ଡମାସ୍କସ୍/ଓ୍ବାଶିଂଟନ, ୨୯।୬(ଆଇଏଏନ୍ଏସ୍): ଇରାକ୍ ଏବଂ ସିରିଆ ସୀମାନ୍ତ ଅଞ୍ଚଳରେ ରବିବାର ଆମେରିକା ବିମାନରୁ ବୋମାମାଡ଼ କରାଯାଇଛି। ଏହି ଆକ୍ରମଣରେ ସିରିଆ ପାର୍ଶ୍ୱରେ ଅର୍ଦ୍ଧସାମରିକ ବାହିନୀର ୫ ସଦସ୍ୟ ନିହତ ହେବା ସହ ଅନେକେ ଆହତ ହୋଇଛନ୍ତି। ଉକ୍ତ ଅଞ୍ଚଳରେ ଇରାନ ସମର୍ଥତ୍ତ ମିଲିସିଆ ଗୋଷ୍ଠୀ ବ୍ୟବହାର କରୁଥିବା ଅସ୍ତ୍ରଭଣ୍ଡାରକୁ ଟାର୍ଗେଟ କରି ବିମାନରୁ ଆକ୍ରମଣ କରାଯାଇଥିଲା ବୋଲି ପେଣ୍ଟାଗନ ପକ୍ଷରୁ କୁହାଯାଇଛି। ସିରିଆର ଦୁଇଟି ଓ ଇରାକ୍ର ଗୋଟିଏ ସ୍ଥାନରେ ଥିବା ଅସ୍ତ୍ରଭଣ୍ଡାର ଓ ଅପରେଶନାଲ ସାଇଟ୍ ଉପରେ ବୋମାମାଡ଼ ହୋଇଥିବା ପେଣ୍ଟାଗନ ପ୍ରେସ୍ ସଚିବ ଜନ୍ କିର୍ବି ଏକ ବିବୃତିରେ କହିଛନ୍ତି। ଏଥିପାଇଁ ଆମେରିକା ରାଷ୍ଟ୍ରପତି ଜୋ ବାଇଡେନ୍ ନିର୍ଦ୍ଦେଶ ଦେଇଥିବା ସେ ସୂଚନା ଦେଇଛନ୍ତି।
ବାଇଡେନ୍ କ୍ଷମତାକୁ ଆସିବାର ୬ ମାସ ମଧ୍ୟରେ କୌଣସି ଅଞ୍ଚଳ ଉପରେ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବା ଏହା ଦ୍ୱିତୀୟ ଘଟଣା। ୫ ମାସ ପୂର୍ବରୁ ଇରାକରେ ଥିବା ଆମେରିକା ସାମରିକ ଘାଟିକୁ ଇରାନ୍ ସମର୍ଥତ୍ତ ଗୋଷ୍ଠୀ ଟାର୍ଗେଟ କରିବାରୁ ପେଣ୍ଟାଗନ୍ ପକ୍ଷରୁ ଏହାର ଠିକଣା ଜବାବ ଦିଆଯାଇଥିଲା। ଫେବୃୟାରୀରେ ଆମେରିକା ପକ୍ଷରୁ ହୋଇଥିବା ଏହି ଏୟାରଷ୍ଟ୍ରାଇକ୍ରେ ଅର୍ଦ୍ଧସାମରିକ ବାହିନୀର ୧୭ ସଦସ୍ୟ ନିହତ ହୋଇଥିଲେ।