ମସ୍କୋ/କ୍ୱିଭ୍, ୨୪।୫ : ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଜାରି ରହିଛି। ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିଷୟରେ ଏନେଇ ସାରା ବିଶ୍ୱରେ ସମାଲୋଚନା ହେବାରେ ଲାଗିଛି। ଯୁଦ୍ଧ ପାଇଁ ପୁଟିନଙ୍କୁ ଦାୟୀ କରାଯାଉଛି। ତେବେ ଏାବେ ଆଉ ଏକ ସମ୍ବେଦନଶୀଳ ଦାବି ସାମ୍ନାକୁ ଆସିଛି। ଦୁଇ ମାସ ପୂର୍ବେ ପୁଟିନଙ୍କୁ ହତ୍ୟା କରିବାକୁ ଚେଷ୍ଟା କରାଯାଇଥିଲା କିନ୍ତୁ ତାଙ୍କର ଭାଗ୍ୟ ଭଲ ଥିବାରୁ ସେ ଖସି ପଳାଇଥିଲେ। ତାଙ୍କୁ ହତ୍ୟା କରିବା ଲାଗି ଷଡ଼ଯନ୍ତ୍ର ରଚା ଯାଇଥିଲା।
ୟୁକ୍ରେନ୍ର ଜଣେ ବରିଷ୍ଠ ଅଧିକାରୀ ୟୁକ୍ରେନ ଅନଲାଇନ ନ୍ୟୁଜ ଏଜେନ୍ସିକୁ ଏାନେଇ ସୂଚନା ପ୍ରଦାନ କରିଛନ୍ତି। ୟୁକ୍ରେନର ପ୍ରତିରକ୍ଷା ଇଣ୍ଟେଲିଜେନ୍ସର ମୁଖ୍ୟ ମେଜର ଜେନେରାଲ କିର୍ଲୋ ବୁଡାନୋଭ କହିଛନ୍ତି ଯେ କୃଷ୍ଣସାଗର ଏବଂ କାସ୍ପିଆନ ସାଗର ମଧ୍ୟରେ ଥିବା କାକେଶସ ନାମକ ଏକ ସ୍ଥାନରେ ଏହି ବିଫଳ ପ୍ରୟାସ କରାଯାଇଥିଲା। ସ୍କାଏ ନ୍ୟୁଜକୁ ଦେଇଥିବା ଏକ ସାକ୍ଷାତକାରରେ ସେ ପୂର୍ବାନୁମାନ କରିଛନ୍ତି ଯେ ଅଗଷ୍ଟ ମଧ୍ୟଭାଗରେ ୟୁକ୍ରେନ ଯୁଦ୍ଧ ଏକ ମୋଡ଼ରେ ପହଞ୍ଚିବ ଏବଂ ଚଳିତ ବର୍ଷ ଶେଷ ସୁଦ୍ଧା ଶେଷ ହେବ।
ରୁଷିଆରେ ନେତୃତ୍ୱ ପରିବର୍ତ୍ତନ ପାଇଁ ପୁଟିନଙ୍କ ସ୍ବାସ୍ଥ୍ୟ ବିଷୟରେ ପୂର୍ବରୁ ବିଭିନ୍ନ ଖବର ପ୍ରଚାର କରାଯାଉଛି। ଏହି ରିପୋର୍ଟ ପରେ ପୁଟିନଙ୍କ ସ୍ବାସ୍ଥ୍ୟ ଚିନ୍ତା ପୁଣି ଥରେ ଚର୍ଚ୍ଚାର ବିଷୟ ପାଲଟିଛି। ତେବେ ବର୍ତ୍ତମାନ ସୁଦ୍ଧା ଏହା ନିଶ୍ଚିତ ହୋଇପାରି ନାହିଁ । ଅପରପକ୍ଷରେ, ୟୁକ୍ରେନ ଉପରେ ରୁଷିଆର ଆକ୍ରମଣ ବର୍ତ୍ତମାନ ପର୍ଯ୍ୟନ୍ତ ବନ୍ଦ ହେବାର ନାମ ନେଉନାହିଁ।
କୁହାଯାଉଛି ଯେ ୟୁକ୍ରେନ ଯୁଦ୍ଧ ଦୀର୍ଘ ସମୟ ଧରି ଚାଲିବ ଏବଂ ପୁଟିନ ଏଥିପାଇଁ ଯୋଜନା କରୁଛନ୍ତି। ନିକଟରେ ଆମେରିକାର ନ୍ୟାଶନାଲ ଇଣ୍ଟେଲିଜେନ୍ସର ନିର୍ଦ୍ଦେଶକ ଆଭ୍ରିଲ ହେନ୍ସ କହିଛନ୍ତି ଯେ ପୁଟିନ ଡୋନାବାସ ଅଞ୍ଚଳରେ ନିଜର ଅଭିଯାନ ଶେଷ ନ କଲା ପର୍ଯ୍ୟନ୍ତ ଯୁଦ୍ଧକୁ ସମାପ୍ତ କରିବେ ନାହିଁ। ବର୍ତ୍ତମାନ ପର୍ଯ୍ୟନ୍ତ, ଏହି ପ୍ରସଙ୍ଗରେ ରୁଷିଆ ପକ୍ଷରୁ କୌଣସି ବିବୃତ୍ତି ଜାରି କରାଯାଇ ନାହିଁ।
