ମୁମ୍ବାଇ,୩୦।୭: ଶିବସେନା ଅଧ୍ୟକ୍ଷ ଉଦ୍ଧବ ଠାକ୍ରେଙ୍କ ହାତରୁ ମୁଖ୍ୟମନ୍ତ୍ରୀ ପଦ ଯିବା ପରେ ଦଳକୁ ଏକାଠି ରଖିବାରେ ସେ ଏକପ୍ରକାର ସଂଘର୍ଷ କରୁଛନ୍ତି। ଏହି ସମୟରେ ତାଙ୍କୁ ଆଉ ଏକ ରାଜନୈତିକ ଝଟକା ଲାଗିଛି। ବିଦ୍ରୋହୀ ନେତା ତଥା ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ନିଜକୁ ଶିବସେନା ପ୍ରତିଷ୍ଠାତା ବାଲ୍ ଠାକ୍ରେଙ୍କ ଲିଗାସି ଦାବି କରିଆସୁଥିବାବେଳେ ଉଦ୍ଧବଙ୍କ ପୁତୁରା ନିହାର ଠାକ୍ରେ ତାଙ୍କୁ ଭେଟି ସମର୍ଥନ ଜଣାଇଛନ୍ତି।
ନିହାର ହେଉଛନ୍ତି ବାଲ୍ ଠାକ୍ରେଙ୍କ ବଡ଼ପୁଅ ବିନ୍ଦୁମାଧବ ଠାକ୍ରେଙ୍କ ପୁଅ। ଚଳଚ୍ଚିତ୍ର ପ୍ରଯୋଜକ ଥିବା ବିନ୍ଦୁମାଧବଙ୍କର ୧୯୯୬ରେ ଏକ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଥିଲା। ନିହାର ରାଜନୀତିରେ ପୋଖତ ନ ଥିଲେ ମଧ୍ୟ ପରିବାର ସଦସ୍ୟ ବିଦ୍ରୋହୀ ଶିବିରରେ ଯୋଗଦେବା ଉଦ୍ଧବଙ୍କୁ ଅଡ଼ୁଆରେ ପକାଇଛି। ନିକଟରେ ଉଦ୍ଧବଙ୍କ ଭାଇ ଜୟଦେବଙ୍କ ପୂର୍ବତନ ସ୍ତ୍ରୀ ସ୍ମିତା ଠାକ୍ରେ ମୁଖ୍ୟମନ୍ତ୍ରୀ ଶିନ୍ଦେଙ୍କୁ ଭେଟିଥିଲେ। ସୂଚନାଯୋଗ୍ୟ, ୨୦୧୨ରେ ବାଲ୍ ଠାକ୍ରେଙ୍କ ଦେହାନ୍ତ ପରେ ତାଙ୍କ ଇଚ୍ଛାପତ୍ରଙ୍କୁ ନେଇ ବିବାଦ ଦେଖାଦେଇଥିଲା। ସେବେଠାରୁ ଊଦ୍ଧବଙ୍କର ଅନ୍ୟ ଦୁଇଭାଇଙ୍କ ପରିବାର ସହ ଭଲ ସମ୍ପର୍କ ନାହିଁ। ନିହାର ଜଣେ ଆଇନଜୀବୀ ହୋଇଥିବାବେଳେ ଭାଜପା ନେତା ହର୍ଷବର୍ଦ୍ଧନ ପାଟିଲଙ୍କ ଝିଅ ଅଙ୍କିତାଙ୍କୁ ବିବାହ କରିଛନ୍ତି।