ଖୋର୍ଦ୍ଧା ଅଫିସ,୩।୧୦: ଦୁଇ ବର୍ଷ ପରେ ଜଣେ ନାବାଳକ ତାଙ୍କ ମା’ଙ୍କ କୋଳକୁ ଫେରିଛନ୍ତି। ହଜିଯାଇଥିବା ପୁଅକୁ ଫେରିପାଇ ପରିବାରଲୋକଙ୍କ ମଧ୍ୟରେ ଖୁସିର ଲହରି ଖେଳିଯାଇଛି। ସୂଚନା ଅନୁଯାୟୀ, ୨୦୧୮ ମେ’ ମାସରେ ବାଣପୁର ବଜାରରୁ ସ୍ଥାନୀୟ ପୋଲିସ ଜଣେ ୮ବର୍ଷର ବାଳକଙ୍କୁ ଉଦ୍ଧାର କରି ଜିଲା ଶିଶୁ ମଙ୍ଗଳ କମିଟି(ସିଡବ୍ଲ୍ୟୁସି) ନିକଟରେ ହାଜର କରିଥିଲେ। ସିଡବ୍ଲ୍ୟୁସିର ନିର୍ଦ୍ଦେଶକ୍ରମେ ତାଙ୍କୁ ଭୁବନେଶ୍ୱରର ଶିଶୁ ଯତ୍ନ ଅନୁଷ୍ଠାନକୁ ପଠାଯାଇଥିଲା। ସେଠାରେ ନାବାଳକଙ୍କ ପରିବାର ସମ୍ପର୍କରେ ଜାଣିବା ଲାଗି ସଂସ୍ଥା ଏବଂ ଜିଲା ଶିଶୁ ସୁରକ୍ଷା ୟୁନିଟ(ଡିସିପିୟୁ) ପକ୍ଷରୁ କାଉନସିଲିଂ କରାଯାଇଥିଲେ ମଧ୍ୟ ସେ ଘର ଠିକଣା ଦେଇପାରି ନ ଥିଲା। କେବଳ ତାର ନାମ ବବ୍ଲୁ ଏବଂ ମା’ଙ୍କ ନାମ ଲକ୍ଷ୍ମୀ ମୁଣ୍ଡା ବୋଲି କହିଥିଲେ। ଜିଲା ଶିଶୁ ସୁରକ୍ଷା ଅଧିକାରୀ(ଡିସିପିଓ) ବାଣୀଶ୍ରୀ ପଟ୍ଟନାୟକ କହିଛନ୍ତି, ପ୍ରକୃତ ଘର ଠିକଣା ନ ମିଳିବାରୁ ବବୁଲୁଙ୍କୁ ପୋଷ୍ୟ ସନ୍ତାନଭାବେ ଗ୍ରହଣ କରିବାକୁ ଡିସିପିଓ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଥିଲା। ପୁଣି ଥରେ ପରିବାର ସମ୍ପର୍କରେ ଜାଣିବା ଲାଗି ଯୋଗାଯୋଗ କରାଯାଇଥିଲା। ଉକ୍ତ ସମୟରେ ବବୁଲୁ ସମ୍ବଲପୁର ଜିଲା ଧନୁପାଲ୍ଲୀ ଥାନା ଅଧୀନ ସୁନାପାଲି ଗଁାର ବୋଲି କହିଥିଲେ। ଅନ୍ୟପଟେ ବବୁଲୁ ନିଖୋଜ ଥିବା ନେଇ ପରିବାରଲୋକେ ସ୍ଥାନୀୟ ଥାନାରେ ଏତଲା ଦେଇଥିଲେ। ଏନେଇ ପ୍ରଶାସନ ପକ୍ଷରୁ ଧନୁପାଲି ଥାନା ସହିତ ଯୋଗାଯୋଗ କରାଯାଇଥିଲା। ପୋଲିସ ଲକ୍ଷ୍ମୀଙ୍କ ସହିତ ଭିଡିଓ କନଫେରନ୍ସି ମାଧ୍ୟମରେ ବବ୍ୁଲୁଙ୍କ ସାକ୍ଷାତ କରାଇଥିଲେ। ମା’ଙ୍କ ପାଖକୁ ଆସିବା ପାଇଁ ବବୁଲୁ ବ୍ୟାକୁଳ ହୋଇ ଉଠିଥିଲା। ପ୍ରଶାସନ ପକ୍ଷରୁ ବବୁଲୁଙ୍କୁ କାର ଯୋଗେ ନିଆଯାଇ ସମ୍ବଲପୁର ସିଡବ୍ଲ୍ୟୁସିକୁ ହସ୍ତାନ୍ତିରତ କରାଯାଇଛି। ସେଠାରେ ଆଇନ୍ ଅନୁଯାୟୀ ପ୍ରକ୍ରିୟା ସରିବା ପରେ ବବୁଲୁ ନିଜ ଘରକୁ ଫେରିପାରିବେ ବୋଲି ବୋଲି ଡିସିପିଓ ପଟ୍ଟନାୟକ କହିଛନ୍ତି।