ଆଣ୍ଟିଗୁଆ, ୩୦।୧- ଭାରତ ଚଳିତ ଆଇସିସି ୧୯ ବର୍ଷରୁ କମ୍ କ୍ରିକେଟ ବିଶ୍ୱକପ ସେମିଫାଇନାଲରେ ପ୍ରବେଶ କରିଛି। ଶୁକ୍ରବାର ଅନୁଷ୍ଠିତ କ୍ୱାର୍ଟର ଫାଇନାଲରେ ଭାରତ ୫ ଉଇକେଟରେ ବାଂଲାଦେଶକୁ ପରାସ୍ତ କରିଛି। ବୋଲରଙ୍କୁ ସୁହାଉଥିବା ପିଚ୍ରେ ବାଂଲାଦେଶ ୩୭.୧ ଓଭରରେ ୧୧୧ ରନକରି ଅଲ୍ଆଉଟ ହୋଇଥିଲା। ଭାରତ ୩୦.୫ ଓଭରରେ ୫ ଉଇକେଟ ହରାଇ ୧୧୭ ରନ ସଂଗ୍ରହ କରି ନେଇଥିଲା। ୧୧୨ ରନ ବିଜୟ ଲକ୍ଷ୍ୟନେଇ ବ୍ୟାଟିଂ କରିଥିବା ଭାରତ ବିନା ସ୍କୋରରେ ଓପନର ହର୍ନୁର ସିଂଙ୍କ ଉଇକେଟ ହରାଇ ବିପଦରେ ପଡ଼ିଥିଲା। ମାତ୍ର ଅଙ୍ଗକ୍ରିଶ୍ ରଘୁବଂଶୀଙ୍କ ଧୈର୍ଯ୍ୟପୂର୍ଣ୍ଣ ୪୪, ସେକ୍ ରଶିଦଙ୍କ ୨୬ ଓ ଅଧିନାୟକ ୟାଶ୍ ଧୁଲ୍ଙ୍କ ୨୦* ରନ ବଳରେ ବିଜୟ ଲକ୍ଷ୍ୟରେ ପହଞ୍ଚତ୍ ଯାଇଥିଲା। କୌଶଲ ଟେମ୍ବା (୧୧* ରନ) ଛକା ମାରି ଭାରତୀୟ ଇନିଂସର ପରିସମାପ୍ତି ଘଟାଇଥିଲେ। ବାଂଲାଦେଶ ପକ୍ଷରୁ ରିପନ ମଣ୍ଡଲ ୪ ଟି ଉଇକେଟ ନେଇଥିଲେ। ଭାରତ ଫେବୃୟାରୀ ୨ରେ ଦ୍ୱିତୀୟ ସେମିଫାଇନାଲରେ ଅଷ୍ଟ୍ରେଲିଆକୁ ଭେଟିବ। ୧ ତାରିଖରେ ଇଂଲଣ୍ଡ ଓ ଆଫଗାନିସ୍ତାନ ମଧ୍ୟରେ ମୁକାବିଲା ହେବ।
ଟସ୍ ଜିତି ଭାରତ ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା। ବୋଲରମାନେ ମଧ୍ୟ ଚମତ୍କାର ବୋଲିଂ କରିଥିଲେ। ଫଳରେ ବାଂଲାଦେଶ ଏକଦା ୫୬ ରନ ମଧ୍ୟରେ ୭ଟି ଉଇକେଟ ହରାଇଥିଲା। ୮ ନମ୍ବର ବ୍ୟାଟର ଏସ.ଏମ୍. ମେହେରବ ୪୮ ବଲ୍ରୁ ୩୦ (୬ ଚୌକା) ରନ କରିବାସହ ଅଷ୍ଟମ ଉଇକେଟରେ ଆସିକୁର ଜମନଙ୍କ ସହ ୫୦ ରନ ଭାଗୀଦାରି ଗଢ଼ିବାରୁ ବାଂଲାଦେଶ ସ୍କୋର ୧୦୦ ଅତିକ୍ରମ କରିଥିଲା। ଦଳ ପକ୍ଷରୁ ଇଚ୍ ମୋଲା ଦ୍ୱିତୀୟ ସର୍ବାଧିକ ୧୭ ରନ କରିଥିଲେ। ଭାରତର ରବିକୁମାର ୩ଟି, ଭିକି ଓସ୍ବାଲ ୨ଟି ଏବଂ ରାଜବର୍ଦ୍ଧନ ହାଙ୍ଗରଗେକର, କୌଶଲ ଟାମ୍ବେ ଓ ଅଙ୍ଗକ୍ରିଶ୍ ରଘୁବଂଶୀ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର:
ବାଂଲାଦେଶ ୩୭.୧ ଓଭରରେ ୧୧୧/ଅଲ୍ଆଉଟ (ମେହରବ-୩୦, ରବି କୁମାର-୩/୧୪, ଭିକି ଓସ୍ବାଲ-୨/୨୫)। ଭାରତ ୩୦.୫ ଓଭରରେ ୧୧୭/୫ (ରଘୁବଂଶୀ-୪୪, ରଶିଦ-୨୬, ଧୁଲ-୨୦*, ମଣ୍ଡଳ-୪/୩୧)।
