ନୂଆଦିଲ୍ଲୀ,୨୮।୩: ୟୁକ୍ରେନରୁ ଭାରତ ଫେରିଥିବା ଡାକ୍ତରୀ ଛାତ୍ରମାନଙ୍କୁ ଭାରତରେ ଏମ୍ବିବିଏସ୍ ଡିଗ୍ରୀ ହାସଲ କରିବାର ସୀମିତ ସୁଯୋଗ ଦିଆଯିବ। କେନ୍ଦ୍ର ସରକାରଙ୍କ ଏକ ଉତ୍ତର ପରେ ସୁପ୍ରିମକୋର୍ଟ ଏହାର ସମାଧାନ କରିଦେଇଛନ୍ତି। ସୁପ୍ରିମକୋର୍ଟର ଜଷ୍ଟିସ ବି.ଆର ଗଭାଇଙ୍କ ନେତୃତ୍ୱରେ ଏକ ବେଞ୍ଚ କହିଛନ୍ତି ଯେ, ୟୁକ୍ରେନ୍ରୁ ଫେରିଥିବା ଛାତ୍ରୀଛାତ୍ରମାନଙ୍କୁ ଭାରତର କଲେଜରେ ଆଡମିଶନ ନ ଦେବା ନିଷ୍ପତ୍ତିରେ ସେ କୌଣସି ଦଖଲ ଦେବେ ନାହିଁ। କାରଣ ନିୟମରେ ଏହାର କୌଣସି ସ୍ଥାନ ନାହିଁ। କିନ୍ତୁ ଉଭୟ ପରୀକ୍ଷାରେ ଉତ୍ତୀର୍ଣ୍ଣ ହେବା ପାଇଁ ମାତ୍ର ଗୋଟିଏ ଥର ସୁଯୋଗ ଦେବା ଠିକ ନୁହେଁ। ଉଭୟ ପରୀକ୍ଷାରେ ୨ଥର ସୁଯୋଗ ଦିଆଯିବା ଉଚିତ୍ ବୋଲି କୋର୍ଟ କହିଛନ୍ତି। ମଙ୍ଗଳବାର ଏହି ନିର୍ଦ୍ଦେଶ ସହିତ କୋର୍ଟ ସମସ୍ତ ଆବେଦନ ଉପରେ ଶୁଣାଣି ବନ୍ଦ କରିଦେଇଛନ୍ତି। ସୂଚନା ମୁତାବକ, ଗତ ବର୍ଷ ମାର୍ଚ୍ଚରେ ୟୁକ୍ରେନ୍ରୁ ଫେରିଥିବା ଡାକ୍ତରୀ ଛାତ୍ରମାନଙ୍କୁ ଭାରତର ମେଡିକାଲ କଲେଜରେ ପ୍ରବେଶ କରିବାକୁ ସୁପ୍ରିମକୋର୍ଟରେ ଏକ ଆବେଦନ କରାଯାଇଥିଲା। ତେବେ ଭାରତ କଲେଜରେ ଏହି ଛାତ୍ରମାନଙ୍କୁ ଆଡମିଶନ ଦେବା ସମ୍ଭବ ନୁହେଁ ବୋଲି ସରକାର ସ୍ପଷ୍ଟ କରିଥିଲେ। କିନ୍ତୁ ସେମାନଙ୍କୁ ୨ଟି ଭାଗରେ ଏମ୍ବିବିଏସ୍ ପରୀକ୍ଷା ଦେଇ ଡିଗ୍ରୀ ହାସଲ କରିବାର ସୁଯୋଗ ଦିଆଯିବ ବୋଲି ସରକାର କହିଥିଲେ। ଏହି ସୁବିଧା କେବଳ ସେହି ଛାତ୍ରମାନଙ୍କୁ ଦିଆଯିବ, ଯେଉଁମାନଙ୍କର ୟୁକ୍ରେନରେ ଡାକ୍ତରୀ ପାଠ୍ୟକ୍ରମ ଶେଷ ୨ ବର୍ଷ ରହିଯାଇଥିଲା। ଏହି ପରୀକ୍ଷା ଭାରତୀୟ ପାଠ୍ୟକ୍ରମ ଅନୁଯାୟୀ ହେବ। ଏହାପରେ ୨ ବର୍ଷର ଇଣ୍ଟର୍ନସିପ୍ ମଧ୍ୟ କରିବାକୁ ପଡ଼ିବ। ଉଭୟ ପରୀକ୍ଷାରେ ଉତ୍ତୀର୍ଣ୍ଣ ହେବା ପାଇଁ କେବଳ ଥରେ ମାତ୍ର ସୁଯୋଗ ଦିଆଯିବ ବୋଲି କେନ୍ଦ୍ର ସରକାର ସୁପ୍ରିମକୋର୍ଟଙ୍କୁ କହିଥିଲେ।