ଓ୍ବାଶିଂଟନ,୫।୪: ୟୁକ୍ରେନ୍ ଉପରେ ରୁଷିଆ ଆକ୍ରମଣ ୪୦ ଦିନରେ ପହଞ୍ଚତ୍ଛି। ଇତିମଧ୍ୟରେ ୟୁକ୍ରେନ୍ ରାଜଧାନୀ କିଭ୍ ନିକଟରୁ ମସ୍କୋ ତା’ର ଦୁଇତୃତୀୟାଂଶ ସୈନ୍ୟ ପ୍ରତ୍ୟାହାର କରିନେଲାଣି ବୋଲି ଆମେରିକା ପ୍ରତିରକ୍ଷା ବିଭାଗର ଜଣେ ବରିଷ୍ଠ ଅଧିକାରୀ ସୋମବାର କହିଛନ୍ତି। ଉକ୍ତ ସୈନ୍ୟଙ୍କୁ ବେଲାରୁଷରେ ରଖାଯାଇଛି। କିଭ୍ ଚତୁଃପାର୍ଶ୍ୱର ସମସ୍ତ ଅଞ୍ଚଳ ସମେତ ରାଜଧାନୀକୁ ସମ୍ପୂର୍ଣ୍ଣ ନିୟନ୍ତ୍ରଣକୁ ନେଇଥିବା ୟୁକ୍ରେନ୍ ସେନା କହିଛି। ଏବେବି ୟୁକ୍ରେନ୍ରେ ରୁଷିଆର ୧୨୫ ବାଟାଲିୟନରୁ ଅଧିକ ସୈନ୍ୟ ଅଛନ୍ତି। କିଭ୍ରୁ ଫେରାଇ ନେଇଥିବା ସୈନ୍ୟଙ୍କୁ ମସ୍କୋ ପୂର୍ବ ୟୁକ୍ରେନ୍କୁ ପଠାଇପାରେ ବୋଲି ଆମେରିକା ପ୍ରତିରକ୍ଷା ଅଧିକାରୀ କହିଛନ୍ତି।
କିଭ୍ ନିକଟବର୍ତ୍ତୀ ବୁଚା ସହରରୁ ରୁଷିଆ ସୈନ୍ୟ ହଟିଯିବା ପରେ ସେଠାର ରାସ୍ତାଘାଟରେ ମାଳମାଳ ମୃତଦେହ ପଡ଼ିଥିବା ଦେଖାଯାଇଛି। ଶହ ଶହ ନିରୀହ ଲୋକଙ୍କୁ ଉଦ୍ଦେଶ୍ୟମୂଳକ ଭାବେ ରୁଷିଆ ସୈନ୍ୟ ହତ୍ୟା କରିଥିବା ୟୁକ୍ରେନ୍ ଅଭିଯୋଗ କରୁଥିବାବେଳେ ରୁଷିଆ ପକ୍ଷରୁ ଏହାକୁ ଖଣ୍ଡନ କରାଯାଇଛି। ଏହା ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ। ମୃତ୍ୟୁ ଘଟଣାର ତଦନ୍ତ ଲାଗି ରୁଷିଆର ତଦନ୍ତକାରୀ କମିଟି ମୁଖ୍ୟ ଆଲେକଜାଣ୍ଡାର ବାଷ୍ଟ୍ରିକିନ୍ ନିର୍ଦ୍ଦେଶ ଦେଇଛନ୍ତି। ସୋମବାର ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ବୁଚା ଗସ୍ତ କରିଛନ୍ତି। ସେ ସେଠାର ସ୍ଥିତି ଅନୁଧ୍ୟାନ କରିବା ସହ ଏହି ଗଣହତ୍ୟା ପାଇଁ ବିଶ୍ୱ ରୁଷିଆକୁ ଦାୟୀ କରୁ ବୋଲି କହିଛନ୍ତି।
ରୁଷିଆର ନରସଂହାର ଶାନ୍ତି ଆଲୋଚନାକୁ ଜଟିଳ କରିଥିବା ସେ ପ୍ରକାଶ କରିଛନ୍ତି। ବୁଚା ଗଣହତ୍ୟା ପାଇଁ ଆମେରିକା ରାଷ୍ଟ୍ରପତି ଜୋ ବାଇଡେନ୍ ରୁଷିଆ ପ୍ରତିପକ୍ଷ ଭ୍ଲାଡିମିର ପୁଟିନ୍ଙ୍କୁ ଦାୟୀ କରି ତାଙ୍କୁ ଯୁଦ୍ଧ ଅପରାଧୀ କହିଛନ୍ତି। ଏଥିସହ ପୁଟିନ୍ଙ୍କ ବିରୋଧରେ ଓ୍ବାର କ୍ରାଇମ୍ ଟ୍ରାଏଲ ଚାଲିବା ଉଚିତ ବୋଲି ବାଇଡେନ୍ ପ୍ରକାଶ କରିଛନ୍ତି। ଜାତିସଂଘ ମାନବାଧିକାର ପରିଷଦରୁ ରୁଷିଆକୁ ନିଲମ୍ବନ କରିବାକୁ ଜାତିସଂଘରେ ଆମେରିକାର ରାଷ୍ଟ୍ରଦୂତ ଲିଣ୍ଡା ଥୋମାସ୍-ଗ୍ରୀନ୍ଫିଲ୍ଡ ଆହ୍ବାନ ଦେଇଛନ୍ତି।