ବାଲିକୁଦା/ଆଳି,୫ା୭(ସ୍ବ.ପ୍ର./ଡି.ଏନ୍.ଏ.):ଅନ୍ଲାଇନ୍ ଗେମ୍ରେ ଟଙ୍କା ରୋଜଗାର ନିଶାରେ ପଢ଼ିଯାଉଛନ୍ତି ଯୁବପିଢ଼ି। ଏହି ନିଶା କେବଳ ସହର ନୁହେଁ, ଗ୍ରାମାଞ୍ଚଳର ଯୁବକମାନଙ୍କୁ ମଧ୍ୟ ଗ୍ରାସିଛି। ପ୍ରଥମେ ମିଳୁଥିବା ଲାଭକୁ ଦେଖି ପରିବାର ଅଜାଣତରେ ବିପୁଳ ଟଙ୍କା ସେଥିରେ ବିନିଯୋଗ କରି ହରାଇ ଦେଉଛନ୍ତି। ଶେଷରେ ହତାଶ ହୋଇ ଆତ୍ମହତ୍ୟା ଭଳି ଚରମ ପଦକ୍ଷେପ ନେଉଛନ୍ତି। ଏଭଳି ୨ଟି ଘଟଣା ସୋମବାର ଜଗତ୍ସିଂହପୁର ଏବଂ କେନ୍ଦ୍ରାପଡ଼ା ଜିଲାରେ ଘଟିଛି। ୨୨ରୁ ୨୫ ବର୍ଷୀୟ ୨ ଜଣ ଯୁବକ ଜୀବନ ହାରିଦେଇଛନ୍ତି। ସେମାନେ ହେଲେ ଜଗତ୍ସିଂହପୁର ଜିଲା ବାଲିକୁଦା ଥାନା ଅନନ୍ତପୁର ଫାଣ୍ଡି ଅଧୀନ ଭୁଆସୁଣୀ ଗଁାର ଭଗବାନ ପରିଡ଼ାଙ୍କ ବଡ଼ ପୁଅ ଦେବେନ୍ଦ୍ର (୨୫) ଏବଂ କେନ୍ଦ୍ରାପଡ଼ା ଜିଲା ଆଳି ଥାନା ଅନ୍ତର୍ଗତ ମାନପୁର ଗଁାର ଆଶିଷ କୁମାର ଦାସ(୨୨)। ଦେବେନ୍ଦ୍ରଙ୍କ ବାପା ଭଗବାନ ଜଣେ ଧାନ ଓ ମୁଗ ବ୍ୟବସାୟୀ। ତାଙ୍କ ବ୍ୟବସାୟର ସବୁ ଟଙ୍କା ଦେବେନ୍ଦ୍ରଙ୍କ ଆକାଉଣ୍ଟରେ ରୁହେ। ଉକ୍ତ ଆକାଉଣ୍ଟରେ ପ୍ରାୟ ୪ ଲକ୍ଷ ଟଙ୍କା ଥିଲା।
ଦେବେନ୍ଦ୍ର କିଛି ଦିନ ତଳେ ନିଜ ମୋବାଇଲରେ ଏକ ଅନ୍ଲାଇନ ଗେମ୍ ଖେଳିବା ଆରମ୍ଭ କରିଥିଲେ। ଇତିମଧ୍ୟରେ ସବୁ ଟଙ୍କା ହରାଇ ଦେବା ପରେ ସେ ଉଦାସ ରହୁଥିଲେ। ପରିବାର ଲୋକେ ତାଙ୍କୁ ପଚରାଉଚରା କରିବା ପରେ ସେ ସବୁ କଥା ମାନି ଯାଇଥିଲେ। ଏହା ଶୁଣି ପରିବାର ସଦସ୍ୟ ବିରକ୍ତ ହୋଇଥିଲେ। ରବିବାର ରାତିରେ ଦେବେନ୍ଦ୍ର ଖାଇସାରି ଶୋଇବାକୁ ଯାଇଥିଲେ। ସୋମବାର ସକାଳେ ସେ ଘର କବାଟ ଖୋଲି ନ ଥିଲେ। ପରିବାର ଲୋକେ କବାଟ ଭାଙ୍ଗିବା ପରେ ତାଙ୍କୁ ପଙ୍ଖାରେ ଝୁଲନ୍ତା ଅବସ୍ଥାରେ ପାଇଥିଲେ ବୋଲି ଭଗବାନ ବାଲିକୁଦା ଥାନାରେ କରିଥିବା ଅଭିଯୋଗରେ ଦର୍ଶାଇଛନ୍ତି। ଏନେଇ ଏକ ଅପମୃତ୍ୟୁ ମାମଲା (ନଂ. ୧୦/୨୨) ରୁଜୁ ହୋଇଛି।
ସେହିପରି ଆଶିଷ ସୋମବାର ମୋବାଇଲରେ ଅନ୍ଲାଇନ ଗେମ୍ ଖେଳୁଥିଲେ। ଏଥିରେ ସେ ୧୦ହଜାର ଟଙ୍କା ହାରିଯିବାରୁ ମ୍ରିୟମାଣ ହୋଇ ଫ୍ୟାନ୍ରେ ଗାମୁଛା ଲଗାଇ ଝୁଲିପଡିଥିଲେ। ଆଶିଷଙ୍କ ଦାଦା ରାଜକିଶୋର ଥାନାରେ ଏନେଇ ଏତଲା ଦେଇଛନ୍ତି। ସୂଚନା ଅନୁଯାୟୀ, ଆଶିଷ ଅପରାହ୍ନ ପ୍ରାୟ ୫ଟାରେ ନିଜ ଶୋଇବା ରୁମ୍ ଭିତର ପଟୁ କବାଟ ବନ୍ଦ କରିଦେଇଥିଲେ। ପରିବାର ଲୋକେ ତାଙ୍କୁ ଡାକିଥିଲେ ମଧ୍ୟ ସେ କୌଣସି ଉତ୍ତର ଦେଇ ନ ଥିଲେ। ରାଜକିଶୋର ପଡ଼ୋଶୀଙ୍କ ସହାୟତାରେ କବାଟ ଭାଙ୍ଗି ରୁମ୍ ଭିତରକୁ ଯିବାବେଳକୁ ଆଶିଷ ଫ୍ୟାନ୍ରେ ଝୁଲୁଥିଲେ। ତାଙ୍କୁ ତୁରନ୍ତ ଆଳି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ପୋଲିସ ଏକ ଅପମୃତ୍ୟୁ ମାମଲା (ନଂ.୩୬/୨୨) ରୁଜୁ କରିଛି।