ଚେନ୍ନାଇ,୧୯।୯: ତାମିଲନାଡୁର ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀ ଉଦୟନିଧି ଷ୍ଟାଲିନ ସନାତନ ଧର୍ମ ଉପରେ ନିଜ ବିବାଦୀୟ ମତ ପୁଣି ଦୋହରାଇଛନ୍ତି। ସନାତନ ଧର୍ମକୁ ବିଲୋପ କରିବାକୁ ହିଁ ପଡ଼ିବ ବୋଲି ସେ କହିଛନ୍ତି। ରାଜ୍ୟରେ ବହୁ ଜାତି ଭିତ୍ତିକ ଭେଦଭାବ ରହିଛି ବୋଲି ନିକଟରେ ତାମିଲନାଡୁର ରାଜ୍ୟପାଳ ଆର.ଏନ ରବି ଏକ କାର୍ଯ୍ୟକ୍ରମରେ କହିଥିଲେ। ସନାତନକୁ ବିଲୋପ କରିବାର କୌଣସି ଆବଶ୍ୟକତା ନାହିଁ, କାରଣ ଏଠାରେ ସମସ୍ତେ ଜନ୍ମ ଆଧାରରେ ସମାନ ଅଟନ୍ତି।
ଏହାର ଜବାବରେ ଷ୍ଟାଲିନ କହିଛନ୍ତି, ଜାତିଗତ ଭେଦଭାବ ହେତୁ ସେମାନେ ସନାତନ ଧର୍ମକୁ ହଟାଇବା ବିଷୟରେ କଥାବାର୍ତ୍ତା କରନ୍ତି। ସନାତନ ଧର୍ମକୁ ବିଲୋପ କରିବାକୁ ପଡିବ। ଜାତି ଭିତ୍ତିରେ ଭେଦଭାବ ଦୂର କରିବା ବିଷୟରେ ଆମେ ମଧ୍ୟ କହୁଛୁ। ରାଜ୍ୟପାଳ ମଧ୍ୟ ସମାନ କଥା କହୁଛନ୍ତି। ଜନ୍ମ ଉପରେ ଆଧାରିତ ଜାତିକୁ ରଦ୍ଦ କରାଯିବା ଉଚିତ୍। ଜାତି ଭିତ୍ତିରେ ଯେଉଁଠାରେ ଭେଦଭାବ ଅଛି, ମୁଁ ସେହି ଭେଦଭାବକୁ ଶେଷ କରିବାକୁ ଚାହୁଁଛି।
କିଛି ଦିନ ପୂର୍ବରୁ ଉଦୟନିଧି ଷ୍ଟାଲିନ ଏକ କାର୍ଯ୍ୟକ୍ରମ ଯୋଗଦେଇ କହିଥିଲେ, ସନାତନ ଧର୍ମ ସମାନତା ଏବଂ ସାମାଜିକ ନ୍ୟାୟ ବିରୋଧୀ। ତେଣୁ ତାହାର ବିଲୋପ ହେବା ଆବଶ୍ୟକ। ସେ ସନାତନ ଧର୍ମକୁ କରୋନା ଭୂତାଣୁ, ମ୍ୟାଲେରିଆ ଏବଂ ଡେଙ୍ଗୁ ଜ୍ୱର ସହ ତୁଳନା କରି ଏହାକୁ ବିରୋଧ ନୁହେଁ, ବିଲୋପ କରିଦିଆଯିବା ଆବଶ୍ୟକ ବୋଲି କହିଥିଲେ, ଯାହାକୁ ନେଇ ଦେଶରେ ବିବାଦ ସୃଷ୍ଟି ହୋଇଥିଲା।
