ନୂଆଦିଲ୍ଲୀ,୧୯।୨ : ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ୨୦୨୪ ମସିହାରେ ଲୋକସଭା ନିର୍ବାଚନ ପୂର୍ବରୁ ବିରୋଧୀ ଦଳଗୁଡ଼ିକୁ ଏକତ୍ର କରି ଭାଜପାକୁ କ୍ଷମତାରୁ ହଟାଇବାକୁ ଆହ୍ବାନ ଦେଇଛନ୍ତି। ୍ସେ କହିଛନ୍ତି ଯେ ଯଦି କଂଗ୍ରେସ ସମେତ ସମଗ୍ର ବିରୋଧୀ ଦଳ ଏକାଠି ହୁଅନ୍ତି, ତେବେ ୨୦୨୪ ନିର୍ବାଚନରେ ଭାଜପା ୧୦୦ ଟି ଆସନକୁ ହ୍ରାସ ପାଇବ।
ଭାଜପା ବିରୋଧରେ ନୀତୀଶ କୁମାରଙ୍କ ଦେଶବ୍ୟାପୀ ସାମ୍ମୁଖ୍ୟକୁ ନେଇ ଭାଜପା ନେତାଙ୍କ ଚିନ୍ତା ବଢ଼ିବାରେ ଲାଗିଛି। ଏନେଇ ଭାଜପା ଏମ୍ପି ରବି ଶଙ୍କର ପ୍ରସାଦ ନୀତୀଶ କୁମାରଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ନୀତୀଶ କୁମାରଙ୍କର ନିଜ ଦଳରେ ବିଶୃଙ୍ଖଳା ଅଛି। ବିହାର ପରିଚାଳନା କରିବାରେ ତାଙ୍କ ଦଳ ସକ୍ଷମ ନୁହେଁ ଏବଂ ସେ ଦେଶ ଶାସନ ବିଷୟରେ କଥାବାର୍ତ୍ତା କରୁଛନ୍ତି । ବିହାରକୁ ସମ୍ଭାଳି ପାରୁ ନ ଥିବା ନୀତୀଶ ବାବୁ ଦେଶ ଶାସନ କରିବାକୁ ସ୍ବପ୍ନ ଦେଖିବା ହାସ୍ୟାସ୍ପଦ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଭାରତ ବିଶ୍ୱରେ ଏକ ବଡ ଶକ୍ତି ପାଲଟିଛି। ଭାରତ ହେଉଛି ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି। ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ସହିତ କ’ଣ ହୋଇଛି? ସେ ବିହାରକୁ ସମ୍ଭାଳିବାରେ ଅସମର୍ଥ, ରାଜ୍ୟବାସୀ ତାଙ୍କ ଯୋଗୁ ଅସୁବିଧାରେ ଅଛନ୍ତି। ତାଙ୍କ ପାର୍ଟିର ବିଶୃଙ୍ଖଳା ନ ସଜାଡ଼ି ସେ ଦେଶକୁ ଏକଜୁଟ କରିବାକୁ ଯାଇଛନ୍ତି ଶୁଣିଲେ ହସ ମାଡ଼ିବା ସ୍ବାଭାବିକ।
ନୀତୀଶ କୁମାରଙ୍କୁ କଂଗ୍ରେସ କୌଣସି ସହାୟତା ଦେଉନାହିଁ। ଯଦି ଏହି ଅବସ୍ଥା ଜାରି ରହେ, ନୀତୀଶ ଦେବ ଗୌଡା ଏବଂ ଇନ୍ଦର କୁମାର ଗୁଜରାଲଙ୍କ ଭଳି ପ୍ରଧାନମନ୍ତ୍ରୀ ହେବେ ଏବଂ ପାଞ୍ଚ-ଛଅ ମାସରୁ ଅଧିକ ସମୟ ତାଙ୍କ ସରକାର ଚାଲିବ ନାହିଁ। ନୀତୀଶ କୁମାର ସୱପ୍ନ ଦେଖୁଛନ୍ତି ଠିକ ଅଛି, କାରଣ ସ୍ବପ୍ନ ଦେଖିବାକୁ କାହାକୁ ମନା କରାଯାଇ ପାରିବ ନାହିଁ।