ଓ୍ବାଶିଂଟନ,୨୫।୧୦: ମହାକାଶରେ ଭିତ୍ତି ଭୂମି ବିକାଶ ପାଇଁ ଏବେ ବିଭିନ୍ନ ଦେଶ ମଧ୍ୟରେ ପ୍ରତିଯୋଗିତା ଆରମ୍ଭ ହୋଇଛି। ଚାଇନା ମହାକାଶ ଅଭିଯାନ ଜାରି ରଖିଥିବାବେଳେ ଆମେରିକା ସୈନ୍ୟ ବାହିନୀ ଚନ୍ଦ୍ର ଯାତ୍ରାକୁ ସହଜ କରିବା ଲାଗି ସୁପର ହାଇଓ୍ବେ ନିର୍ମାଣ ପାଇଁ ଯୋଜନା କରିଛି। ଏହି ହାଇଓ୍ବେ ପାର୍ଶ୍ୱରେ ମହାକାଶ ଯାନରେ ଇନ୍ଧନ ଭର୍ତ୍ତି କରିବା, ମହାକାଶଯାନ ମରାମତି ଏବଂ ଆବର୍ଜନା ପକାଇବା ଲାଗି ବ୍ୟବସ୍ଥା ମଧ୍ୟ ରହିବ। ଏହି ପ୍ରକଳ୍ପରେ ଆମେରିକୀୟ ବ୍ୟବସାୟିକ ସଂସ୍ଥା ଏବଂ ବନ୍ଧୁ ଦେଶଙ୍କୁ ସାମିଲ କରାଯିବ।
ଏକ ସେମିନାରରେ ସ୍ପେସ ଫୋର୍ସର ବ୍ରିଗେଡିୟର୍ ଜେନେରାଲ ଜନ ଓଲସନ କହିଛନ୍ତି ଯେ, ମହାକାଶରେ ବିଭିନ୍ନ ଦେଶର ଯୋଜନା ବିଶେଷ କରି ଚାଇନାର ପଦକ୍ଷେପକୁ ଦୃଷ୍ଟିରେ ରଖି ଏହି ମେଗା ପ୍ରକଳ୍ପ ଆରମ୍ଭ କରିବାକୁ ଯାଉଛୁ।
ଜେନେରାଲ ଜନ ଚାଇନାକୁ ଟାର୍ଗେଟ କରି କହିଛନ୍ତି ଯେ, ବିଶ୍ୱରେ ତଥା ମହାକାଶ ଯାତ୍ରାରେ ଇଂରାଜୀ ହେଉଛି ଅନ୍ତର୍ଜାତୀୟ ନାଗରିକ ଉଡାଣ ସଂଗଠନର ଭାଷା। ମୁଁ ବିଶ୍ୱାସ କରେ ଯେ ଏହା ପୂର୍ବଭଳି ରହିବା ଉଚିତ। ମାତ୍ର କୌଣସି ସ୍ଥଳେ ଚାଇନାର ମାନ୍ଦାରିନ ଭାଷା ହେବା ଠିକ୍ ନୁହେଁ।
ଚାଇନା ପୃଥିବୀର କକ୍ଷପଥରେ ଅନେକ କିଲୋମିଟର ଅଞ୍ଚଳରେ ’ମେଗାଷ୍ଟ୍ରକଚର’ ନିର୍ମାଣ ପାଇଁ ପ୍ରସ୍ତୁତ ହେଉଛି। ଏଠାରେ ବିଦ୍ୟୁତ ଉତ୍ପାଦନ କେନ୍ଦ୍ର, ପର୍ଯ୍ୟଟନ କମ୍ପ୍ଲେକ୍ସ, ଗ୍ୟାସ ଷ୍ଟେସନ ଠାରୁ ଆରମ୍ଭ କରି ଆଷ୍ଟରଏଡ ଖଣି ପର୍ଯ୍ୟନ୍ତ ସୁବିଧା ଉପଲବ୍ଧ ହେବ। ପାଞ୍ଚ ବର୍ଷୀୟ ଯୋଜନା ଘୋଷଣା କରି ଚାଇନା ନିଜର ପ୍ରାକୃତିକ ବିଜ୍ଞାନ ଫାଉଣ୍ଡେସନ ଅନୁସନ୍ଧାନକାରୀଙ୍କୁ ଏସମ୍ପର୍କିତ ଟେକ୍ନୋଲୋଜି ଏବଂ କୌଶଳ ବିକାଶ କରିବାକୁ ନିର୍ଦ୍ଦେଶ ଦେଇଛି।
୨୦୩୫ ସୁଦ୍ଧା ଚାଇନା ମହାକାଶରେ ବିଦ୍ୟୁତ ଉତ୍ପାଦନ କରିବା ଲାଗି ଯୋଜନା ପ୍ରସ୍ତୁତ କରିଛି। ଏହି ପ୍ରକଳ୍ପ ପ୍ରାୟ ଏକ ମାଇଲ ଚୌଡ଼ା ହେବ ବୋଲି କୁହାଯାଉଛି।