ବଅଁରପାଳ,୧୧ା୩(ଡି.ଏନ.ଏ.) ଗ୍ରାମାଞ୍ଚଳର ପ୍ରତି ଘରକୁ ପାଇପ୍ ପାଣି ସଂଯୋଗ ପାଇଁ ସରକାରଙ୍କ ପକ୍ଷରୁ ଉଦ୍ୟମ ଚାଲିଛି। ସେଥିପାଇଁ ପଞ୍ଚାୟତଗୁଡ଼ିକରେ ବହୁ ଲକ୍ଷ ଟଙ୍କା ଖର୍ଚ୍ଚ କରାଯାଇ ବଡ଼ ବଡ଼ ପ୍ରକଳ୍ପମାନ କରାଯାଉଛି। କିନ୍ତୁ ଅନୁଗୋଳ ଜିଲା ବଅଁରପାଳ ବ୍ଲକ କାଣ୍ଡସର ପଞ୍ଚାୟତ କନ୍ୟାବେଡ଼ା ହରିଜନ ସାହିବାସୀ ସରକାରୀ ଯୋଜନାରେ ଏଯାଏ ଉପକୃତ ହୋଇନାହାନ୍ତି। ଗତ ୧୦ ବର୍ଷ ହେଲା ସାହିକୁ ପାଇପ୍ ପାଣି ଯୋଗାଣ ପାଇଁ ପାଇପ୍ ବିଛାଯାଇଥିଲେ ମଧ୍ୟ ଏଯାଏ ପାଣି ପହଞ୍ଚିପାରିନି। ଫଳରେ ନଳକୂଅ ଉପରେ ସାହିର ୩ଶହ ଲୋକ ନିର୍ଭର କରିଆସୁଛନ୍ତି। ତେବେ ୨ଟି ନଳକୂଅ ମଧ୍ୟରୁ ଗୋଟିଏ ଅଚଳ ହୋଇପଡ଼ିଥିବାରୁ ସମସ୍ୟା ବଢ଼ିଯାଇଛି।
କାଣ୍ଡସର ପଞ୍ଚାୟତରେ ପାଇପ୍ ଜଳ ପ୍ରକଳ୍ପ ରହିଛି। କିନ୍ତୁ କନ୍ୟାବେଡ଼ା ହରିଜନସାହି ଦୀର୍ଘବର୍ଷ ହେଲା ଉପେକ୍ଷିତ ହୋଇଆସିଛି। ସାହିକୁ କିପରି ପାଇପ୍ ପାଣି ଯୋଗାଇ ଦିଆଯିବ ସେ ନେଇ ବାରମ୍ବାର ଦାବି କରାଯାଉଥିଲେ ମଧ୍ୟ କର୍ତ୍ତୃପକ୍ଷ ଏ ଦିଗରେ ଧ୍ୟାନ ଦେଉ ନ ଥିବା ସାହିବାସୀ ଅଭିଯୋଗ କରୁଛନ୍ତି। ଗ୍ରୀଷ୍ମ ଆସିବାର ଯଥେଷ୍ଟ ପୂର୍ବରୁ ଖରାଟାଣ ଧରିସାରିଥିବାରୁ ପାନୀୟ ଜଳର ଆବଶ୍ୟକତା ଅଧିକ ବଢ଼ିଯାଇଛି। କିନ୍ତୁ ସାହିରେ ଥିବା ଅଚଳ ନଳକୂଅ ମରାମତି କରା ନ ଯିବା ଦ୍ୱାରା ମହିଳାମାନେ ଗୋଟିଏ ନଳକୂଅରୁ ପାଣି ନେବାକୁ ଘଣ୍ଟା ଘଣ୍ଟା ଅପେକ୍ଷା କରୁଛନ୍ତି। ଫଳରେ ନଳକୂଅ ନିକଟରେ ଗରା, ମାଠିଆର ଲମ୍ବା ଧାଡ଼ି ଦେଖିବାକୁ ମିଳୁଛି। ବାରମ୍ବାର ଅଭିଯୋଗ ସତ୍ତ୍ୱେ ସମସ୍ୟା ସମାଧାନ କରାଯାଉ ନ ଥିବାରୁ ଲୋକେ ପାଣି ଟୋପାଏ ପାଇଁ ହନ୍ତସନ୍ତ ହେଉଥିବା କହିଛନ୍ତି। ଏ ସମ୍ପର୍କରେ ବଅଁରପାଳ ବିଡିଓ ଏଲିଜା ମିଶ୍ରଙ୍କ ସହ ଯୋଗାଯୋଗ ସମ୍ଭବ ନ ହେବାରୁ ମତାମତ ମିଳିପାରି ନାହିଁ। କାଣ୍ଡସର ସରପଞ୍ଚ ଦୁର୍ଯ୍ୟୋଧନ ମୁଦୁଲି କହିଛନ୍ତି, ହରିଜନ ସାହିରେ ପାଇପ୍ ବିଛାଯାଇଥିଲେ ମଧ୍ୟ ୧୦ ବର୍ଷ ହେବ ପାଣି ଆସୁନି। ଲୋକେ ଅସୁବିଧାର ସମ୍ମୁଖୀନ ହେଉଥିବା ସେ ଅବଗତ ଅଛନ୍ତି। ନାଲ୍କୋ ପକ୍ଷରୁ ତୁରନ୍ତ କିପରି ପାଣି ଅସୁବିଧା କରାଯିବ ସେ ଦିଗରେ ପଦକ୍ଷେପ ନିଆଯାଉଥିବା ସରପଞ୍ଚ ପ୍ରକାଶ କରିଛନ୍ତି।
ପାଇପ୍ ପାଣିକୁ ଚାହିଁ ରହିଛୁ
ଦୀର୍ଘ ୧୦ ବର୍ଷ ତଳେ ସାହିକୁ ପାଇପ୍ ଯୋଗେ ପାଣି ଯୋଗାଣ ପାଇଁ ପାଇପ୍ ବିଛାଯାଇଥିଲା। କିନ୍ତୁ କେଉଁ କାରଣରୁ ହରିଜନସାହି ସେଥିରୁ ବଞ୍ଚିତ ହେଲା ତାହା ଜଣାନାହିଁ। ବିଳମ୍ବ ହୋଇଥିଲେ ମଧ୍ୟ ଏ ଦିଗରେ ଏବେ ଦୃଷ୍ଟି ଦିଆଗଲେ ଲୋକେ ଉପକୃତ ହୁଅନ୍ତେ।
-ମମତା ନାୟକ, ଅଞ୍ଚଳବାସୀ
ଅଭିଯୋଗ କେହି ଶୁଣୁନାହାନ୍ତି
କନ୍ୟାବେଡ଼ା ହରିଜନ ସାହିରେ ପ୍ରତିବର୍ଷ ପାନୀୟ ଜଳ ସଙ୍କଟ ଦେଖାଦେଉଛି। ଜଳ ପ୍ରକଳ୍ପରୁ ପାଣି ଯୋଗାଇ ଦିଆଯାଉ ନ ଥିବାରୁ ସାହିର ମହିଳାମାନଙ୍କୁ ଦୀର୍ଘ ସମୟ ନଳକୂଅ ନିକଟରେ ଅପେକ୍ଷା କରିବାକୁ ପଡ଼ୁଛି। ଅଚଳ ନଳକୂଅ ସଚଳ ପାଇଁ ପଞ୍ଚାୟତଠାରୁ ବ୍ଲକ ଯାଏ ସବୁଠି ଅଭିଯୋଗ କରିଥିଲେ ମଧ୍ୟ ପଦକ୍ଷେପ ନିଆଯାଉ ନାହିଁ।
-ପବିତ୍ର ନାୟକ, ଅଞ୍ଚଳବାସୀ
ଅନ୍ୟ ସାହିରୁ ଆଣିବାକୁ ପଡ଼ୁଛି
ସାହିରେ ଦୀର୍ଘଦିନ ହେବ ପିଇବା ପାଣି ସମସ୍ୟା ଲାଗି ରହିଛି। ପ୍ରତିବର୍ଷ ଖରାଦିନେ ନଳକୂଅ ଅଚଳ ହେଉଥିବା ବେଳେ ପାଇପ୍ ପାଣି ଅଭାବକୁ ଦୂର କରିପାରନ୍ତା। କିନ୍ତୁ ପଞ୍ଚାୟତ କର୍ତ୍ତୃପକ୍ଷ ଏ ନେଇ କାର୍ଯ୍ୟ କରୁ ନ ଥିବାରୁ ୧୦ ବର୍ଷ ହେଲା ଅପେକ୍ଷା କରିବାକୁ ପଡ଼ିଲାଣି। ତେଣୁ ଅନ୍ୟ ସାହିକୁ ଯାଇ ପାଣି ଆଣିବାକୁ ହେଉଛି।
-ପ୍ରମିଳା ନାୟକ, ଅଞ୍ଚଳବାସୀକ