ତାଇପେଇ,୪।୧୦ : ନିକଟରେ ଟାଇଫୁନ ହାଇକୁଇ ତାଇୱାନରେ ତାଣ୍ଡବ ରଚିଥିଲା। ଏବେ ପୁଣି ସରକାରଙ୍କ ପକ୍ଷରୁ ଏକ ସତର୍କ ସୂଚନା ଜାରି କରାଯାଇଛି। ତାଇୱାନର କିଛି ଅଞ୍ଚଳରେ ବିମାନ ଉଡ଼ାଣ ବାତିଲ କରାଯାଇଛି। ଏହା ସହିତ ସ୍କୁଲ କଲେଜ ଗୁଡ଼ିକ ମଧ୍ୟ ବନ୍ଦ ରଖାଯାଇଛି। ଏହାର କାରଣ ହେଉଛି ଟାଇଫୁନ କୋଇନୁ ତାଇଓ୍ବାନ ମୁହାଁ ହୋଇଛି।
ବେସାମରିକ ବିମାନ ଚଳାଚଳ ପ୍ରଶାସନ ଅନୁଯାୟୀ ବୁଧବାର ଦ୍ୱୀପପୁଞ୍ଜର ବିମାନବନ୍ଦରରେ ୯୩ ବିମାନ ଉଡାଣ ବାତିଲ କରାଯାଇଛି। ସେଣ୍ଟ୍ରାଲ ନ୍ୟୁଜ ଏଜେନ୍ସି ଅନୁଯାୟୀ ସାମୁଦ୍ରିକ ବନ୍ଦର ଏବଂ ବନ୍ଦର ବ୍ୟୁରୋ କହିଛି ୯୬ଟି ଫେରି ଯାତ୍ରା ବାତିଲ କରାଯାଇଛି।
ପାଣିପାଗ ବିଜ୍ଞାନୀଙ୍କ ଅନୁଯାୟୀ ବୁଧବାର ରାତି କିମ୍ବା ଗୁରୁବାର ସକାଳେ ତାଇୱାନର ଦକ୍ଷିଣ-ପୂର୍ବ ଭାଗରେ ଏହି ଝଡ଼ ଆସିପାରେ। ବୁଧବାର ଦିନ ଉତ୍ତର ଏବଂ ପୂର୍ବ ତାଇୱାନରେ ବର୍ଷା ହେଉଛି। ଏହା ପରେ ପୂର୍ବ ଉପକୂଳ ଏବଂ ଦକ୍ଷିଣରେ ମଧ୍ୟ ପ୍ରବଳ ବର୍ଷା ହେବାର ଆଶଙ୍କା ରହିଛି।
ତାଇୱାନର ସୁଦୂର ପେଙ୍ଗୁ, ଅର୍କିଡ ଏବଂ ଗ୍ରୀନ ଦ୍ୱୀପପୁଞ୍ଜରେ ଟାଇଫୁନ ଯୋଗୁଁ ଖରାପ ପାଗ ଆଶଙ୍କା ଥିବାରୁ ସ୍କୁଲ କଲେଜଏବଂ ଅଫିସ ବନ୍ଦ କରିବାକୁ ଘୋଷଣା କରାଯାଇଛି।
ଦକ୍ଷିଣ ପିଙ୍ଗଟଙ୍ଗ ଜିଲାର କିଛି ଅଂଶରେ ମଧ୍ୟ ବନ୍ଦ ଘୋଷଣା ହୋଇଛି। ତାଇୱାନର ପାଣିପାଗ ବ୍ୟୁରୋ ଅନୁଯାୟୀ, ବୁଧବାର ସକାଳେ ଟାଇଫୁନ ପଶ୍ଚିମ ତାଇୱାନ ଆଡ଼କୁ ଗତି କରୁଥିଲା।
ଚାଇନାର ଜାତୀୟ ପାଣିପାଗ କେନ୍ଦ୍ର ବୁଧବାର ଦିନ ଟାଇଫୁନ କୋଇନୁ ପାଇଁ ୟେଲୋ ସତର୍କ ସୂଚନା ଜାରି କରିଛି।
ଜେଜିଆଙ୍ଗ ଏବଂ ଫୁଜିଆନ ପ୍ରଦେଶର ଉପକୂଳବର୍ତ୍ତୀ ଅଞ୍ଚଳରେ ପ୍ରବଳ ପବନ ପ୍ରବାହିତ ହେବ, ଯେଉଁଠାରେ ଫେରି ସେବା ସ୍ଥଗିତ ରହିଛି ଏବଂ ମତ୍ସ୍ୟଜୀବୀ ଡଙ୍ଗାଗୁଡ଼ିକୁ ବନ୍ଦରକୁ ଫେରାଇ ଅଣାଯାଇଛି।
