ସୁନ୍ଦରଗଡ଼, ୩।୩ (ଡି.ଏନ୍.ଏ.): ୟୁକ୍ରେନ୍ରେ ଡାକ୍ତରୀ ପଢୁଥିବା ସୁନ୍ଦରଗଡ଼ ଜିଲାର ୨ ଛାତ୍ରୀଛାତ୍ର ବୁଧବାର ଘରକୁ ଫେରିଛନ୍ତି। ସେମାନେ ହେଲେ ସୁନ୍ଦରଗଡ ଜିଲା କିଞ୍ଜିରିକେଲା ସ୍ବାସ୍ଥ୍ୟକେନ୍ଦ୍ରର ଅଧିକାରୀ ଡା. ଫ୍ରାଙ୍କଲିନ୍ କୁଜୁରଙ୍କ କନ୍ୟା ସ୍ମିତି କୁଜୁର ଓ ରାଉରକେଲାର ସାକିତ ସୋହେବ ଖାନ୍। ସ୍ମିତି ଘରକୁ ଫେରିବା ପରେ ତାଙ୍କର ଅନୁଭୂତି ସମ୍ପର୍କରେ କହିଥିଲେ। ସେ ଗତ ଜାନୁୟାରୀ ୨୬ରେ ଡାକ୍ତରୀ ପାଠ ପଢିିବା ପାଇଁ ୟୁକ୍ରେନ୍ ଯାଇଥିଲେ। ୟୁକ୍ରେନ୍ସ୍ଥିତ ୟୁଜରୋଡ୍ ନ୍ୟାଶନାଲ ୟୁନିଭର୍ସିଟିରେ ପ୍ରଥମ ବର୍ଷ ଡାକ୍ତରୀ ଛାତ୍ରୀ ଭାବେ ନାମ ଲେଖାଇଥିଲେ। ସେଠାକାର ପରିବେଶରେ ଖାପଖୁଆଇ ପାଠପଢିବା ଆରମ୍ଭ କରିବା ସମୟରେ ହଠାତ୍ ୟୁକ୍ରେନ୍ ଏବଂ ରୁଷିଆ ଯୁଦ୍ଧ ସମ୍ପର୍କରେ ଜାଣିବାକୁ ପାଇଥିଲେ। ସେମାନେ ୟୁକ୍ରେନ୍ର ପଶ୍ଚିମ ପଟରେ ରହୁଥିବାବେଳେ ପୂର୍ବ ଭାଗରେ ଏହି ଯୁଦ୍ଧ ହେଉଥିବାରୁ ପ୍ରଥମେ ଆଶ୍ୱସ୍ତ ରହିଥିଲେ। ହଠାତ୍ ଯୁଦ୍ଧର ବିଭୀଷିକା ବୃଦ୍ଧି ପାଇ ୟୁକ୍ରେନ୍ର ବିଭିନ୍ନ ସହର ଉପରେ ରୁଷୀୟ ସୈନ୍ୟଙ୍କର ଅତର୍କିତ ଆକ୍ରମଣ ଖବର ଜଣାପଡିବା ପରେ ଭୟଭୀତ ହୋଇପଡିଥିଲେ ବୋଲି କହିଛନ୍ତି ସ୍ମିତି। ଏହି ୟୁନିଭର୍ସିଟିରେ ୬ବର୍ଷିଆ ଡାକ୍ତରୀ ପାଠ୍ୟକ୍ରମରେ ପ୍ରଥମବର୍ଷରୁ ପିଜି ପର୍ଯ୍ୟନ୍ତ ପ୍ରାୟ ୬୦୦ ଭାରତୀୟ ଛାତ୍ରୀଛାତ୍ର ଅଧ୍ୟୟନ କରିଥାନ୍ତି। ଯୁଦ୍ଧ ଯୋଗୁ ଭାରତୀୟ ଛାତ୍ରୀଛାତ୍ର ଦେଶକୁ ଫେରିବା ପାଇଁ ବିମାନ ଟିକେଟ କରିବାକୁ ଆରମ୍ଭ କରିଦେଇଥିଲୁ। ହେଲେ ବିମାନ ଭଡା ଆଶାତୀତ ଭାବେ ବୃଦ୍ଧି ପାଇ ୧ଲକ୍ଷ ଟଙ୍କାରେ ପହଞ୍ଚତ୍ଥିଲା। ଆଶାଆଶଙ୍କା ଭିତରେ ଥିବାବେଳେ ଭାରତୀୟ ଦୂତାବାସ ପକ୍ଷରୁ ଆମକୁ ଭାରତ ଫେରାଇ ଆଣିବାର ବ୍ୟବସ୍ଥା କରାଯାଇଥିଲା। ଆମ ୟୁନିଭର୍ସିଟିକୁ ଭାରତ ଦୂତାବାସ ପକ୍ଷରୁ ୫ଟି ବସ ପଠାଯାଇଥିଲା। ପ୍ରାୟ ୨୪୦ ଭାରତୀୟ ଛାତ୍ରୀଛାତ୍ର ଓ ୟୁନିଭର୍ସିିଟିରେ କାର୍ଯ୍ୟରତ ଭାରତର ଅଧ୍ୟାପକ ଏହି ବସ୍ରେ ଆସିଥିଲେ। ପ୍ରାୟ ଅଧଘଣ୍ଟାର ବସ୍ ଯାତ୍ରା ପରେ ଆମେ ହଙ୍ଗେରି ସୀମାରେ ପହଞ୍ଚତ୍ଥିଲୁ। ସେଠାରେ ସକାଳ ସାଢେ ୯ଟାରୁ ସନ୍ଧ୍ୟା ସାଢେ ୫ଟା ପର୍ଯ୍ୟନ୍ତ ଭିସା, ପାସପୋର୍ଟ ଆଦି ଆନୁଷଙ୍ଗିକ ଯାଞ୍ଚ ସକାଶେ ଆମେ ବସ୍ ମଧ୍ୟରେ ଅଟକି ରହିଥିଲୁ। ୟୁକ୍ରେନ୍ ଏବଂ ହଙ୍ଗେରି ସୀମାରେ ଦୀର୍ଘ ୧୦ରୁ ୧୧ଘଣ୍ଟାର ସମୟରେ ଭୟ ଓ ଅନିଶ୍ଚିତତା ମଧ୍ୟରେ ସ୍ବଦେଶକୁ ଫେରି ପାରିବୁ କି ନାହିଁ ସେ ଆଶା ମଉଳି ଯାଇଥିଲା। ୧୧ଘଣ୍ଟା ପରେ ଆମକୁ ବସ୍ ନେଇ ହଙ୍ଗେରିର ବୁଦାପେଷ୍ଟ ଏୟାରପୋର୍ଟରେ ପହଞ୍ଚତ୍ଥିଲା। ୨୮ତାରିଖ ସକାଳ ସାଢେ ୮ଟାରୁ ବିମାନ ଯୋଗେ ଆସି ଦିଲ୍ଲୀ ଏୟାର ପୋର୍ଟରେ ପହଞ୍ଚତ୍ଥିଲୁ। ସେଠାରୁ ଆମ ଓଡିଶାର ଛାତ୍ରୀଛାତ୍ରଙ୍କୁ ଓଡିଶା ଭବନକୁ ନିଆଯାଇଥିଲା। ମୁଁ ରାଉକେଲାର ଛାତ୍ରଙ୍କ ସହ ଦିଲ୍ଲୀରୁ ବିମାନ ଯୋଗେ ଆସି ଝାରସୁଗୁଡା ବୀର ସୁରେନ୍ଦ୍ର ସାଏ ବିମାନବନ୍ଦରରେ ପହଞ୍ଚତ୍ଥିଲୁ। ସେଠାରେ ସମ୍ବଲପୁର ଗୋଶାଳାରେ ଶିକ୍ଷକତା କରୁଥିବା ମିନୁ କୁଜୁର, ବାପା ଫ୍ରାଙ୍କଲିନ୍ କୁଜୁରଙ୍କ ସମେତ ପରିବାରବର୍ଗ ଆମକୁ ସ୍ବାଗତ କରିଥିଲେ। ନିଜ ଘରକୁ ଫେରିବା ପରେ ବେଶ୍ ଖୁସି ଏବଂ ଆଶ୍ୱସ୍ତି ଅନୁଭବ କରୁଥିବା କହିଛନ୍ତି ସ୍ମିତି। ଏଥିପାଇଁ ସେ ଭାରତ ସରକାର, ଓଡିଶା ସରକାରଙ୍କ ଉଦ୍ୟମକୁ ପ୍ରଶଂସା କରିବା ସହ କୃତଜ୍ଞତା ଜଣାଇଛନ୍ତି। ଏଥିସହ ୟୁକ୍ରେନ୍ରେ ଥିବା ଭାରତୀୟ ଛାତ୍ରୀଛାତ୍ରଙ୍କୁ ତୁରନ୍ତ ଫେରାଇ ଆଣିବାକୁ ସେ ନିବେଦନ କରିଛନ୍ତି।