ମସ୍କୋ, ୧୪ା୨: ୟୁକ୍ରେନ ଓ ରୁଷିଆ ମଧ୍ୟରେ ଯୁଦ୍ଧ ସ୍ଥିତି ଟାଳିବାକୁ ଶନିବାର ଆମେରିକା ରାଷ୍ଟ୍ରପତି ଜୋ ବାଇଡେନ୍ ଏବଂ ରୁଷିଆ ପ୍ରତିପକ୍ଷ ଭ୍ଲାଡିମିର ପୁଟିନ୍ଙ୍କ ମଧ୍ୟରେ ୬୨ ମିନିଟ୍ ଧରି ହୋଇଥିବା ଆଲୋଚନା ଫଳପ୍ରଦ ହୋଇପାରିନାହିଁ। ବାଇଡେନ୍ ଯୁଦ୍ଧ ଏଡ଼ାଇବା ପାଇଁ ପୁଟିନ୍ଙ୍କୁ କହିବା ସହ ୟୁକ୍ରେନ ଉପରେ ଆକ୍ରମଣ କଲେ ଭୟଙ୍କର ପରିଣାମ ଭୋଗିବାକୁ ପଡ଼ିବ ବୋଲି ଚେତାବନୀ ମଧ୍ୟ ଦେଇଛନ୍ତି। ଏଥିସହ ୟୁକ୍ରେନ ପ୍ରସଙ୍ଗରେ କୂଟନୈତିକ ଆଲୋଚନା ପାଇଁ ଆମେରିକା ସର୍ବଦା ପ୍ରସ୍ତୁତ ବୋଲି ବାଇଡେନ୍ କହିଛନ୍ତି। ଏହି ଆଲୋଚନା ପରେ ରୁଷିଆ ଆମେରିକାକୁ କଡ଼ା ସମାଲୋଚନା କରିଛି। ଆମେରିକାର ପାଗଳାମି ଶୀର୍ଷରେ ପହଞ୍ଚିଛି ବୋଲି କ୍ରେମ୍ଲିନ୍ର ପ୍ରମୁଖ ବୈଦେଶିକ ନୀତି ପରାମର୍ଶଦାତା ୟୁରି ଉଶାକୋଭ୍ କହିଛନ୍ତି।
କନ୍ଫରେନ୍ସରେ ଉଶାକୋଭ୍ କହିଛନ୍ତି, ବାଇଡେନ୍ ଏବଂ ପୁଟିନଙ୍କ ମଧ୍ୟରେ ସୋମବାର ଆଲୋଚନା ପାଇଁ ସ୍ଥିର ହୋଇଥିଲା। କିନ୍ତୁ ଆମେରିକା ଅପେକ୍ଷା କରି ନ ପାରି ଶନିବାର କଥାବାର୍ତ୍ତା ନିମନ୍ତେ ଅନୁରୋଧ କରିଥିଲା। ରୁଷିଆର ଆଭିମୁଖ୍ୟକୁ ନେଇ ଆମେରିକା ମିଥ୍ୟା ପ୍ରଚାର କରିବାରେ ଲାଗିଛି। ଏପରି କି ୟୁକ୍ରେନ ଉପରେ ରୁଷିଆ କେବେ ଆକ୍ରମଣ କରିବ ସେ ନେଇ ତାରିଖ ବି ବାହାର କରିସାରିଛି। ପାଶ୍ଚାତ୍ୟ ଦେଶଗୁଡ଼ିକ ୟୁକ୍ରେନକୁ ଅସ୍ତ୍ର କରିଛନ୍ତି। ୟୁକ୍ରେନରେ ବିବାଦର ଅନ୍ତ ଘଟାଇବା ପାଇଁ ହୋଇଥିବା ଚୁକ୍ତିକୁ ମଧ୍ୟ ପାଶ୍ଚାତ୍ୟ ଦେଶ ଉଲ୍ଲଂଘନ କରିଛନ୍ତି ବୋଲି ପୁଟିନ୍ ଅଭିଯୋଗ କରିଥିବା ଉଶାକୋଭ୍ କହିଛନ୍ତି। ତେବେ ବାଇଡେନ୍ଙ୍କ ଦୃଷ୍ଟିକୋଣକୁ ମସ୍କୋ ବିଚାର କରି ଓ୍ବାଶିଂଟନ୍ ଏବଂ ନାଟୋ ପ୍ରସ୍ତାବର ଜବାବ ଦେବ ବୋଲି ଉଶାକୋଭ୍ ପ୍ରକାଶ କରିଛନ୍ତି।
ଅଷ୍ଟ୍ରେଲିଆ ଦୂତାବାସ ଖାଲି କରିବାକୁ ନିର୍ଦ୍ଦେଶ
ୟୁକ୍ରେନ ରାଜଧାନୀ କ୍ୱିଭ୍ରେ ଥିବା ଅଷ୍ଟ୍ରେଲିଆ ଦୂତାବାସରୁ ସମସ୍ତ କର୍ମଚାରୀଙ୍କୁ ଫେରିଆସିବାକୁ ପ୍ରଧାନମନ୍ତ୍ରୀ ସ୍କଟ୍ ମୋରିସନ୍ ନିର୍ଦ୍ଦେଶ ଦେଇଛନ୍ତି। ଏଥିସହ ୟୁକ୍ରେନରେ ଥିବା ସମସ୍ତ ଅଷ୍ଟ୍ରେଲିଆ ନାଗରିକଙ୍କୁ ମଧ୍ୟ ସେହି ସ୍ଥାନ ଛାଡ଼ିବାକୁ କହିଛନ୍ତି। ଶନିବାର ଆମେରିକା ରାଷ୍ଟ୍ରପତି ଜୋ ବାଇଡେନ୍ ଏବଂ ରୁଷିଆ ପ୍ରତିପକ୍ଷ ଭ୍ଲାଡିମିର ପୁଟିନଙ୍କ ମଧ୍ୟରେ ଫୋନ୍ ଯୋଗେ ଆଲୋଚନା ବିଫଳ ହେବା ପରେ ଅଷ୍ଟ୍ରେଲିଆ ଏହି ନିଷ୍ପତ୍ତି ନେଇଛି। ଏହାସହ କ୍ୱିଭ୍ଠାରୁ ପ୍ରାୟ ୫୪୦ କି.ମି ଦୂର ପୋଲାଣ୍ଡର ସହର ଲଭିଭ୍କୁ ଦୂତାବାସର ଅପରେଶନ ସ୍ଥାନାନ୍ତର କରାଯିବ ବୋଲି ମୋରିସନ୍ କହିଛନ୍ତି। ରୁଷିଆର ଏକଚ୍ଛତ୍ରବାଦୀ ଏବଂ ମନମୁଖି କାର୍ଯ୍ୟକୁ ସେ ନିନ୍ଦା କରିବା ସହ ଏହି ପ୍ରସଙ୍ଗରେ ଚାଇନା ନୀରବ ରହିବାକୁ ସମାଲୋଚନା କରିଛନ୍ତି।
ସାଟେଲାଇଟ୍ରେ ଯୁଦ୍ଧ ପ୍ରସ୍ତୁତି ଚିତ୍ର
ୟୁକ୍ରେନକୁ ଘେରିବା ପାଇଁ ରୁଷିଆ ବେଲାରୁଷ୍, କ୍ରିମିଆ ଏବଂ ପଶ୍ଚିମ ରୁଷିଆ ସୀମାରେ ବ୍ୟାପକ ସୈନ୍ୟ ମୁତୟନ କରିଥିବା ସାଟେଲାଇଟ୍ ଚିତ୍ରରେ ଦେଖିବାକୁ ମିଳିଛି। ମାକ୍ସର ଦ୍ୱାରା ଏହି ଚିତ୍ର ସଂଗ୍ରହ କରାଯାଇଛି। କ୍ରିମିଆରେ ଓକ୍ଟ୍ୟାବ୍ରସ୍କୋୟେ ଏୟାର ଫିଲ୍ଡରେ ଗତ ୧୦ ତାରିଖରେ ବଡ଼ ସଂଖ୍ୟାରେ ସୈନ୍ୟ ମୁତୟନ ହୋଇଛି। ୫୫୦ରୁ ଅଧିକ ଟେଣ୍ଟ ଏବଂ ଶତାଧିକ ଯୁଦ୍ଧବାହନ ରହିଛି। ଡୋନୁଜ୍ଲାଭ୍ ହ୍ରଦ ନିକଟରେ ମଧ୍ୟ ରୁଷିଆର ସୈନିକ ଜଗିରହିଥିବାବେଳେ ନୁଭୋଜେନୋୟେ ନିକଟରେ ତାଲିମ କାର୍ଯ୍ୟକ୍ରମ ଚାଲିଥିବା ଦେଖାଯାଇଛି। କ୍ରିମିଆର ଉତ୍ତରପଶ୍ଚମ ଉପକୂଳରେ ଥିବା ସ୍ଲାଭ୍ନେ ସହର ନିକଟରେ ରୁଷିଆ ସୈନ୍ୟ ପହଞ୍ଚିଛନ୍ତି। ସେହିପରି ବେଲାରୁଷ୍ରେ ଜ୍ୟାବ୍ରୋଭ୍କା ଏୟାରଫିଲ୍ଡଠାରେ ରୁଷିଆ ଯୁଦ୍ଧବାହନ, ହେଲିକପ୍ଟର ସହ ସୈନ୍ୟ ମୁତୟନ କରିଛି। ଏହି ସ୍ଥାନ ୟୁକ୍ରେନଠାରୁ ମାତ୍ର ୨୫ କିମି ଦୂରରେ ଅବସ୍ଥିତ। ସେହିପରି ୟୁକ୍ରେନ ସୀମାଠାରୁ ୪୫ କିମିରୁ କମ୍ ଦୂର ବେଲାରୁଷ୍ର ରେଚିଷ୍ଟା ସହରରେ ମଧ୍ୟ କ୍ରେମଲିନ୍ ପକ୍ଷରୁ ସୈନ୍ୟ ପଇଁତରା ମାରୁଛନ୍ତି। ପଶ୍ଚିମ ରୁଷିଆ ସୀମା ନିକଟରେ ବ୍ୟାପକ ସଂଖ୍ୟାରେ ସୈନ୍ୟ ମୁତୟନ ହୋଇଥିବା ଉପଗ୍ରହ ଚିତ୍ରରୁ ସ୍ପଷ୍ଟ ହୋଇଛି।