ମୁମ୍ବାଇ,୩।୯ : ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ବିଦ୍ରୋହୀ ମନୋଭାବ ଯୋଗୁ ମହାରାଷ୍ଟ୍ରରେ ନୂଆ ସରକାର ଗଠନ ହୋଇଛି। ତେବେ ଏବେ ବି ଶିନ୍ଦେ ଗୋଷ୍ଠୀ ଉଦ୍ଧବଙ୍କୁ ଟାର୍ଗେଟ କରିବା ଜାରି ରଖିଛନ୍ତି। ଶିନ୍ଦେ ଗୋଷ୍ଠୀର ନେତା ତଥା ପୂର୍ବତନ ମନ୍ତ୍ରୀ ରାମଦାସ କଦମ ଦାବି କରିଛନ୍ତି ଯେ ଉଦ୍ଧବ ଏବଂ ଆଦିତ୍ୟ ଠାକରେଙ୍କ ବ୍ୟତୀତ ସମଗ୍ର ଶିବସେନା ଭାଜପାରେ ଯୋଗଦେବାକୁ ପ୍ରସ୍ତୁତ ହୋଇ ସାରିଥିଲେ। ଶିନ୍ଦେଙ୍କ କାରଣରୁ ବାଲାସାହେବଙ୍କ ଶିବସେନା ବଞ୍ଚିଛି। ନଚେତ କେବେଠୁଁ ଭାଜପାରେ ବିଲୟ ହୋଇ ସାରନ୍ତାଣି।
ଉଦ୍ଧବ ବାଲାସାହେବ ଠାକରେଙ୍କ ଆଦର୍ଶ ଅନୁସରଣ କରିବା ପରିବର୍ତ୍ତେ ଶରଦ ପାୱାରଙ୍କୁ ମାନୁଥିବା ସେ ଅଭିଯୋଗ କରିଛନ୍ତି। କଦମ କହିଛନ୍ତି ଯେ ଉଦ୍ଧବ ଠାକରେ କାହା କଥା ଶୁଣିବାକୁ ପ୍ରସ୍ତୁତ ନୁହଁନ୍ତି। ସେ ମରାଠାଙ୍କୁ ଘୃଣା କରନ୍ତି। ପ୍ରକୃତ ଦେଶଦ୍ରୋହୀ କିଏ? ପ୍ରକୃତ ଠକ କିଏ? ମୁଁ ଲୋକଙ୍କୁ ସତ କହିବି। ରାଜ୍ୟର ପ୍ରତ୍ୟେକ ଜିଲାକୁ ଯିବି । ମୋତେ ୩ ବର୍ଷ କଥା ହେବାକୁ ଦିଆଯାଇ ନଥିଲା। ଉଦ୍ଧବ ଏବଂ ଆଦିତ୍ୟ ନିଜକୁ ମାଲିକ ଏବଂ ଅନ୍ୟମାନେ ସେବକ ଭାବରେ ବିବେଚନା କରନ୍ତି। ବାଲାସାହେବ ସମସ୍ତ ନେତାଙ୍କ ସହ କଥା ହେଉଥିଲେ। ଆଲୋଚନା କରିବା ପରେ ବିଭିନ୍ନ ନିଷ୍ପତ୍ତି ଗ୍ରହଣ କରାଯାଉଥିଲା ବୋଲି କଦମ କହିଛନ୍ତି।
ରାମଦାସ କଦମ ରତ୍ନଗିରିରେ ଏକ କାର୍ଯ୍ୟକ୍ରମରେ ଯୋଗଦେଇ କହିଛନ୍ତି, ’ଆଜି ଏକନାଥ ଶିନ୍ଦେ ବାଲାସାହେବଙ୍କ ବିଚାର ଧାରାକୁ ପ୍ରକୃତ ଅର୍ଥରେ ଅନୁସରଣ କରୁଛନ୍ତି। ଉଦ୍ଧବ ବାଲାସାହେବଙ୍କ ଚିନ୍ତାଧାରାକୁ ଅସମ୍ମାନ କରି ତାଙ୍କ ପିଠିରେ ଖଣ୍ଡା ଲଗାଇବା କାମ କରିଛନ୍ତି ବୋଲି ସେ ଅଭିଯୋଗ କରିଛନ୍ତି।