କ୍ୱିଭ୍,୯ ।୪: ୟୁକ୍ରେନର ବୁଚା ସହରରେ ନରସଂହାରର ନୂଆ ନୂଆ ଚିତ୍ର ପ୍ରତିଦିନ ସାମ୍ନାକୁ ଆସୁଛି । ୟୁକ୍ରେନ୍ର ପ୍ରୋସିକ୍ୟୁଟର ଜେନେରାଲଙ୍କ କାର୍ଯ୍ୟାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ, ବୁଚାରେ ଥିବା ଏକ ଚର୍ଚ୍ଚ ନିକଟରେ ସାମୁହିକ କବର ସ୍ଥାନରୁ ୬୭ ମୃତଦେହ ମିଳିଛି । ଏହି କବରସ୍ଥାନ ସମ୍ପର୍କରେ ସେତେବେଳେ ଜଣାପଡିଥିଲା ଯେତେବେଳେ ରୁଷିଆ ସେନା ସେଠାରୁ ଚାଲିଯିବା ପରେ ଖବରଦାତା ଓ କେତେଜଣ ୟୁକ୍ରେନ୍ ବାସିନ୍ଦା ସେଠାକୁ ଯାଇଥିଲେ । ଯେତେବେଳେ ଏହି ମୃତଦେହ ଗୁଡିକୁ ବାହାରକୁ ବାହାର କରାଯାଇଥିଲା ସେତେବେଳେ ମୃତଦେହ ଗୁଡିକ କଳା ପଲିଥିନରେ ଗୁଡାଇ ମାଟି ଓ ପତ୍ରରେ ଘୋଡାଇ ଦିଆଯାଇଥିବା ଦେଖିବାକୁ ମିଳିଥିଲା । ଏମାନଙ୍କ ମଧ୍ୟରୁ ଅଧିକାଂଶ ମୃତଦେହରେ ଗୁଳି ବାଜିଥିବାର ଚିହ୍ନ ରହିଥିଲା ।
ଶୁକ୍ରବାର ପ୍ରୋସିକ୍ୟୁଟର ଜେନେରାଲ ଇରିନା ୱେନେଡିକ୍ତୋଭା କହିଛନ୍ତି, ଏବେ ପର୍ଯ୍ୟନ୍ତ ୧୮ ମୃତଦେହ ମିଳିଛି ସେଥିମଧ୍ୟରୁ ୧୬ ଜଣଙ୍କ ଶରୀରରେ ଗୁଳି ବାଜିଥିବା ବେଳେ ୨ ଜଣଙ୍କ ଶରୀରରେ ଗୁଳି ସହ ଧାରୁଆ ଅସ୍ତ୍ରରେ କଟାଯାଇଥିବା ଚିହ୍ନ ରହିଛି । ଇରିନା ୱେନେଡିକ୍ତୋଭା କହିଛନ୍ତି ଏଥିରୁ ଅନୁମାନ କରାଯାଉଛି କି ରୁଷିଆର ସେନା ଲୋକଙ୍କୁ ଜୀବନରୁ ମାରି ଦେବା ସହ ସେମାନଙ୍କ ଉପରକୁ ଗୁଳି କରିଛନ୍ତି ।
ଶୁକ୍ରବାର ବୁଚା ଯାତ୍ରା ସମୟରେ , ୟୁରୋପୀୟ ଆୟୋଗର ମୁଖ୍ୟ ଉର୍ସୁଲା ୱାନ ଡେର ଲେୟେନ କହିଛନ୍ତି ନାଗରିକଙ୍କ ହତ୍ୟା ରୁଷିଆର ବର୍ବରତାକୁ ଦର୍ଶାଉଛି । ଏଥିରୁ ପୁଟିନ ସେନାଙ୍କ ଉଗ୍ର ଚେହେରା ସ୍ପଷ୍ଟ ବାରି ହୋଇ ପଡୁଛି । ପ୍ରୋସିକ୍ୟୁଟର ଜେନରାଲଙ୍କ କାର୍ଯ୍ୟାଳୟ ଏହି ମୃତ୍ୟୁ ସହିତ ଅନ୍ୟ ଘଟଣାର ବି ଯାଞ୍ଚ କରୁଛି ଯାହା ଯୁଦ୍ଧ ଅପରାଧ ସହ ଜଡିତ ।
