ଗ୍ଲାସଗୋ,୧।୭: ସବୁଠାରୁ ଖରାପ ପ୍ରଦର୍ଶନ କରିଥିଲେ ମଧ୍ୟ ୟୁକ୍ରେନ ଭାଗ୍ୟ ବଳରେ ୟୁରୋକପ୍ ରାଉଣ୍ଡ ଅଫ୍ ୧୬ରେ ପ୍ରବେଶ କରିଥିଲା। ଲିଗ୍ ପର୍ଯ୍ୟାୟରେ ଗୋଟିଏ ହେଲେ ବିଜୟ ହାସଲ କରି ନ ଥିଲେ ମଧ୍ୟ ୟୁକ୍ରେନ ପ୍ରି- କ୍ୱାର୍ଟରରେ ପ୍ରବେଶ କରିଥିଲା ଓ ଏବେ କ୍ୱାର୍ଟର ଫାଇନାଲ ଟିକେଟ ମଧ୍ୟ ହାସଲ କରିଛି। ମଙ୍ଗଳବାର ଅନୁଷ୍ଠିତ ରାଉଣ୍ଡ ଅଫ୍ ୧୬ ମ୍ୟାଚ୍ରେ ୟୁକ୍ରେନ୍ ୨-୧ଗୋଲରେ ସ୍ବିଡେନକୁ ହରାଇ ବିପର୍ଯ୍ୟୟ ଘଟାଇବା ସହ ପ୍ରଥମଥର ପାଇଁ ୟୁରୋକପ୍ କ୍ୱାର୍ଟରକୁ ଉଠିଛି।
ମ୍ୟାଚ୍ର ୨୭ ମିନିଟ୍ରେ ଓଲେକଜାଣ୍ଡର ଜିନଚେଙ୍କୋ ପ୍ରଥମ ଗୋଲ ଦେଇ ୟୁକ୍ରେନକୁ ଅଗ୍ରଣୀ କରାଇଥିଲେ। ଏହାପରେ ୪୩ତମ ମିନିଟ୍ରେ ସ୍ବିଡେନର ଏମିଲ ଫୋର୍ସବର୍ଗ ଗୋଲ ଦେଇ ମ୍ୟାଚ୍କୁ ୧-୧ ବରାବର ସ୍ଥିତିକୁ ଆଣିଥିଲେ। ତେବେ ଅତିରିକ୍ତ ସମୟ ଶେଷ ହେବାର କିଛି ସମୟ ପୂର୍ବରୁ (୧୨୧ତମ ମିନିଟ୍) ଅର୍ଟେମ ଡୋବୋଓ୍ବିକ୍ ଗୋଲ ଦେଇ ୟୁକ୍ରେନ୍କୁ ବିଜୟୀ କରାଇଥିଲେ। ଏବେ ଶନିବାର ରୋମ୍ରେ ୟୁକ୍ରେନ କ୍ୱାର୍ଟର ଫାଇନାଲରେ ଇଂଲଣ୍ଡକୁ ଭେଟିବ। ୟୁକ୍ରେନର ଏହି ବିଜୟ ସହ ଟୁର୍ନାମେଣ୍ଟରେ କ୍ୱାର୍ଟର ଫାଇନାଲ ଲାଇନ୍ ଅପ୍ ସ୍ପଷ୍ଟ ହୋଇଛି। ଏଥିସହ ଦ୍ୱିତୀୟଥର କୌଣସି ମେଜର ଟୁର୍ନାମେଣ୍ଟରେ ୟୁକ୍ରେନ କ୍ୱାର୍ଟରକୁ ଉଠିଛି। ପୂର୍ବରୁ ୟୁକ୍ରେନ ୨୦୦୬ ବିଶ୍ୱକପ୍ରେ କ୍ୱାର୍ଟରକୁ ଉଠିଥିଲା। ଗୋଲ ସ୍କୋର କରିବାର କେତୋଟି ସୁଯୋଗ ମିଳିଥିଲା। ତେବେ ଏହା ସଦ୍ବ୍ୟବହାର କରି ନ ପାରିବାରୁ ଆମେ ହାରିଲୁ ବୋଲି ସ୍ବିଡେନ କୋଚ୍ ଜେନ୍ ଏଣ୍ଡରସନ କହିଛନ୍ତି। ଦ୍ୱିତୀୟାର୍ଦ୍ଧରେ ଗୋଲ ସ୍କୋର କରିବାରୁ ସୁଯୋଗ ଆମ ପାଖରେ ଥିଲା। ଏହି ବିଜୟ ଦୁଃଖଦାୟକ ବୋଲି ସେ କହିଛନ୍ତି।