ଉଦୟପୁର,୨୧।୧୧: ରାଜସ୍ଥାନର ଉଦୟପୁରରେ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଏକ ଘରୁ ଗୋଟିଏ ପରିବାରର ୬ଜଣ ସଦସ୍ୟଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି। ଏହି ଘଟଣା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ କୋକୁଆଭୟ ଖେଳିଯାଇଛି। ସୂଚନାଯୋଗ୍ୟ, ଉଦୟପୁର ଜିଲାର ଗୋକୁଣ୍ଡା ଅଞ୍ଚଳରେ ରହୁଥିବା ପ୍ରକାଶ ଗମେତି, ସ୍ତ୍ରୀ ଦୁର୍ଗା ଗମେତି ଏବଂ ତାଙ୍କ ୪ଜଣ ପିଲାଙ୍କ ସନ୍ଦେହଜନକ ମୃତ୍ୟୁ ହୋଇଛି। ସୋମବାର ସକାଳେ ପ୍ରକାଶଙ୍କ ଭାଇ କାମକୁ ଯିବା ପାଇଁ ତାଙ୍କୁ ଡାକିବାକୁ ଆସିଥିଲେ। କବାଟ କେହି ନ ଖୋଲିବାରୁ ଚିନ୍ତା ପ୍ରକଟ କରି ସେ ତାକୁ ଭାଙ୍ଗିଦେଇଥିଲେ। ଏହାପରେ ଘର ଭିତରର ଦୃଶ୍ୟ ଦେଖି ତାଙ୍କ ପାଦ ତଳୁ ମାଟି ଖସିଯାଇଥିଲା। ଘରର ଛାତରେ ୪ଜଣଙ୍କ ମୃତଦେହ ଝୁଲୁଥିବା ବେଳେ ଅନ୍ୟ ୨ଜଣଙ୍କ ମୃତଦେହ ତଳେ ପଡ଼ିଥିଲା। ଏହାପରେ ସେ ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିବା ସହ ବ୍ୟବଚ୍ଛେଦ ପାଇଁ ହସ୍ପିଟାଲକୁ ପଠାଇଛି। ଏଥିସହ ଘଟଣାସ୍ଥଳରେ ଫରେନ୍ସିକ୍ ଟିମ୍ ଓ ଡଗ୍ ସ୍କ୍ବାର୍ଡ ପହଞ୍ଚି ଛାନ୍ଭିନ୍ ଆରମ୍ଭ କରିଛନ୍ତି। ତେବେ କେଉଁ ପରିସ୍ଥିତିରେ ପ୍ରକାଶ ଓ ତାଙ୍କ ପରିବାର ସାମୂହିକ ଆତ୍ମହତ୍ୟା କରିଛନ୍ତି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇ ନ ଥିବା ବେଳେ ପୋଲିସ ସବୁ ଦିଗକୁ ତଦନ୍ତ କରୁଛି।