କିଭ୍, ୨୩।୬: ଫେବୃୟାରୀ ୨୪ରେ ୟୁକ୍ରେନ୍ ଉପରେ ରୁଷିଆ ଆକ୍ରମଣର ଖବର ସଂଗ୍ରହ କରୁଥିବା ଜଣେ ୟୁକ୍ରେନୀୟ ଏବଂ ତାଙ୍କୁ ସୁରକ୍ଷା ଦେଉଥିବା ଜଣେ ସୈନ୍ୟଙ୍କୁ ହତ୍ୟା କରାଯାଇଛି। ଏ ନେଇ ପ୍ରେସ୍ ଫ୍ରିଡମ୍ ଗ୍ରୁପ୍ ‘ରିପୋଟର୍ସ ଓ୍ବିଦ୍ଆଉଟ୍ ବର୍ଡର୍ସ’ ପକ୍ଷରୁ ବୁଧବାର ସୂଚନା ଦିଆଯାଇଛି। ଫଟୋ ଜର୍ନାଲିଷ୍ଟ୍ ମାକ୍ସ ଲେଭିନ୍ କିଭ୍ରେ ତାଙ୍କ ହଜିଯାଇଥିବା କ୍ୟାମେରା ଡ୍ରୋନ୍ ଖୋଜୁଥିବାବେଳେ ୟୁକ୍ରେନ୍ ସୈନ୍ୟ ଓଲେକ୍ସି ଜୋନିଶୋଭ୍ ତାଙ୍କୁ ସହାୟତା କରୁଥିଲେ। ହେଲେ ସେମାନଙ୍କ ଆଉ ପତ୍ତା ମିଳି ନ ଥିଲା।
ପ୍ରେସ୍ ଫ୍ରିଡମ୍ ଗ୍ରୁପ୍ ପକ୍ଷରୁ ଯାଇଥିବା ତଦନ୍ତକାରୀ ଟିମ୍ ଏପ୍ରିଲ ୧ରେ ଉଭୟଙ୍କ ମୃତଦେହ ସେଠାରୁ ଠାବ କରିଥିଲେ। ସେମାନଙ୍କ ଉପରକୁ ରୁଷୀୟ ସୈନ୍ୟ ଗୁଳି ଚଳାଇଥିଲେ। ଏଥିରେ କ୍ଷତିଗ୍ରସ୍ତ ହୋଇଥିବା ସେମାନଙ୍କ କାର୍ରେ ୧୪ଟି ବୁଲେଟ୍ କଣା ଦେଖିବାକୁ ମିଳିଥିଲା। ଘଟଣାସ୍ଥଳରୁ କିଛି ଖାଦ୍ୟ ସାମଗ୍ରୀ ଓ ଅଧାଜଳା ସିଗାରେଟ୍ ମଧ୍ୟ ମିଳିଛି। ରୁଷିଆ ସୈନ୍ୟମାନେ ସେଠାରେ ଏସବୁ ସାମଗ୍ରୀ ଛାଡ଼ିଥିବା ଉକ୍ତ ଗ୍ରୁପ୍ ପକ୍ଷରୁ କୁହାଯାଇଛି। ସେଠାରୁ ଲେଭିନ୍ ଓ ଚେର୍ନିଶୋଭ୍ଙ୍କ ପରିଚୟ ପତ୍ର, ବୁଲେଟପ୍ରୁଫ୍ ପୋଷାକ, ହେଲମେଟ ଆଦି ମିଳିଛି। ଚେର୍ନିଶୋଭଙ୍କ ଅର୍ଦ୍ଧଦଗ୍ଧ ଶରୀର ନିକଟରୁ ଗ୍ୟାସୋଲିନ୍ କ୍ୟାନ୍ ମଧ୍ୟ ଜବତ ହୋଇଛି।