ଲଣ୍ଡନ,୩ ।୯: ବ୍ରିଟେନ ପ୍ରଧାନମନ୍ତ୍ରୀ ପଦ ପାଇଁ ପୂର୍ବତନ ଅର୍ଥମନ୍ତ୍ରୀ ଋଷି ସୁନକ ଓ ବୈଦେଶିକ ମନ୍ତ୍ରୀ ଲିଜ ଟ୍ରସଙ୍କ ମଧ୍ୟରେ ଚାଲିଥିବା ରେସ କ୍ରମରେ ଶୁକ୍ରବାର ଶେଷ ପର୍ଯ୍ୟାୟ ମତଦାନ ଶେଷ ହୋଇଛି । ଏଥିରେ ଦଳର ସଦସ୍ୟମାନେ ନିଜ ପସନ୍ଦର ପ୍ରାର୍ଥୀଙ୍କୁ ଭୋଟ ଦେଇଛନ୍ତି ।
କଞ୍ଜରଭେଟିଭ ପାର୍ଟି ପ୍ରଚାର ମୁଖ୍ୟାଳୟ କହିଛି ପ୍ରଧାନମନ୍ତ୍ରୀ ରେସରେ ବିଜେତାଙ୍କ ନାମ ସୋମବାର ସ୍ଥାନୀୟ ସମୟ ୧୨ଟା ୩୦ରେ ଘୋଷଣା କରାଯିବ । ସୁନକ(୪୨) ଓ ଟ୍ରସ(୪୭) କଞ୍ଜରଭେଟିଭ ପାର୍ଟିର ପ୍ରାୟ ୧,୬୦,୦୦୦ ସଦସ୍ୟଙ୍କ ମତ ପାଇବାକୁ ସେମାନଙ୍କୁ ପ୍ରଭାବିତ କରିବାକୁ କେତେଥର ସାମ୍ନା ସାମ୍ନି କଥା କଟାକଟି ହୋଇଛନ୍ତି ।
ଭାରତୀୟ ମୂଳ ବାସିନ୍ଦା ତଥା ବ୍ରିଟେନର ପୂର୍ବତନ ଅର୍ଥମନ୍ତ୍ରୀ ତାଙ୍କ ଅଭିଯାନରେ ତତ୍କାଳ ପ୍ରାଥମିକତା ଭାବେ ବୃଦ୍ଧି ପାଉଥିବା ମୁଦ୍ରା ସ୍ଫିତି ଉପରେ ଅଙ୍କୁଶ ଲଗାଇବା କଥା କହିଛନ୍ତି । ଅନ୍ୟପଟେ ବୈଦେଶିକମନ୍ତ୍ରୀ ଲିଜ ଟ୍ରସ କଥା ଦେଇଛନ୍ତି ଯଦି ସେ ପ୍ରଧାନମନ୍ତ୍ରୀ ଭାବେ ନିର୍ବାଚିତ ହେଲେ ତେବେ ଦାୟିତ୍ୱ ନେବାର ପ୍ରଥମ ଦିନରେ ଟିକସ ହ୍ରାସ କରିବାକୁ ନିର୍ଦ୍ଦେଶ ଜାରି କରିବେ ।
