ଆରଡ଼ି, ୧୭।୭ (ଦୀପ୍ତି ରଞ୍ଜନ ନାୟକ): ଭଦ୍ରକ ଜିଲା ଆରଡ଼ି ଆଖଣ୍ଡଳମଣି ପୀଠରେ ସୋମବାର କାଉଡ଼ିଆମାନେ ଶ୍ରାବଣୀ ମହାଦେବଙ୍କ ମସ୍ତକରେ ଜଳଲାଗି କରିଛନ୍ତି। ରବିବାର ପୀଠରେ କାଉଡ଼ିଆଙ୍କ ଅସମ୍ଭବ ଭିଡ଼କୁ ଲକ୍ଷ୍ୟ କରି ଅପରାହ୍ନ ୪ଟାରୁ ଜଳଲାଗି କାର୍ଯ୍ୟ ଆରମ୍ଭ ହୋଇଥିଲା। ସୋମବାର ଜଳଲାଗି କରିବା ପାଇଁ ବହୁ କାଉଡ଼ିଆ ଲମ୍ବା ଲାଇନରେ ଘଣ୍ଟା ଘଣ୍ଟା ଛିଡ଼ା ହୋଇଥିଲେ। ସକାଳ ୫ଟାରୁ କାଉଡ଼ିଆଙ୍କର ଅସମ୍ଭବ ଭିଡ଼ ହୋଇଥିଲା। ଲାଇନରେ ଥିବା କାଉଡ଼ିଆ ଠେଲାପେଲା ଲାଗିବା ସହ ଦୁର୍ବଳ ବ୍ୟାରିକେଡ୍କୁ ଭାଙ୍ଗି ଦେଇଥିଲେ। ଏପରିକି ୩ଜଣ କାଉଡ଼ିଆ ଧସ୍ତାଧସ୍ତିରେ ତଳେ ପଡ଼ି ସାମାନ୍ୟ ଆହତ ହୋଇଥିଲେ। ସ୍ବଳ୍ପ ସଂଖ୍ୟକ ପୋଲିସ ନିଯୁକ୍ତ ଯୋଗୁ ଟ୍ରାଫିକ ସମସ୍ୟା ନିୟନ୍ତ୍ରଣ ବାହାରକୁ ଚାଲିଯାଇଥିଲା। ଆରଡ଼ିରୁ ମଠଡିହ, ମଠଡିହରୁ ସାଠିବାଙ୍କୁଡ଼ା ଓ ଦୋହରାପାଟଣା ଯାଏ ଯାନବାହନ ସକାଳ ୯ଟା ଯାଏ ଅଟକି ରହିଥିଲା। ଫଳରେ ବହୁ କାଉଡ଼ିଆ ଓ ଦିଅଁ ଦର୍ଶନ ପାଇଁ ପୀଠକୁ ଯାଉଥିବା ଶ୍ରଦ୍ଧାଳୁମାନେ ଅସନ୍ତୋଷ ବ୍ୟକ୍ତ କରିଥିଲେ। ସ୍ଥାନୀୟ ଓଳଗ, କୁଳେଇପଦା, ପହଣା, ସାଠିବାଙ୍କୁଡ଼ା ଗ୍ରାମର ଯୁବକମାନେ ଭିଡ଼ ନିୟନ୍ତ୍ରଣ ପାଇଁ ଆଗେଇ ଆସି ଟ୍ରାଫିକ ଜାମ୍ ହଟାଇବାରେ ସହାୟତା କରିଥିଲେ। ପ୍ରବଳ ଭିଡ଼ ଯୋଗୁ କାଉଡ଼ିଆମାନେ ପୀଠର ଅନ୍ୟାନ୍ୟ ସ୍ଥାନରେ ମଧ୍ୟ ଜଳଲାଗି କରୁଥିବା ଦେଖିବାକୁ ମିଳିଥିଲା। ରବିବାର ଅପରାହ୍ନ ୪ଟାରୁ ସୋମବାର ଅପରାହ୍ନ ୩ଟା ଯାଏ ପ୍ରାୟ ୨୫ ହଜାର କାଉଡ଼ିଆ ଜଳଲାଗି କରିଥିବା ଜଣାଯାଇଛି।