ଯାଜପୁର ଅଫିସ,୨୫ା୪: କୋଭିଡ୍ ସଂକ୍ରମିତଙ୍କ ଚିକିତ୍ସା ପାଇଁ ଦେଶରେ ମେଡିକାଲ ଅକ୍ସିଜେନର ବହୁଳ ଚାହିଦା ରହିଛି। ଏହାର ଅଭାବରୁ ରୋଗୀମାନଙ୍କ ମୃତ୍ୟୁ ଘଟୁଥିବାରୁ ଦେଶରେ ହାହାକାର ପରିସ୍ଥିତି ରହିଛି। ଏହାକୁ ଦୃଷ୍ଟିରେ ରଖି ନୀଳାଚଳ ଇସ୍ପାତ ନିଗମ ଲିଃ (ଏନ୍ଆଇଏନ୍ଏଲ୍)ର ଅକ୍ସିଜେନ ପ୍ଲାଣ୍ଟକୁ ପୁନଃଚାଲୁ କରିବାକୁ ସରକାର ନିଷ୍ପତ୍ତି ନେଇଛନ୍ତି। ହେଲେ ଅକ୍ସିଜେନ ପ୍ଲାଣ୍ଟକୁ ଚଳାଇବାକୁ ହେଲେ ଦୈନିକ ୧୨ ମେଗାୱାଟ୍ ନିରନ୍ତର ବିଦ୍ୟୁତ୍ ଶକ୍ତି ଆବଶ୍ୟକ। ଗତ ୧ ବର୍ଷ ହେଲା କାରଖାନା ବନ୍ଦ ଥିବାରୁ ନିଜସ୍ବ ପାୱାର ପ୍ଲାଣ୍ଟ ମଧ୍ୟ ବନ୍ଦ ରହିଛି। ତେଣୁ ନେସ୍କୋ ପକ୍ଷରୁ ନିରନ୍ତର ଭାବେ ଉପରୋକ୍ତ କ୍ଷମତାର ବିଦ୍ୟୁତ୍ ଶକ୍ତି ସରବରାହର ଆବଶ୍ୟକତା ରହିଛି। ଥରେ ବିଦ୍ୟୁତ୍ ଯୋଗାଣ ବିଚ୍ଛିନ୍ନ ହେଲେ ପୁଣି ଅକ୍ସିଜେନ ପ୍ଲାଣ୍ଟ ଚଳାଇବାକୁ ଅତିରିକ୍ତ ୫ ଦିନ ସମୟ ଲାଗିବ। ଏହି ପରିପ୍ରେକ୍ଷୀରେ ନିଜସ୍ବ ପାୱାର ପ୍ଲାଣ୍ଟ ଚାଲୁ କରା ନ ଗଲେ ଅକ୍ସିଜେନ ଉତ୍ପାଦନ ବ୍ୟାହତ ହେବ ବୋଲି କର୍ମଚାରୀ ମହଲରେ ମତପ୍ରକାଶ ପାଇଛି। ତେଣୁ ପାୱାର ପ୍ଲାଣ୍ଟ ଚଳାଇବାକୁ ସରକାର ପଦକ୍ଷେପ ନେଲେ ଅକ୍ସିଜେନ ପ୍ଲାଣ୍ଟରୁ ଆବଶ୍ୟକ ଅମ୍ଳଜାନ ଉତ୍ପାଦନ ହୋଇ ପାରିବ ବୋଲି କର୍ମଚାରୀ ମହଲରେ ଦାବି ହୋଇଛି। ଅନ୍ୟପକ୍ଷେ ଯେଉଁ କର୍ମଚାରୀ ଓ ଅଧିକାରୀମାନେ ଏହି ପ୍ଲାଣ୍ଟର ପରିଚାଳନା କରିବେ ସେମାନେ ଗତ ୧ ବର୍ଷ ହେଲା ଦରମା ପାଇନାହାନ୍ତି। ପ୍ରାୟ ୧୫୦୦ କର୍ମଚାରୀ ଓ ଅଧିକାରୀଙ୍କ ଆର୍ଥିକ ଅବସ୍ଥା କରୋନାଠାରୁ ମଧ୍ୟ ଭୟଙ୍କର ହୋଇଛି। ବକେୟା ଦରମା ଦାବିରେ କର୍ମଚାରୀମାନେ ଗତ ୨୧ ତାରିଖରୁ ଦିବାରାତ୍ର ନୀଳାଚଳ ରେଲୱେ ଟ୍ରାକ ଉପରେ ଧାରଣାରେ ବସିଛନ୍ତି। ଫଳରେ ଲୋଡିଂ ରେକ୍ ୫ ଦିନ ହେଲା ଅଟକି ରହିଛି। ଏହି ଧାରଣାରେ ନୀଳାଚଳ ନିର୍ବାହୀ ସଂଘ, ସମସ୍ତ ୟୁନିୟନ ଓ ନୀଳାଚଳ ମିଳିତ ମଞ୍ଚ କର୍ମକର୍ତ୍ତାମାନେ ସାମିଲ ହୋଇଛନ୍ତି। ଦରମା ନ ଦେବା ପର୍ଯ୍ୟନ୍ତ ଧାରଣା ଜାରି ରହିବ ବୋଲି କର୍ମଚାରୀମାନେ ଅଡ଼ି ବସିଛନ୍ତି। ତେଣୁ ନୀଳାଚଳ କାରଖାନାକୁ ସମ୍ପୂର୍ଣ୍ଣ ଭାବେ ପୁନଃ କାର୍ଯ୍ୟକ୍ଷମ କରାଗଲେ ସମସ୍ତେ ଉପକୃତ ହେବା ସହିତ ଅକ୍ସିଜେନ ଉତ୍ପାଦନ ସୁଚାରୁରୂପେ ସଫଳ ହୋଇପାରନ୍ତା ବୋଲି କର୍ମଚାରୀମାନେ ଦାବି କରିଛନ୍ତି।