକାଇ ଦୁର୍ଘଟଣାର ରୂପ ଦେବାକୁ ଚେଷ୍ଟା କରିଥିଲେ। ସୋମବାର ସମସ୍ତ ଅଭିଯୁକ୍ତଙ୍କୁ ଥାନାରେ ଜେରା ପରେ ସେମାନେ ଏହି ଘଟଣା ସ୍ବୀକାର କରିଥିବା ପୋଲିସ କହିଛି।
