କ୍ୱିଭ,୨୬ ।୨: କିଛି ସମୟର ନିରବତା ପରେ ପୁଣି ୟୁକ୍ରେନ ଉପରେ ଗର୍ଜିଛି ରୁଷିଆ । ୟୁକ୍ରେନର ରାଜଧାନୀ କ୍ୱିଭର ଶୁଲ୍ୟାବକା ଓ ବେରେଷ୍ଟିସ୍କାରେ ମେଶିନ ଗନରୁ ଗୁଳି ବର୍ଷଣ କରାଯାଇଥିବା ଖବର ଆସିଛି । ୟୁକ୍ରେନରେ ଯୁଦ୍ଧର ତୃତୀୟ ଦିନରେ ରୁଷିଆ ପକ୍ଷରୁ ସକାଳୁ ସକାଳୁ ଶୁଲ୍ୟାବକାର ସିଟି ଜୁ ନିକଟରେ ୫୦ରୁ ଅଧିକ ବିସ୍ଫୋରଣ ହେବା ସହ ମେଶିନ ଗନରୁ ଫାୟରିଂ ହୋଇଥିବା କୁହାଯାଉଛି । ଏଥିରେ ରାଜଧାନୀ କ୍ୱିଭ ସମ୍ପୂର୍ଣ୍ଣ ଭାବେ ଦୋହଲି ଯାଇଥିବା କୁହାଯାଉଛି । ଗୋଟିଏ ପଟେ ରୁଷିଆର ଘନ ଘନ ଆକ୍ରମଣ ଓ ଅନ୍ୟପଟେ ୟୁକ୍ରେନ ଭୁସୁଡି ପଡିବାର ଚିତ୍ର ସାରା ବିଶ୍ୱକୁ ଚିନ୍ତାରେ ପକାଇ ଦେଇଛି । ବହୁ ଚେଷ୍ଟା ପରେ ବି ରୁଷିଆ ୟୁକ୍ରେନ ଉପରେ ଆକ୍ରମଣକୁ ଏପର୍ଯ୍ୟନ୍ତ ବନ୍ଦ କରିନାହିଁ ।