ଗୋପାଳପୁର,୧୭।୧୧(ନବୀନ ରାଜ ଆଚାରୀ) ବାଣ ଚୋରି କରିବା ଅଭିଯୋଗରେ ଶୁକ୍ରବାର ଗୋଳନ୍ଥରା ଥାନା ପୋଲିସ ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତମାନେ ହେଲେ ବି ନୂଆଗାଁ ଗ୍ରାମର ଭିକାରି ଦାସ(୨୦), ପ୍ରଦୀପ ଦାସ (୨୧)ବୋଲି ଜଣାପଡିଛି ।
ସୂଚନା ଅନୁସାରେ, ଏହି ଥାନା ଅଧିନସ୍ଥ କନିସି ହାଟ ଗ୍ରାମ ଚିରଞ୍ଜିବି ଦଳେଇ ବାଣକୁ ଏକ ଘରେ ରଖିଥିଲେ । ଗତ ୯ ତାରିଖ ରାତିରେ ଚାରି ଜଣ ଦୁର୍ବୃତ୍ତ ଚାବି ତାଡି ବାଣ ଚୋରି କରି ଚମ୍ପଟ ମାରିଥିଲେ । ପରଦିନ ଚିରଞ୍ଜିବି ୪୦ହାଜର ଟଙ୍କାର ବାଣ ଚୋରି ହୋଇଥିବା ନେଇ ଜାଣିବାକୁ ପାଇଥିଲେ । ଏ ନେଇ ଗୁରୁବାର ଦିନ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଥିଲେ । ଥାନା କେଶ ନ ୫୮୭/୨୩ ପ୍ରକାରେ ପୋଲିସ ମାମଲା ରୁଜୁ କରି ତଦନ୍ତ କରି ଅଭିଯୁକ୍ତ ମାନଙ୍କୁ ଚିହ୍ନଟ କରିଛି । ଶୁକ୍ରବାର ଏକ ପୋଲିସ ଟିମ ବି ନୂଆଗାଁ ଗ୍ରାମରେ ଚଢାଉ କରି ଭିକାରି ଓ ପ୍ରଦୀପକୁ କାବୁ କରିଛି । ଉଭୟଙ୍କୁ ଥାନାରେ ଅଟକ ରଖି ପଚାର ଉଚରା କରିବା ସମୟରେ ସେମାନେ ଏକ ବୁଦା ନିକଟରେ ଚୋରି ବାଣକୁ ଲୁଚେଇ ରଖିଥିବା କହିଛନ୍ତି । ସେଠାକୁ ଯାଇ ପୋଲିସ ବାଣ ଜବତ କରିଛି । ଭିକାରି ଓ ପ୍ରଦୀପକୁ ସାରେ ପୋଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ଅନ୍ୟ ଦୁଇ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଥାନା ଅଧିକାରୀ ବିବେକାନନ୍ଦ ମହନ୍ତ ସୂଚନା ଦେଇଛନ୍ତି ।
