ରଘୁନାଥପୁର,୪ା୧୧(ଡି.ଏନ୍.ଏ.):ରଘୁନାଥପୁର ବ୍ଲକ ରାଢଙ୍ଗ ଉଚ୍ଚ ବିଦ୍ୟାଳୟର ୩ ଶ୍ରେଣୀଗୃହ ଜରାଜୀର୍ଣ୍ଣ ଅବସ୍ଥାରେ ପଡିରହିଛି। ଗତ ୫ ବର୍ଷ ତଳୁ ଉକ୍ତ ଗୃହରେ ଶିକ୍ଷାଦାନ ବନ୍ଦ ରହିଛି। ଗୋଟିଏ ଛାତ ତଳେ ଥିବା ଉକ୍ତ ଶ୍ରେୀଣୀଗୃହଗୁଡ଼ିକରୁ ଗୋଟିଏ ବଖରା ମରାମତି ସତ୍ତ୍ୱେ ଉକ୍ତ ଗୃହରେ ପାଠପଢ଼ା ନେଇ ଅନିଶ୍ଚିତତା ଦେଖାଦେଇଛି। କାରଣ ଅନ୍ୟ ଦୁଇ ବଖରା ଶ୍ରେଣୀଗୃହର ବିଭିନ୍ନ ସ୍ଥାନରେ କାନ୍ଥ ଫାଟି ଆଁ କରିଛି। ଛାତରୁ ପାଣି ଲିକ୍ କରି ପ୍ଲାଷ୍ଟର ଖଣ୍ଡ ସବୁ ଝୁଲି ରହିଛି। ଏଣୁ ଗୋଟିଏ ଛାତ ତଳେ ମରାମତି କରାଯାଇଥିବା ଉକ୍ତ ଗୃହରେ ଛାତ୍ରୀଛାତ୍ରମାନେ ବସି ପାଠପଢିବା ନିରାପଦ ନୁହେଁ ବୋଲି ଗ୍ରାମବାସୀ ପ୍ରକାଶ କରିଛନ୍ତି।
ଉକ୍ତ ସ୍କୁଲଟି ସରକାରୀ ହୋଇ ନ ଥିବାରୁ ଅନୁଦାନ ପାଇବାରୁ ବଞ୍ଚତ୍ତ ହୋଇଛି। ବ୍ଲକ ଏସ୍ଏଫସି ଟଙ୍କାରେ ୨ ଲକ୍ଷ ଟଙ୍କା ଅନୁଦାନରେ ଉକ୍ତ ଗୃହକୁ ମରାମତି କରାଯାଇଛି। ଆଗାମୀ ଦିନରେ ପୁଣି ଅନୁଦାନ ମିଳିଲେ ଉପରୋକ୍ତ ୨ ଶ୍ରେଣୀଗୃହକୁ ମରାମତି କରାଯିବ ବୋଲି ବିଦ୍ୟାଳୟ ପରିଚାଳନା କମିଟି ସଭ୍ୟ ସୁଶାନ୍ତ ଜେନା କହିଛନ୍ତି। ଏ ସମ୍ପର୍କରେ ପ୍ରଧାନଶିକ୍ଷକ ନିରଞ୍ଜନ ମହାନ୍ତି କୁହନ୍ତି, ବର୍ତ୍ତମାନ ଯେଉଁଠି ପିଲାମାନେ ବସି ପାଠପଢୁଛନ୍ତି ସେ ଗୃହର ମରାମତି କରିବା ଜରୁରୀ ହୋଇପଡ଼ିିଛି। ତେବେ ମରାମତି ହୋଇଥିବା ଗୃହରେ ପାଠପଢ଼ାଯିବା ସମ୍ପର୍କରେ ଏସ୍ଏମଡିସିର ନିଷ୍ପତ୍ତି ଉପରେ ନିର୍ଭର କରେ ବୋଲି ସେ କହିଛନ୍ତି। କେଉଁଠୁ ଅନୁଦାନ ଆସି ମାତ୍ର ଗୋଟିଏ ବଖରା ଗୃହକୁ ମରାମତି କରାଯାଇଛି ସେ ସମ୍ପର୍କରେ କିଛି ଜାଣିନାହାନ୍ତି ବୋଲି ସ୍ଥାନୀୟ ସରପଞ୍ଚ ସୁଶୀଳ ବାରିକ ପ୍ରକାଶ କରିଛନ୍ତି। ଉପରୋକ୍ତ ଶ୍ରେଣୀଗୃହ ପିଲାଙ୍କ ପାଠପଢିବା ପାଇଁ ନିରାପଦ ନୁହେଁ ବୋଲି ସ୍କୁଲ ତଦାରଖ ଦାୟିତ୍ୱରେ ଥିବା ସିଆରସିସି ତରୁଣ କୁମାର ଜେନା ପ୍ରକାଶ କରିଛନ୍ତି। ଏ ସମ୍ପର୍କରେ ଉଚ୍ଚ କତ୍ତୃପକ୍ଷଙ୍କୁ ସେ ଅବଗତ କରାଇବେ ବୋଲି କହିଛନ୍ତି।