ନୂଆଦିଲ୍ଲୀ,୧୦।୧୦: ଚଳିତ ଆଇପିଏଲରେ ୧୫୦ରୁ ଅଧିକ ବେଗରେ ବୋଲିଂ କରି ଚର୍ଚ୍ଚକୁ ଆସିଥିଲେ ଉମରାନ ମଲିକ। ଆଗାମୀ ଟି୨୦ ବିଶ୍ୱକପ୍ ଲାଗି ତାଙ୍କୁ ଭାରତୀୟ ଦଳରେ ସାମିଲ କରାଯାଇଛି। ତେବେ ନେଟ୍ ବୋଲର ଭାବେ ଭାରତୀୟ ଦଳ ସହ ସେ ୟୁଏଇରେ ରହିବେ। ଏ ନେଇ ଶନିବାର ସନରାଇଜର୍ସ ହାଇଦ୍ରାବାଦ୍ର ଅଧିକାରୀମାନେ ସ୍ପଷ୍ଟ କରିଛନ୍ତି।
ଜମ୍ମୁ-କଶ୍ମୀରର ଏହି ପେସରଙ୍କ ପାଖରେ ବିଶେଷ ଅଭିଜ୍ଞତା ନାହିଁ। ଚଳିତ ଆଇପିଏଲରେ ଉମ୍ରାନଙ୍କୁ ୩ ମ୍ୟାଚ୍ରେ ଖେଳିବାକୁ ସୁଯୋଗ ଦେଇଥିଲା ହାଇଦ୍ରାବାଦ୍। ଏଥିରେ ସେ ୧୫୦ରୁ ଅଧିକ ବେଗରେ ବୋଲିଂ କରି ସଭିଙ୍କୁ ଚମକାଇ ଦେଇଥିଲେ। କୋଭିଡ୍ କାରଣରୁ ହାଇଦ୍ରାବାଦ୍ ପେସର ଟି. ନଟରାଜନ ଖେଳିବା ପାଇଁ ଉପଲବ୍ଧ ନ ଥିବାରୁ ମଲିକଙ୍କ ସହ ସନରାଇଜର୍ସ ଶର୍ଟ ଟର୍ମ ଚୁକ୍ତି କରିଥିଲା। ହାଇଦ୍ରାବାଦ୍ର ଅଭିଯାନ ଶେଷ ହେବା ପରେ ମଲିକଙ୍କୁ ବିସିସିଆଇ ତା’ର ନିଷ୍ପତ୍ତି ସମ୍ପର୍କରେ ଜଣାଇ ଦେଇଛି।