ଆବୁଧାବି,୨।୭: ଭାରତକୁ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ) ପକ୍ଷରୁ ଏକ ବଡ଼ ଝଟ୍କା ମିଳିଛି। ଭାରତୀୟ ନାଗରିକଙ୍କ ଯାତ୍ରା ଉପରେ ୟୁଏଇ ପ୍ରତିବନ୍ଧକ ଲଗାଇଛି। ଭାରତ ସମେତ ୧୩ଟି ଦେଶର ଯାତ୍ରା ଉପରେ ୟୁଏଇ ସରକାର ପ୍ରତିବନ୍ଧକ ଲଗାଇଛନ୍ତି। ଶୁକ୍ରବାର ୟୁଏଇର ବେସସାମରିକ ଚଳାଚଳ ପ୍ରାଧିକରଣ ଏନେଇ ଏକ ବିଜ୍ଞପ୍ତି ଜାରି କରିଛି। କେବଳ ଭାରତ ନୁହେଁ ନେପାଳ, ପାକିସ୍ତାନ, ବାଂଲାଦେଶ, ଶ୍ରୀଲଙ୍କା, ଭିଏତନାମ, ନାମ୍ବିଆ ଓ ଜାମ୍ବିଆ ଆଦି ଦେଶର ଯାତ୍ରା ଉପରେ ୟୁଏଇ ପ୍ରତିବନ୍ଧକ ଲଗାଇଛି। କିନ୍ତୁ ଭାରତକୁ ନେଇ ୟୁଏଇର ଏଭଳି ପଦକ୍ଷେପ ଏକ ବଡ଼ କାର୍ଯ୍ୟନୁଷ୍ଠାନ ବୋଲି କୁହାଯାଉଛି। କାରଣ ଏଥିଯୋଗୁ ୟୁଏଇରେ କାମ କରୁଥିବା ଲକ୍ଷ ଲକ୍ଷ ଭାରତୀୟଙ୍କ ଉପରେ ପ୍ରଭାବ ପଡ଼ିବ। ସୂଚନାଯୋଗ୍ୟ, କରୋନା ଭାଇରସ୍ ସଂକ୍ରମଣରୁ ନିଜ ଦେଶକୁ ରକ୍ଷା କରିବା ଲାଗି ୟୁଏଇ ସରକାର ଏକ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଏହିକ୍ରମରେ ସରକାର ଉକ୍ତ ଦେଶଗଡ଼ିକର ଯାତ୍ରା ଉପରେ ପ୍ରତିବନ୍ଧକ ଲଗାଇଛନ୍ତି। ତେବେ ଭାରତରେ ଏହି ପ୍ରତିବନ୍ଧକ ସେତେବେଳେ ଲଗାଯାଇଛି ଯେତେବେଳେ ଦୈନିକ ସଂକ୍ରମଣ ହ୍ରାସ ପାଉଛି। ଅନ୍ୟପଟେ ସରକାରଙ୍କ ପକ୍ଷରୁ ଜାରି କରାଯାଇଥିବା ଏକ ବିଜ୍ଞପ୍ତିରେ କୁହାଯାଇଛି ଯେ, ଗତ ୧୪ଦିନ ମଧ୍ୟରେ ଯେଉଁମାନେ ଭାରତ ଗସ୍ତ କରିଛନ୍ତି। ସେମାନଙ୍କର ୟୁଏଇ ଫେରିବା ପାଇଁ କିଛିମାତ୍ରାରେ କଟକଣା କୋହଳ କରାଯିବ। ଏତଦ୍ ବ୍ୟତୀତ ଭାରତରେ ରହୁଥିବା ୟୁଏଇବାସିନ୍ଦାମାନେ ନିଜ ଦେଶକୁ ଫେରିବାକୁ ହେଲେ ପ୍ରଥମେ ସେମାନଙ୍କୁ ଟିକାର ଉଭୟ ଡୋଜ ନେବାକୁ ପଡ଼ିବ। ଏଥିସହ ନୂଆ ନିର୍ଦ୍ଦେଶ ଅନୁଯାୟୀ ସେମାନଙ୍କୁ ୟୁଏଇ ଫେରିବାକୁ ଅନୁମତି ଦିଆଯିବ ବୋଲି ସରକାର ଘୋଷଣା କରିଛନ୍ତି।