ସମ୍ବଲପୁର,୨୬ା୭(ବ୍ୟୁରୋ): ସମ୍ବଲପୁର-ଅନୁଗୋଳ ୫୫ନଂ. ଜାତୀୟ ରାଜପଥର ସମ୍ବଲପୁର ଜିଲା ଯୁଯୁମୁରା ଥାନା ଜରାଙ୍ଗ ଗ୍ରାମ ନିକଟରେ ସୋମବାର ଏକ ସଡ଼କ ଦୁର୍ଘଟଣା ଘଟିଛି। ଟ୍ରକ୍ ଓ କାର୍ ମୁହାଁମୁହିଁ ଧକ୍କାରେ ୨ ଜଣଙ୍କ ମୃତ୍ୟୁ ଘଟିଛି। ସେମାନେ ହେଲେ ରାଉରକେଲା ଛେଣ୍ଡ କଲୋନୀର ସଞ୍ଜୟ କୁମାର ରାଉତ (୩୫) ଓ ଲେଫ୍ରିପଡାର ସନ୍ତୋଷ କାଣ୍ଡି (୩୪)। ଅନ୍ୟ ଦୁଇଜଣ ମାନସ ରଞ୍ଜନ ରାଉତ(୪୦) ଓ ରାଜେଶ ବଢେଇ ଆହତ ହୋଇଛନ୍ତି। ଖବର ପାଇ ଯୁଯୁମୁରା ପୋଲିସ ପହଞ୍ଚତ୍ ଟ୍ରକ୍ ଓ କାର୍କୁ ଜବତ କରିଛି। ମିଳିଥିବା ସୂଚନା ଅନୁସାରେ କାର୍ ନଂ.୦୨-ଏକ୍ୟୁ-୭୦୯୯ ରାଉରକେଲାରୁ ଭୁବନେଶ୍ୱର ଯାଉଥିଲା। ବିପରୀତ ଦିଗରୁ ଆସୁଥିବା ଟ୍ରକ୍ (କେଏ୨୫-ବି-୮୫୦୧) ସହ ଜରାଙ୍ଗ ଗ୍ରାମ ନିକଟରେ ମୁହାଁମୁହିଁ ଧକ୍କା ହୋଇଥିଲା। ଫଳରେ କାର୍ରେ ଥିବା ଉପରୋକ୍ତ ୪ ଯୁବକଙ୍କୁ ଗୁରୁତର ଅବସ୍ଥାରେ ଯୁଯୁମୁରା ଡାକ୍ତରଖାନା ନିଆଯାଇଥିଲା। ସେଠାରେ ଡାକ୍ତର ସଞ୍ଜୟ ଓ ସନ୍ତୋଷଙ୍କୁ ମୃତ ଘୋଷଣା କରିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା। ଗୋଡ ଭାଙ୍ଗିଯାଇଥିବା ଯୁବକ ରାଜେଶ ବୁର୍ଲାରେ ଚିକିତ୍ସିତ ହେଉଛନ୍ତି।
