ଭୁବନେଶ୍ୱର,୧ା୪(ବ୍ୟୁରୋ): ରାଜ୍ୟ ସରକାରଙ୍କ ବିଭିନ୍ନ ବିଭାଗ ଯେଉଁ ଅର୍ଥ ପାଉଛନ୍ତି, ତାକୁ ଠିକ୍ ସମୟରେ ଖର୍ଚ୍ଚ କରି ପାରୁନାହାନ୍ତି। ବିଭାଗଗୁଡ଼ିକ ବଜେଟରେ ଅଧିକ ଅର୍ଥ ଦାବି କରୁଥିବାବେଳେ ମିଳୁଥିବା ଟଙ୍କା ଖର୍ଚ୍ଚ ନ ହୋଇ ପଡ଼ିରହୁଛି। ଏହାକୁ ନେଇ କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ(ସିଏଜି) ଉଦ୍ବେଗ ପ୍ରକାଶ କରିଛନ୍ତି। ଶୁକ୍ରବାର ବିଧାନସଭାରେ ଉପସ୍ଥାପିତ ୨୦୨୧-୨୨ ସିଏଜି ରିପୋର୍ଟରେ ଉଲ୍ଲେଖ କରାଯାଇଛି ଯେ ୨୦୨୦-୨୧ରେ ରାଜ୍ୟ ସରକାରଙ୍କ ୪୨ଟି ବିଭାଗରେ ବର୍ଷ ଶେଷ ସୁଦ୍ଧା ୯,୭୧୯ କୋଟି ଟଙ୍କା ଖର୍ଚ୍ଚ ନ ହୋଇ ପଡ଼ିରହିଥିଲା। କେବଳ ସେତିକି ନୁହେଁ, ୨୦୨୨ ମାର୍ଚ୍ଚ ୩୧ ସୁଦ୍ଧା ବିଭାଗଗୁଡ଼ିକ ବିନିଯୋଗ ପ୍ରମାଣ ପତ୍ର (ୟୁସି) ଦେବାରେ ମଧ୍ୟ ବିଫଳ ହୋଇଛନ୍ତି। ସିଏଜି ତାଙ୍କ ରିପୋର୍ଟରେ ଉଲ୍ଲେଖ କରଛନ୍ତି ଯେ ସରକାରଙ୍କ ବିଭାଗୁଡ଼ିକ ୨୭,୪୨୩.୦୩ କୋଟି ଟଙ୍କାର ୟୁସି ଦେଇନାହାନ୍ତି। ୨୦୨୧-୨୨ ଆର୍ଥିକ ବର୍ଷରେ ମୋଟ ୨୫,୯୩୦.୯୭ କୋଟି ଟଙ୍କାରୁ ବିଭାଗଗୁଡ଼ିକ ମାତ୍ର ୭,୮୨୬.୮୨ କୋଟି ଟଙ୍କାର ୟୁସି ଦେବାରେ ସମର୍ଥ ହୋଇଛନ୍ତି। ରାଜ୍ୟ ସରକାର ଯେଉଁ ସଂସ୍ଥାଗୁଡିକରେ ପୁଞ୍ଜିିନିବେଶ କରିଥିଲେ ସେଥିରେ ମଧ୍ୟ ରାଜକୋଷକୁ କ୍ଷତି ସହିବାକୁ ପଡ଼ିଛି। ରାଜ୍ୟ ସରକାର ୨୦୨୧ ମାର୍ଚ୍ଚ ୩୧ ସୁଦ୍ଧା ୧୪୯ଟି ସଂସ୍ଥାରେ ୭,୨୮୮.୨୯ କୋଟି ଟଙ୍କା ବିନିଯୋଗ କରିଛନ୍ତି। ସେଥିରୁ ୭୨ଟି ସଂସ୍ଥା ୬ରୁ ୫୦ ବର୍ଷ ଧରି ଅଚଳ ହୋଇରହିଛି। ଏଥିପାଇଁ ସରକାର ବିନିଯୋଗ କରିଥିବା ୬୮.୫୨ କୋଟି ଟଙ୍କା ଆଦାୟ ହୋଇ ପାରିନାହିଁ। ଏଥିସହିତ ରାଜ୍ୟ ସରକାର ବିଭିନ୍ନ ସରକାରୀ ନିଗମ, ପୌର ସଂସ୍ଥା, ବେସରକାରୀ ସଂସ୍ଥାକୁ ୮୬୨୪ କୋଟି ଟଙ୍କା ଋଣ ଆକାରରେ ପ୍ରଦାନ କରିଛନ୍ତି ବୋଲି ସିଏଜି ରିପୋର୍ଟରେ ଉଲ୍ଲେଖ କରାଯାଇଛି। ରାଜ୍ୟ ସରକାର କେନ୍ଦ୍ରୀୟ ଅନୁଦାନ ପାଇବାରୁ ମଧ୍ୟ ବଞ୍ଚିତ ହୋଇଛନ୍ତି। ରାଜ୍ୟ ସରକାର କେନ୍ଦ୍ର ପ୍ରବର୍ତ୍ତିତ ଯୋଜନା ବାବଦରେ କେନ୍ଦ୍ରରୁ ୩୧,୭୬୮ କୋଟି ଟଙ୍କା ପାଇବାକୁ ଥିବାବେଳେ ମାତ୍ର ୩୭ ପ୍ରତିଶତ ଅର୍ଥାତ ୧୧,୮୨୦ କୋଟି ଟଙ୍କା। ସେହିପରି ରାଜ୍ୟ ସରକାରଙ୍କ ଉପରେ ୨୦୨୨ ଡିସେମ୍ବର ୩୧ ସୁଦ୍ଧା ୭୨,୪୮୫.୦୬ କୋଟି ଟଙ୍କା ରହିଥିଲା। ସେଥିରୁ ରାଜ୍ୟ ସରକାର ନିଜେ ବିଭିନ୍ନ ସୂତ୍ରରୁ ୫୩,୯୭୭.୨୪ କୋଟି ଟଙ୍କା ଏବଂ କେନ୍ଦ୍ରଠାରୁ ୧୮୫୦୭.୮୨ କୋଟି ଟଙ୍କା ଋଣ କରିଥିଲେ ବୋଲି ସିଏଜି ରିପୋର୍ଟରେ ଉଲ୍ଲେଖ କରିଛନ୍ତି ।