ନ୍ୟୁୟର୍କ,୧୦ ।୯: ଆଫଗାନିସ୍ତାନରେ ତାଲିବାନ ଏବେ ସରକାର ଗଠନ କରି ସାରିଛି । ଏବେ ସମସ୍ତଙ୍କ ନଜର କେଉଁ କେଉଁ ଦେଶ ତାଲିବାନକୁ ମାନ୍ୟତା ଦେଉଛନ୍ତି । ବିଶ୍ୱର ଅଧିକାଂଶ ଦେଶ ତାଲିବାନର ଆତଙ୍କବାଦକୁ ଦେଖି ଏହା ଉପରେ ଭରସା କରିପାରୁ ନାହାନ୍ତି । ସମାଚାର ଏଜେନ୍ସି ଏଏଫ୍ପିର ସୂଚନା ଅନୁଯାୟୀ, ଇତିମଧ୍ୟରେ ୟୁଏନ୍ ମହାସଚିବ ଏଣ୍ଟୋନିୟୋ ଗୁତାରେସ ତାଲିବାନ ସହ କଥା ହେବାକୁ କହିଛନ୍ତି । ସେ କହିଛନ୍ତି ଆମକୁ ତାଲିବାନ ସହ କଥା ହେବାକୁ ପଡିବ । ତାହେଲେ ଯାଇ ଲକ୍ଷ ଲକ୍ଷ ଲୋକଙ୍କ ଜୀବନ ବଞ୍ଚିଯିବ । ଆଫଗାନିସ୍ତାନରେ ସରକାର ଗଠନ ପରେ ଏବେ ବିଶ୍ୱର ପ୍ରାୟ ସମସ୍ତ ଦେଶର ନଜର ତାଲିବାନ ଉପରେ । ସେ ତା’ର କଥା ଅନୁଯାୟୀ ସରକାର ଗଠନ କରିବା ସହ ଏମିତି କେତେଜଣ ନେତାଙ୍କୁ ମନ୍ତ୍ରିମଣ୍ଡଳରେ ସ୍ଥାନ ଦେଇଛି ଯେଉଁମାନଙ୍କୁ ଆତଙ୍କବାଦୀ ଘୋଷଣା କରାଯାଇ ସାରିଛି । ତେଣୁ ଏହାରି ଭିତରେ କିଛି ଦେଶ ତାଲିବାନ ସହ କଥା ହେବା ସହଜ ମଣୁ ନାହାନ୍ତି । ତାଲିବାନ ଆଫଗାନିସ୍ତାନରେ ୩୩ କ୍ୟାବିନେଟ ମନ୍ତ୍ରୀଙ୍କୁ ନେଇ ସରକାର ଗଠନ କରିଛି । ଏଥିରେ ପ୍ରଧାନମନ୍ତ୍ରୀ ମୁଲ୍ଲା ହସନ ଅଖୁତ ସହିତ ୧୪ରୁ ଅଧିକ ମନ୍ତ୍ରୀ ୟୁଏନ୍ ବା ଆମେରିକା ଦ୍ୱାରା ଆତଙ୍କବାଦୀ ଘୋଷିତ ସୂଚୀରେ ଅଛନ୍ତି । କୋଟି କୋଟି ଟଙ୍କାର ପୁରସ୍କାର ଘୋଷିତ ଆତଙ୍କବାଦୀ ସିରାଜୁଦ୍ଦିନ ହକ୍କାନିଙ୍କୁ ଗୃହମନ୍ତ୍ରୀ କରାଯାଇଛି ।