କାଲିମେଳା, ୩୦ା୪(ଡି.ଏନ.ଏ.): ମାଲକାନଗିରି ଜିଲା କାଲିମେଳା ଥାନା ଅନ୍ତର୍ଗତ ଭେଜାଙ୍ଗିୱାଡl ଓ ବଦଲିଗୁଡା ଗ୍ରାମ ମଧ୍ୟରେ ଶୁକ୍ରବାର ଅପରାହ୍ନ ୧ଟାରେ ଏକ ପିକ୍ଅପ୍ ଭ୍ୟାନ୍ ଓଲଟିପଡିଛି। ଫଳରେ ଏଥିରେ ଥିବା ଯାତ୍ରୀଙ୍କ ମଧ୍ୟରୁ ୨ଜଣଙ୍କ ମୃତ୍ୟୁ ହୋଇଛି। ମୃତକମାନେ ହେଲେ ଏମ୍ପିଭି-୨୯ ଗ୍ରାମର ଶ୍ୟାମାପଦ ବୈଦ୍ୟଙ୍କ ପୁଅ ସେନାଶିଷ ବୈଦ୍ୟ (୨୦) ଏବଂ ବ୍ରଜେନ ଢାଲିଙ୍କ ପୁଅ କିଶୋର ଢାଲି (୨୫)। ଏଥିରେ ୫ଜଣ ଆହତ ହୋଇଛନ୍ତି। ସେମାନେ ହେଲେ କିଶୋର ଢାଲି, ସେନାଶିଷ ବୈଦ୍ୟ, ବିଷ୍ଣୁ ମଣ୍ଡଳ, ଆନିବେସ ଶର୍କରା ଓ ଅନୁପ ମିସ୍ତ୍ରି ଆହତ ହୋଇଛନ୍ତି। ଆହତଙ୍କ ମଧ୍ୟରେ ୨ଜଣ ନାବାଳକ ରହିଛନ୍ତି।
ଖବରରୁ ଜଣାପଡିଛି, କାଲିମେଳା ଥାନା ଭେଙ୍କଟପାଲମ ପଞ୍ଚାୟତ ଅନ୍ତର୍ଗତ ଏମ୍ପିଭି-୨୯ ଗ୍ରାମରୁ ୭ ଜଣ ଏକ ପିକ୍ଅପ୍ ଭ୍ୟାନ୍ ଯୋଗେ ଭେଜାଙ୍ଗିୱାଡା ପଞ୍ଚାୟତ ବଦଲିଗୁଡା ନିକଟକୁ କେନ୍ଦୁପତ୍ର ବିକ୍ରି କରିବାକୁ ଯାଇଥିଲେ। ସେଠାରୁ ବିକ୍ରି ସାରି ଗ୍ରାମକୁ ଫେରୁଥିବା ସମୟରେ ଭ୍ୟାନ୍ଟି ଭାରସାମ୍ୟ ହରାଇ ରାସ୍ତା ଉପରେ ଓଲଟି ପଡିଥିଲା। ଆହତଙ୍କୁ ଆମ୍ବୁଲାନ୍ସ ଯୋଗେ କାଲିମେଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ପ୍ରାଥମିକ ଚିକିତ୍ସା ପରେ ଆନିମେସଙ୍କ ବ୍ୟତୀତ ଅନ୍ୟ ୪ ଜଣଙ୍କୁ ଆମ୍ବୁଲାନ୍ସ ଯୋଗେ ମାଲକାନଗିରି ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଦୁର୍ଘଟଣାଗସ୍ତ ଭ୍ୟାନ୍ଟି ଏମ୍ପିଭି- ୨୯ ଗ୍ରାମର କମଲ ମଣ୍ଡଳଙ୍କର ବୋଲି ଜଣାପଡିଛି। କାଲିମେଳା ପୋଲିସ ଗାଡି ଜବତ କରି ଘଟଣାର ତଦନ୍ତ ଆରମ୍ଭ କରିଛି।
