ନୂଆଦିଲ୍ଲୀ, ୨୯ା୩ : ଏକ ମାନହାନି ମାମଲାରେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ, ତାଙ୍କ ପୁଅ ତଥା ପୂର୍ବତନ ମନ୍ତ୍ରୀ ଆଦିତ୍ୟ ଠାକ୍ରେ, ଘନିଷ୍ଠ ସହଯୋଗୀ ସଞ୍ଜୟ ରାଉତଙ୍କୁ ଦିଲ୍ଲୀ ହାଇକୋର୍ଟ ମଙ୍ଗଳବାର ସମନ ଜାରି କରିଛନ୍ତି। ଶିବସେନାର ଏକନାଥ ଶିନ୍ଦେ ଗୋଷ୍ଠୀର ଏମ୍ପି ରାହୁଲ ରମେଶ ଶଓ୍ବୋଲେ ଦାଏର କରିଥିବା ପିଟିଶନ ଆଧାରରେ ଏପ୍ରିଲ ୧୭ରେ ହାଜର ହେବା ପାଇଁ ସେମାନଙ୍କୁ ନିର୍ଦ୍ଦେଶ ଦିଆଯାଇଛି। ଶିବସେନାର ‘ଧନୁତୀର’ ଚିହ୍ନ କିଣିବା ପାଇଁ ମୁଖ୍ୟମନ୍ତ୍ରୀ ଏକନାଥ ଓ ତାଙ୍କ ଅନୁଗତ ନେତାମାନେ ୨,୦୦୦ କୋଟି ଟଙ୍କା ଦେଇଥିବା ଠାକ୍ରେ ଗୋଷ୍ଠୀର ସଞ୍ଜୟ ରାଉତ ଓ ଅନ୍ୟମାନେ ଅଭିଯୋଗ କରିଥିଲେ। ଭବିଷ୍ୟତରେ ଏଭଳି ମନ୍ତବ୍ୟ ଦେବାରୁ ଠାକ୍ରେ ଗୋଷ୍ଠୀର ନେତାମାନେ ଦୂରେଇ ରହିବା ଲାଗି ନିର୍ଦ୍ଦେଶ ଦେବାକୁ ଶଓ୍ବୋଲେ ପିଟିଶନରେ ଦାବି କରିଥିଲେ। ଏହା ଏକ ରାଜନୈତିକ ପ୍ରସଙ୍ଗ ହୋଇଥିବାରୁ ଅନ୍ୟପକ୍ଷର ଯୁକ୍ତି ନ ଶୁଣି କୌଣସି ନିର୍ଦ୍ଦେଶ ଦେଇପାରିବେ ନାହିଁ ବୋଲି ହାଇକୋର୍ଟ କହିଛନ୍ତି।