କ୍ଷମତା ପାଇଁ ବାଲା ସାହେବଙ୍କ ଚିନ୍ତାଧାରାକୁ ଭୁଲି ଯାଇଛନ୍ତି ଉଦ୍ଧବ: ଭାଜପା..

ମୁମ୍ବାଇ,୧୨।୧୦ : ଅହଂକାରୀ ଫାଇଲର ଷଷ୍ଠ ଏପିସୋଡରେ ଭାଜପା ପକ୍ଷରୁ ଉଦ୍ଧବ ଠାକରେଙ୍କୁ ଟାର୍ଗେଟ କରାଯାଇଛି। କ୍ଷମତା ପାଇଁ ଉଦ୍ଧବ ତାଙ୍କ ପିତା ବାଲା ସାହେବ ଠାକରେଙ୍କ ହିନ୍ଦୁ, ହିନ୍ଦୁତ୍ୱ ଏବଂ ଜାତୀୟତାବାଦକୁ ତ୍ୟାଗ କରିଛନ୍ତି ଏବଂ ବର୍ତ୍ତମାନ ଉଦ୍ଧବଙ୍କ ଶିବସେନା ହିନ୍ଦୁ ବିରୋଧୀ ହୋଇଛି।

ଭାଜପା ଏହାର ସୋସିଆଲ ମିଡିଆ ପ୍ଲାଟଫର୍ମରେ ୩ ମିନିଟ ୪୨ ସେକେଣ୍ଡର ଏକ ଭିଡିଓ ଶେୟାର କରି କହିଛି ଏକ ସମୟ ଥିଲା ଯେତେବେଳେ ଶିବସେନାଙ୍କ ଆଦର୍ଶରେ ହିନ୍ଦୁ, ହିନ୍ଦୁତ୍ୱ ଏବଂ ଜାତୀୟତା ରହିଥିଲା, ଯେପର୍ଯ୍ୟନ୍ତ ବାଲାସାହେବ ଠାକରେ ଜୀବିତ ଥିଲେ ସେ ଦେଶ ପାଇଁ ଏହା ଗ୍ରହଣ କରିଥିଲେ।

କିନ୍ତୁ ତାଙ୍କ ବିୟୋଗ ପରେ ଦଳର କମାଣ୍ଡ ଦାୟିତ୍ୱ ଗ୍ରହଣ କରିଥିବା ତାଙ୍କ ପୁଅ ଉଦ୍ଧବ ଠାକରେ ତାଙ୍କ ପିତାଙ୍କ ଦ୍ୱାରା ପ୍ରସ୍ତୁତ ସମସ୍ତ ନୀତିକୁ ତ୍ୟାଗ କରି ଦେଇଥିଲେ। କେବଳ କ୍ଷମତାରେ ବସିବା ପାଇଁ ଶିବସେନା ବିରୋଧୀ କଂଗ୍ରେସ ଏବଂ ଶରଦ ପାୱାରଙ୍କ ଦଳ ଏନସିପି ସହିତ ହାତ ମିଳାଇଥିଲେ। ହିନ୍ଦୁ ବିରୋଧୀ ଏବଂ ଜାତୀୟ ବିରୋଧୀ ଚିନ୍ତାଧାରା ପ୍ରତି ଶିବସେନା ଆକୃଷ୍ଟ ହୋଇଛି।

ଭିଡିଓରେ ବାଲାସାହେବ ଠାକରେଙ୍କ ଅନେକ ବିବୃତ୍ତି ଏବଂ ଉଦ୍ଧବଙ୍କ ସରକାର ସମୟରେ ଘଟିଥିବା ଅନେକ ଘଟଣା ଶେୟାର କରି ଭାଜପା କହିଛି, ଉଦ୍ଧବ ତାଙ୍କ ପିତା ବାଲା ସାହେବ ଠାକରେଙ୍କ ଆଦର୍ଶ ହିନ୍ଦୁ, ହିନ୍ଦୁତ୍ୱ ଏବଂ ଜାତୀୟତାକୁ ଶ୍ରଦ୍ଧାଞ୍ଜଳି ଅର୍ପଣ କରଛନ୍ତି।

ଭାଜପା ଏହା ମଧ୍ୟ ଅଭିଯୋଗ କରିଛି କ୍ଷମତା ପାଇଁ କ୍ଷଣକ ମଧ୍ୟରେ ନିଜ ପିତାଙ୍କ ଚିନ୍ତାଧାରାକୁ ଭୁଲି ଯାଇଥିବା ପୁଅ କିପରି ଜନସାଧାରଣଙ୍କ ପାଇଁ ଲାଭଦାୟକ ହୋଇପାରିବ?

ବାସ୍ତବରେ ବିରୋଧୀ ଦଳର ଇଣ୍ଡିଆ ଆଲାଇନ୍ସରେ ଅନ୍ତର୍ଭୁକ୍ତ ରାଜନୈତିକ ଦଳଙ୍କୁ କଡ଼ା ସମାଲୋଚନା କରିବାକୁ ସୋସିଆଲ ମିଡିଆ ପ୍ଲାଟଫର୍ମରେ ଭାଜପା ଅହଂକାରୀ ଫାଇଲ ଆରମ୍ଭ କରିଛି। ଏହି ସିରିଜ ଅଧୀନରେ ଭାଜପା ସୋମବାର ସୋସିଆଲ ମିଡିଆ ପ୍ଲାଟଫର୍ମରେ ଷଷ୍ଠ ଏପିସୋଡ ପ୍ରକାଶ କରି ଉଦ୍ଧବ ଠାକରେଙ୍କୁ ଟାର୍ଗେଟ କରିଛି।