ମୁମ୍ବାଇ,୮।୩: ଲୋକ ସଭା ନିର୍ବାଚନ ପାଇଁ ପ୍ରସ୍ତୁତି କରୁଥିବା ଶିବସେନା (ୟୁବିଟି) ସଭାପତି ଉଦ୍ଧବ ଠାକରେ ନିତିନ ଗଡକରୀଙ୍କ ସମ୍ପର୍କରେ ଏକ ବଡ଼ ବିବୃତ୍ତି ଦେଇଛନ୍ତି। ମହାରାଷ୍ଟ୍ରର ତୁଲଜାପୁରରେ ଏକ ସାଧାରଣ ସଭାରେ ଉଦବୋଧନ ଦେଇ ଠାକରେ ନିତିନ ଗଡକରୀଙ୍କୁ ଭାଜପା ଛାଡି ମହାବିକାଶ ଆଘାଡିରେ ଯୋଗଦେବାକୁ ଆହ୍ବାନ କରିଛନ୍ତି।
ସାଧାରଣ ସଭାରେ ଉଦ୍ଧବ ଠାକରେ କହିଛନ୍ତି, ନିତିନ ଗଡକରୀ ଭାଜପା ଛାଡି ଆମ ସହ ଯୋଗଦେବା ଉଚିତ ଏବଂ ମହାବିକାଶ ଆଘାଡି ତାଙ୍କୁ କିପରି ଚୟନ କରୁଛନ୍ତି ତାହା ଦେଖିବା ଉଚିତ। ଉଦ୍ଧବ ମଧ୍ୟ ଭାଜପାକୁ ଟାର୍ଗେଟ କରି କହିଥିଲେ ଯେ କୃପାଶଙ୍କର ସିଂଙ୍କ ପରି ଲୋକଙ୍କ ନାମ ଭାଜପାର ପ୍ରଥମ ତାଲିକାରେ ଅଛି। ମହାରାଷ୍ଟ୍ରରେ ଭାଜପା ପ୍ରତିଷ୍ଠା କରିଥିବା ଏବଂ ସବୁବେଳେ ମିଳିତ ମେଣ୍ଟ ପାଇଁ କାମ କରୁଥିବା ଗଡ଼କରୀଙ୍କ ନାମର ଉଲ୍ଲେଖ ମଧ୍ୟ ନାହିଁ।
ଶିବସେନା କଥା ଉଲ୍ଲେଖ କରି ଶିବସେନା ୟୁବିଟି ମୁଖ୍ୟ ମଧ୍ୟ କେନ୍ଦ୍ରର ଭାଜପା ସରକାର ଉପରେ ଆକ୍ରମଣ କରିଥିଲେ। ସେ କହିଛନ୍ତି, ମହାରାଷ୍ଟ୍ର କେବେ ଦିଲ୍ଲୀ ଆଗରେ ମୁଣ୍ଡ ନୁଆଁଇ ନାହିଁ। ଯେତେବେଳେ ଶିବାଜୀ ଆଗ୍ରାରେ ଔରଙ୍ଗଜେବଙ୍କ ଆଗରେ ମୁଣ୍ଡ ନୁଆଁଇଲେ ନାହିଁ, ତେବେ ଆମେ ଆପଣଙ୍କ ଆଗରେ କିପରି ମୁଣ୍ଡ ନୁଆଁଇବୁ। ସୂଚନାଯୋଗ୍ୟ, ମହାରାଷ୍ଟ୍ରରେ ଆଗାମୀ ଲୋକ ସଭାକୁ ଦୃଷ୍ଟିରେ ରଖି ଆସନ ବାଣ୍ଟିବା ନେଇ ବିରୋଧୀ ଦଳ ଏମଭିଏ – କଂଗ୍ରେସ, ଶିବସେନା (ୟୁବିଟି) ଏବଂ ଏନସିପି (ଶରଦ ପାୱାର) ଙ୍କ ମଧ୍ୟରେ ବହୁ ଦିନ ଧରି ତୀବ୍ର ଆଲୋଚନା ଚାଲିଛି। ନିର୍ବାଚନକୁ ନେଇ ଏପର୍ଯ୍ୟନ୍ତ ଏ ସମ୍ପର୍କରେ କୌଣସି ସହମତି ହୋଇପାରି ନାହିଁ। ଆସନ ବାଣ୍ଟିବା ସୂତ୍ର ଚୂଡାନ୍ତ କରିବା ଲକ୍ଷ୍ୟରେ ଏମଭିଏ ନିର୍ବାଚନମଣ୍ଡଳୀ ବୁଧବାର ମୁମ୍ବାଇରେ ପ୍ରକାଶ ଆମ୍ବେଦକରଙ୍କ ନେତୃତ୍ୱାଧୀନ ବଞ୍ଚିତ ବହୁଜନ ଅଘାଡି (ଭିବିଏ) ଙ୍କ ସହ ଆଲୋଚନା କରିଥିଲେ।
ମହାରାଷ୍ଟ୍ରରେ ୪୮ଟି ଲୋକ ସଭା ଆସନ ରହିଛି, ଯାହାକି ଉତ୍ତରପ୍ରଦେଶର ୮୦ଟି ସିଟ ପରେ ସର୍ବାଧିକ ଲୋକ ସଭା ସଦସ୍ୟ ଚୟନ କରୁଥିବା ରାଜ୍ୟ। ୨୦୧୯ ଲୋକ ସଭା ନିର୍ବାଚନରେ ଅବିଭକ୍ତ ଶିବସେନା ୧୮ ଟି ଆସନ ଜିତିଥିଲେ ଏବଂ ଏଥର ସମାନ ସଂଖ୍ୟକ ଆସନରେ ପ୍ରତିଦ୍ୱନ୍ଦ୍ୱିତା କରିବାକୁ ଜିଦ ଧରିଛନ୍ତି।