ଟରୋଣ୍ଟୋ,୨୩।୧୧ : କାନାଡାର ଟରୋଣ୍ଟୋରେ ଅଘୋଷିତ ଚାଇନା ପୋଲିସ ଷ୍ଟେଶନ ଚଳାଇବା ମାମଲା ସାମ୍ନାକୁ ଆସିଛି। କାନାଡାର ରୟାଲ ମାଉଣ୍ଟେଡ ପୋଲିସ (ଆରସିଏମପି) ଏହି ଘଟଣାର ତଦନ୍ତ ଆରମ୍ଭ କରିଛି। ଆରସିଏମପି ଏକ ବିବୃତ୍ତିରେ କହିଛି ଯେ ଗ୍ରେଟର ଟରୋଣ୍ଟୋ ଏରିଆ (ଜିଟିଏ) ରେ ପିପୁଲ୍ସ ରିପବ୍ଲିକ ଅଫ ଚାଇନା ଦ୍ୱାରା ପୋଲିସ ସର୍ଭିସ ଷ୍ଟେଶନ ଚଳାଇବା ନେଇ ବିଦେଶୀ ଶକ୍ତିଙ୍କ ହସ୍ତକ୍ଷେପର ଯାଞ୍ଚ କରୁଛି।
ଏହି ପୋଲିସ ଷ୍ଟେଶନ ଜରିଆରେ କାନାଡାରେ ଚାଇନା ପ୍ରବାସୀ ଭାରତୀୟଙ୍କୁ ଟାର୍ଗେଟ କରୁଥିବା ନେଇ ନିକଟରେ ଆରସିଏମପି କହିଛି। ଏହିପରି କାର୍ଯ୍ୟକଳାପ ସହ ଜଡିତ ସମସ୍ତ ପ୍ରକାର ଅପରାଧର ଅନୁସନ୍ଧାନ କରାଯାଉଛି। ବିଦେଶୀ ସଂସ୍ଥା ଦ୍ୱାରା ଦେଶର ଯେକୌଣସି ସମ୍ପ୍ରଦାୟକୁ ଧମକ, ହଇରାଣ କିମ୍ବା କ୍ଷତି ପହଞ୍ଚାଇବା କାର୍ଯ୍ୟର କାନାଡା ପୋଲିସ ପ୍ରତିରୋଧ କରିବ।
ଆରସିଏମପି ଏହା ମଧ୍ୟ କହିଛି ଯେ ଅନ୍ୟ ଦେଶର ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ କାନାଡାର ଜାତୀୟ ସୁରକ୍ଷା ପ୍ରତି ବିପଦ ବୋଲି ବିବେଚନା କରାଯାଏ। ଏହା ହେଉଛି ଦେଶର ଆଭ୍ୟନ୍ତରୀଣ ବ୍ୟାପାରରେ ପ୍ରତ୍ୟକ୍ଷ ହସ୍ତକ୍ଷେପ। କାନାଡା ନାଗରିକଙ୍କ ଜୀବନରେ ହସ୍ତକ୍ଷେପ କରିବାକୁ ଏକ ବିଦେଶୀ ଏଜେନ୍ସିର ସମସ୍ତ ପ୍ରୟାସ ଆରସିଏମପି ଦ୍ୱାରା ଅନୁସନ୍ଧାନ କରାଯିବ। ରୟାଲ ମାଉଣ୍ଟେଡ ପୋଲିସ ଅଭିଯୁକ୍ତ ପୋଲିସ ଷ୍ଟେଶନ ସମ୍ପର୍କରେ ଦେଶର ନାଗରିକଙ୍କଠାରୁ ସୂଚନା ମାଗିଛି। ଚାଇନାକୁ ଏହି ପୋଲିସ ଷ୍ଟେଶନର ଅନ୍ୟ କୌଣସି କାର୍ଯ୍ୟକଳାପ ସମ୍ପର୍କରେ ସୂଚନା ଦେବାକୁ ମଧ୍ୟ କୁହାଯାଇଛି।
ଚଳିତ ମାସ ଆରମ୍ଭରେ ଚାଇନା ଅନ୍ୟ ଦେଶରେ ନିଜର ପୋଲିସ ଷ୍ଟେଶନ କାର୍ଯ୍ୟ କରୁଥିବା ରିପୋର୍ଟକୁ ଅସ୍ବୀକାର କରିଥିଲା। ଚାଇନା କହିଛି ଯେ ଦେଶ ବାହାରେ ଯେକୌଣସି ଦେଶରେ ଅବସ୍ଥିତ ପୋଲିସ ସେବା କେନ୍ଦ୍ର ଚାଇନା ନାଗରିକଙ୍କୁ ସାହାଯ୍ୟ କରିବା ପାଇଁ ପ୍ରତିଷ୍ଠା କରାଯାଇଛି। ଏଗୁଡିକ ସମ୍ପୃକ୍ତ ଦେଶରେ ଅନଲାଇନ ସେବା ସହିତ ଚାଇନା ନାଗରିକମାନଙ୍କୁ ସାହାଯ୍ୟ କରିବା ପାଇଁ ଉଦ୍ଦିଷ୍ଟ।