ଆନନ୍ଦପୁର,୨୪।୬(ସ୍ବ.ପ୍ର.): କ୍ଷମତାଠାରୁ ଅଧିକ ଛାତ୍ରୀଛାତ୍ରଙ୍କୁ ନେଇ ଯାଉଥିବା ଦୁଇଟି ସ୍କୁଲ ବସ୍କୁ ଘସିପୁରା ପୋଲିସ ଜବତ କରିଛି। ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶଙ୍କ ନିର୍ଦ୍ଦେଶ କ୍ରମେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଗୁରୁବାର ମନ୍ତ୍ରୀ ଦାଶଙ୍କ କେନ୍ଦୁଝର ଜିଲା ଗସ୍ତ ସମୟରେ ଏଭଳି ନିୟମ ଉଲ୍ଲଘଂନ କରାଯାଇ ପିଲାମାନଙ୍କୁ ବିପଦ ସଙ୍କୁଳ ଭାବେ ନିଆଯାଉଥିବା ଦୃଷ୍ଟିକୁ ଆସିଥିଲା। ସୂଚନା ଅନୁଯାୟୀ, ଗଣଶିକ୍ଷା ମନ୍ତ୍ରୀ ଦାଶ ୪ ଦିନିଆ କେନ୍ଦୁଝର ଜିଲା ଗସ୍ତରେ ଯାଉଥିବା ବେଳେ ଆନନ୍ଦପୁରସ୍ଥିତ ପ୍ରାଣବଲ୍ଲଭ ପବ୍ଲିକ୍ ସ୍କୁଲର ଦୁଇଟି ବସ୍ ୨୦ନଂ. ଜାତୀୟ ରାଜପଥରେ ଯାଉଥିବା ଦେଖିବାକୁ ପାଇଥିଲେ। ଏଥିରେ କ୍ଷମତାଠାରୁ ଅଧିକ ଛାତ୍ରୀଛାତ୍ର ଯାଉଥିବା ଜାଣି ମନ୍ତ୍ରୀ ବସ୍ ଦୁଇଟିକୁ ଅଟକାଇଥିଲେ। ବସ୍ ମଧ୍ୟରେ ଉପସ୍ଥିତ ଥିବା ଶିକ୍ଷୟିତ୍ରୀଙ୍କୁ ଡାକି ତାଗିଦ୍ କରିବା ସହିତ ସ୍କୁଲର ନାମ ପଚାରି ବୁଝିଥିଲେ। ବସ୍ ମଧ୍ୟରେ ଖୁନ୍ଦାଖୁନ୍ଦି ଓ ଠିଆ ହୋଇ ପିଲାମାନେ ପଢ଼ିବାକୁ ଯାଉଥିବାରୁ ପିଲାମାନେ କ’ଣ ଲଗେଜ୍ ବୋଲି ମନ୍ତ୍ରୀ ପ୍ରଶ୍ନ କରିଥିଲେ। ପରେ ମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଘସିପୁରା ପୋଲିସ ପହଞ୍ଚି ବସ୍ ଦୁଇଟିକୁ ଜବତ କରିଥିଲା। ବସ୍ ଦୁଇଟିକୁୁ ଥାନାରେ ଅଟକ ରଖାଯାଇଛି। କାଗଜପତ୍ର ଯାଞ୍ଚ ପରେ ଯାହା କିଛି ପଦକ୍ଷେପ ନିଆଯିବ ବୋଲି ଥାନା ଅଧିକାରୀ ଘନଶ୍ୟାମ ବେହେରା କହିଛନ୍ତି।