ନୂଆଦିଲ୍ଲୀ,୧୮।୧୨: ଦିଲ୍ଲୀ ଦଙ୍ଗା ସହ ଜଡିତ ଏହି ମାମଲାରେ ଅଭିଯୁକ୍ତ ଉମର ଖଲିଦ ବୁଧବାର କୋର୍ଟରୁ ଏକ ବଡ ଆଶ୍ୱସ୍ତି ପାଇଛନ୍ତି। ଦିଲ୍ଲୀର କର୍କରଡୁମା କୋର୍ଟ ତାଙ୍କୁ ସାତ ଦିନର ଅନ୍ତରୀଣ ଜାମିନ ପ୍ରଦାନ କରିଛନ୍ତି। ୨୮ ଡିସେମ୍ବରରୁ ୩ ଜାନୁୟାରୀ ପର୍ଯ୍ୟନ୍ତ ଉମର ଖଲିଦଙ୍କୁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରାଯାଇଛି। ତାଙ୍କ ସମ୍ପର୍କୀୟ ଭାଇ ଓ ଭଉଣୀଙ୍କ ବିବାହରେ ଯୋଗଦେବା ପାଇଁ ଉମର ଖଲିଦ ୧୦ ଦିନ ପାଇଁ ମଧ୍ୟବର୍ତ୍ତୀକାଳୀନ ଜାମିନ ମାଗିଥିଲେ।
ଏହି ମାମଲାରେ ପୋଲିସ ଏହାର ଉତ୍ତର ଉପସ୍ଥାପନ କରିବାକୁ ସମୟ ମାଗିଥିଲା। ୨୦୨୦ ଦିଲ୍ଲୀ ଦଙ୍ଗାରେ ୫୩ ଜଣଙ୍କର ମୃତ୍ୟୁ ଘଟିଥିବା ବେଳେ ୭୦୦ରୁ ଅଧିକ ଲୋକ ଆହତ ହୋଇଥିଲେ। ଏହି ଘଟଣା ପରେ ଉମର ଖଲିଦଙ୍କୁ ୧୩ ସେପ୍ଟେମ୍ବର ୨୦୨୦ରେ ଗିରଫ କରାଯାଇଥିଲା। ସେ ଚାରି ବର୍ଷରୁ ଅଧିକ ସମୟ ଜେଲରେ ଅଛନ୍ତି।
ଉମର ଖାଲିଦ ମଧ୍ୟ ସୁପ୍ରିମକୋର୍ଟରେ ଜାମିନ ଆବେଦନ କରିଥିଲେ ମଧ୍ୟ ନିମ୍ନ ଅଦାଲତଙ୍କ ନିକଟକୁ ଯିବାକୁ କୋର୍ଟ ପରାମର୍ଶ ଦେଇଛନ୍ତି। ଏହା ପରେ ଉମର ତାଙ୍କ ଆବେଦନ ପ୍ରତ୍ୟାହାର କରିନେଲେ। ଖଲିଦଙ୍କୁ ଆଇପିସି, ୧୯୬୭ ଆର୍ମସ ଆକ୍ଟ ଏବଂ ବେଆଇନ କାର୍ଯ୍ୟକଳାପ (ପ୍ରତିରୋଧ) ଅଧିନିୟମ (UAPA) ଅନୁଯାୟୀ ଅଭିଯୋଗ କରାଯାଇଛି। ଏହା ବ୍ୟତୀତ ଆଇପିସିର ବିଭିନ୍ନ ବିଭାଗରେ ଚାର୍ଜ ମଧ୍ୟ ପଞ୍ଜିକୃତ ହୋଇଛି।